Pərviz Heydərov: “270 sayda gəminin, 20-yə yaxın yük təyyarəsinin olması, gəmiqayırma zavodunun tikilməsi regionda Azərbaycanın nəqliyyat paytaxtına çevrilməsinin tərkib hissəsini təşkil edir”
Fikrət Yusifov: “Azərbaycan üzərindən bütün istiqamətlərdə və bütün nəqliyyat vasitələri ilə daşınacaq yüz milyonlarla ton yük ölkə iqtisadiyyatına böyük töhfə verəcək”
Oktyabrın 30-da tarixi, strateji əhəmiyyətli layihənin açılışı baş tutdu. Bakı-Tiflis-Qars dəmir yolu istifadəyə verildi. Açılışda iştirak edən ölkə başçısı İlham Əliyev Bakı-Tiflis-Qars dəmir yolunun əhəmiyyəti haqqında danışıb. O cümlədən, Azərbaycanın iqtisadi gücü haqqında açılışda iştirak edən qonaqlara məlumat verib.
Prezident bildirib ki, Azərbaycanın 20-yə qədər iri yük təyyarəsi var. Azərbaycanın Xəzərdə 270 gəmidən ibarət böyük donanması var: “Azərbaycanda bir neçə il əvvəl böyük gəmiqayırma zavodu tikilib. Gələcəkdə Xəzərdə yük həcminin artması ilə zavod daha böyük sürətlə çalışacaq. Ələt dəniz limanının birinci fazası gələn il istifadəyə veriləcək. 15 milyon ton yük və 100 min konteyner bu limandan keçəcək. İkinci fazanın istifadəyə verilməsi ilə yükötürmə 25 milyon tona çatacaq”.
Xəzərdə Azərbaycanın 270 gəmidən ibarət donanmasının olması ölkə iqtisadiyyatına necə gəlir gətirir? Ümumiyyətlə, qeyd olunan gəmilər istifadə olunurmu və onlardan nə qədər gəlir əldə edilir?
İqtisadiyyat Nazirliyi İqtisadi İslahatlar Elmi-Tədqiqat İnstitutunun aparıcı elmi işçisi Pərviz Heydərov “Bakı-Xəbər”ə açıqlamasında qeyd etdi ki, bu günlərdə açılan Bakı-Tiflis-Qars dəmir yolunun əhəmiyyəti hər kəsə bəllidir: “Son illər nəqliyyat sektoruna yüksək məbləğdə sərmayə qoyulub. Sərmayənin bu sektora qoyulması heç də səbəbsiz deyil. Yatırılan sərmayə Azərbaycanın özü üçün hesablanmayıb. Bəllidir ki, Xəzər dənizində 270 sayda gəmi var. 270 sayda gəminin, 20-yə yaxın yük təyyarəsinin olması, gəmiqayırma zavodunun tikilməsi regionda Azərbaycanın nəqliyyat paytaxtına çevrilməsinin tərkib hissəsini təşkil edir. Biz şimaldan cənuba, şərqdən qərbə keçən bütün nəqliyyat dəhlizlərinin tam ortasında yerləşirik. Azərbaycanın nəqliyyat sektorunda texniki potensialının artması və digər sahələrə investisiyaların qoyulmasında məqsəd həmin potensialdan maksimum dərəcədə yararlanmaqdır. Həm şimaldan cənuba, qərbdən şərqə, şərqən qərbə istiqamətdə yerləşməyimiz yükdaşımada iştirak edən ölkələrə bizim potensialdan istifadə etməyi təmin etməkdir. Bir neçə il öncə böyük gəmiqayırma zavodu inşa olundu. Həmin zavodda bütün növ gəmilər istehsal olunur. Xəzərdə yükdaşımalar artarsa, həmin zavod daha da böyük güclə işləyəcək. Bütün bunlara Azərbaycanın regionda nəqliyyat paytaxtına çevrilməsi istiqamətində işlərin tərkib hissəsi kimi yanaşılmalıdır”.
Həmsöhbətimiz onu da vurğuladı ki, beynəlxalq yükdaşımalarda Azərbaycanın öz gücünü ortaya qoyması qeyri-neft sektorunun inkişafına şərait yaradacaq.
"Ekonomiks” Beynəlxalq İqtisadi Araşdırmalar Birliyinin sədri, iqtisad elmləri doktoru, professor Fikrət Yusifov qəzetimizə açıqlamasında qeyd etdi ki, Azərbaycan iqtisadiyyatının qeyri-neft sektoruna transformasiya edilməsi bu gün hökumətin qarşısında duran ən mühüm vəzifədir: “Bu sektorun aparıcı sahələrindən biri də tranzit yükdaşımalardır. Son illər Azərbaycanın bu istiqamətdə reallaşdırdığı qlobal infrastruktur layihələri hesabına ölkəmizin regionun ən böyük nəqliyyat dəhlizinə çevrilməsi gerçəkləşə bildi.
Oktyabrın 30-da Bakı-Tiflis-Qars dəmir yolunun açılış mərasimində çıxışı zamanı Prezident İlham Əliyev Azərbaycanın 20-yə qədər iri yük təyyarəsinin və Xəzərdə 270 gəmidən ibarət böyük donanmasının olduğunu vurğuladı. Azərbaycanda bir neçə il əvvəl böyük gəmiqayırma zavodu tikilib istifadəyə verilib. Bu zavodun tikintisinin başlıca məqsədlərindən biri gələcəkdə Xəzərdə yükdaşımaların həcminin artması ilə bağlı gəmi parkının genişləndirilməsini təmin etməkdir. Ələt bölgəsində yeni salınan Bakı Beynəlxalq Dəniz Ticarət Limanının tam istifadəyə verilməsindən sonra bu liman vasitəsilə daşınacaq yüklərin həcminin 25 milyon tona qədər arçatacağı gözlənir. Bunun üçün müasir gəmi parkının olması çox önəmlidir.
Azərbaycan üzərindən bütün istiqamətlərdə və bütün nəqliyyat vasitələri ilə daşınacaq yüz milyonlarla ton yük ölkə iqtisadiyyatına böyük töhfə verəcək”.
Günel CƏLİLOVA
