Rəşad Həsənov: “İran və Rusiya dərman və avtomobil istehsalı sahələrində təcrübəsi olan ölkələr sayılırlar”
Məlum olduğu kimi, noyabrın 1-də Tehranda Azərbaycan Respublikasının Prezidenti İlham Əliyevin, İran İslam Respublikasının Prezidenti Həsən Ruhaninin və Rusiya Federasiyasının Prezidenti Vladimir Putinin üçtərəfli zirvə görüşü keçirilib. Görüş zamanı bir çox məsələlər müzakirə olunub. O cümlədən, iştirakçı ölkələrin iqtisadi əməkdaşlığı ilə bağlı müzakirələr aparılıb.
Azərbaycan Prezidenti İlham Əliyev çıxışı zamanı bildirib ki, ticarət dövriyyəsinin artırılması, qarşılıqlı sərmayə qoyuluşu gündəlikdə olan vacib məsələlərdəndir: “Qeyd etmək lazımdır ki, Azərbaycanın Rusiya və İran ilə ticarət dövriyyəsi 2017-ci ilin yanvar-sentyabr aylarında 2016-cı ilin müvafiq dövrü ilə müqayisədə əhəmiyyətli dərəcədə artıb. Gələcəkdə biz bu müsbət dinamikanı saxlamalı və artırmalıyıq. İrandan və Rusiyadan Azərbaycan iqtisadiyyatına qoyulan sərmayənin həcmi artır. Keçənilki zirvə görüşündən sonra İran şirkətləri Azərbaycanda avtomobil və dərman preparatları zavodlarının tikintisinə iri həcmdə sərmayələr qoyublar. Rusiya şirkəti isə daha bir dərman preparatları zavodunun tikintisinə böyük sərmayə yatırır. Azərbaycan da, öz növbəsində, hər iki ölkəyə sərmayə qoyuluşunu artırır. Bu sərmayə layihələri qarşılıqlı dostluğun və inamın təzahürüdür. Üç ölkə arasında əlaqələrin uğurlu inkişafının nəticəsi olaraq biznes dairələri də daha inamla sərmayə qoymağa başlamışlar. Ümid edirəm ki, bugünkü zirvə görüşü də ölkələrimizin biznes dairələrinin daha da ruhlandırılmasına və qarşılıqlı sərmayə qoyuluşunun artırılmasına xidmət edəcək”.
Gələcəkdə dərman və avtomobil istehsalına Rusiya və İran tərəfinin yatırdığı kapital artarsa, bunun ölkə iqtisadiyyatına təsiri necə olar?
Məsələ ilə bağlı fikir bildirən iqtisadçı-ekspert Rəşad Həsənov “Bakı-Xəbər”ə açıqlamasında qeyd etdi ki, dərman və avtomobil sənayesi zəif inkişaf edən sahələrdən biridir. Amma sonradan bu sahədə vəziyyət dəyişdi: “2014-cü ildə yaranan çağırışlar fonunda hökumət strateji yol xəritələri hazırlayıb. Strateji yol xəritələrində qeyd etdiyimiz sahələrin inkişafı öz əksini tapıb. Bu sahənin inkişafı üçün ənənəvi təcrübəyə ehtiyac var. Bəllidir ki, İran və Rusiya dərman və avtomobil istehsalı sahələrində təcrübəsi olan ölkələr sayılırlar. Bu ölkələrin Azərbaycana qeyd olunan istiqamətlər üzrə investisiya yatırması ilk olaraq ölkəyə xarici yatırımların gəlməsini təmin edəcək. Daha sonra təcrübənin ölkəmizə axınına səbəb olacaq. İstehsal uğurla təşkil edilərsə, sonda ölkənin qeyd olunan istiqamətlər üzrə idxal asılılığı azalacaq. Bu da ölkədən valyuta axıınının qarşısını alacaq. Həmçinin, proseslərin davamlılığı təmin olunarsa, bu zaman istehsalın genişlənməsi və investisiya axınının şahidi olarıq”.
Həmsöhbətimizin sözlərinə görə, avtomobil və dərman istehsalı sahələrinə yatırılan investisiyanın artması yeni iş yerlərinin açılmasına səbəb olacaq.
Günel CƏLİLOVA
