Elçin Quliyev: “Bakı-Tiflis-Qars dəmir yolunun uğurlu fəaliyyəti ölkəmizin geosiyasi əhəmiyyətini artıracaq və Azərbaycan üçün əlavə imkanlar yaradacaq”
Oktyabrın 30-u Bakı-Tiflis-Qars dəmir yolunun açılışı münasibətilə Bakı Beynəlxalq Dəniz Limanında təntənəli mərasim keçirilib. Mərasimdə ölkə Prezidenti İlham Əliyev, birinci xanım Mehriban Əliyeva ilə yanaşı, qonşu ölkələrin nümayəndə heyətləri də iştirak ediblər.
Bakı-Tiflis-Qars layihəsinin açılışı zamanı Prezident İlham Əliyev qeyd edib ki, 2004-cü ildən indiyə qədər Azərbaycanda 11 min km yol tikilib, 6 aeroport istifadəyə verilib, yük təyyarələrindən ibarət böyük park yaradılıb.
Bu müddət ərzində 11 min km yolun tikilməsi və 6 aeroportun istifadəyə verilməsi Azərbaycanın beynəlxalq tranzit-logistika mərkəzinə çevrilməsində nə kimi rol oynayacaq?
Millət vəkili Elçin Quliyev “Bakı-Xəbər”ə açıqlamasında qeyd etdi ki, qlobal məkanda davam edən siyasi və sosial kataklizmlərə baxmayaraq, Prezident İlham Əliyevin həyata keçirdiyi yeni iqtisadi inkişaf konsepsiyası ilə Azərbaycan yerləşdiyi coğrafiyanın sabitlik adası, iqtisadi inkişafı və inteqrasiyanı təşviq edən lider dövlət statusunu qoruyub saxlayır: “Müstəqil Azərbaycan yeni iqtisadi və siyasi çağırışlara cavab olaraq, adekvat islahatları davam etdirərək mühüm uğurlar qazanıb. İqtisadi inkişaf və demokratikləşmə xəttini milli inkişafın dəyişməz formulu kimi önə çəkən Prezident İlham Əliyev respublikamızın dünyada müsbət imiclə tanınmasını, regional və beynəlxalq iqtisadi əməkdaşlıq mərkəzinə çevrilməsini təmin edib. Ölkədə həyata keçirilən kompleks islahatlar eyni zamanda qeyri-neft sektorunun davamlı inkişafına stimul yaradıb.
Bəllidir ki, Bakı-Tiflis-Qars dəmir yolu xəttinin ümumi uzunluğu təxminən 840 kilometrdir. Bunun 500 kilometri Azərbaycan, 260 kilometri Gürcüstan, 80 kilometri isə Türkiyə ərazisindən keçir. Dəmir yolu xəttinin Gürcüstan-Türkiyə sərhədindəki hissəsində uzunluğu 5 kilometrə yaxın olan tunel inşa edilib.
İqtisadi və siyasi əhəmiyyəti barədə isə təkcə onu deyə bilərik ki, Bakı-Tiflis-Qars dəmir yolu xətti Afrika ilə Asiyanı birləşdirən Süveyş kanalı kimi titanik layihələrlə müqayisə oluna bilər.
Əsas iştirakçıları Azərbaycan, Türkiyə və Gürcüstan olan Bakı-Tiflis-Qars dəmir yolu Avropa İttifaqı, ABŞ və Mərkəzi Asiya dövlətləri tərəfindən dəstəklənir. Layihənin reallığa çevrilməsi məhz Azərbaycan Prezidenti İlham Əliyevin siyasi iradəsi və böyük əməyi sayəsində mümkün olub.
İlkin mərhələdə Bakı-Tiflis-Qars dəmir yolunun buraxılış qabiliyyəti ildə 1 milyon sərnişin və 6,5 milyon ton yükə hesablanıb. Planlaşdırılır ki, daşıma həcmi sonralar 17 milyon ton artacaq və tədricən 50 milyon tona çatdırılacaq. Sərnişin sayı isə 2 milyon nəfər olacaq.
Yeri gəlmişkən, Bakıdan Türkiyənin Qars şəhərinə qədər yolun müddəti 16-17 saat təşkil edəcək. Sonra yol Ankara və İstanbula qədər uzanacaq, Avropa üzərindən La-Manş və Londona keçəcək.
Dəmir yolu vasitəsilə Azərbaycan beynəlxalq nəqliyyat dəhlizlərinə və Türkiyəyə birbaşa çıxış əldə edəcək. Dəmir yolu ilə bir günə Qarsa və iki gün yarıma İstanbula getmək mümkün olacaq”.
E.Quliyevin sözlərinə görə, Bakı-Tiflis-Qars dəmir yolu Azərbaycanın iqtisadiyyatının inkişafında da əhəmiyyətli rol oynayacaq. Respublikamızın ilk illərdə tranzitdən minimal gəliri 50 milyon dollar təşkil edəcək: “Bakı-Tiflis-Qars dəmir yolunun istifadəyə verilməsi həm də Ermənistanın nəqliyyat izolyasiyasını daha da gücləndirəcək.
Artıq reallaşan layihə Avrasiyanın nəqliyyat xəritəsinin önəmli hissəsinə çevrilir. Adıçəkilən dəmir yolunun fəaliyyəti nəticəsində yolboyu yerləşən ölkələr arasındakı ticarət dövriyyəsi və qarşılıqlı sərmayə qoyuluşu artacaq, yoldan istifadə edən bütün ölkələr arasındakı əməkdaşlıq dərinləşəcək. Bakı-Tiflis-Qars dəmir yolu sabitliyə və təhlükəsizliyə xidmət göstərəcək. Yolun istifadəsi zamanı turizmin inkişafı da geniş vüsət alacaq, turistlərin sayı artacaq. Təbii ki, Bakı-Tiflis-Qars dəmir yolunun uğurlu fəaliyyəti ölkəmizin geosiyasi əhəmiyyətini artıracaq və Azərbaycan üçün əlavə imkanlar yaradacaq”.
Günel CƏLİLOVA
