Zakir Əhmədov: “Bütün bunlar ölkənin reytinqinin yüksəlməsinə təsir edən əhəmiyyətli faktorlardır”
Məlum olduğu kimi, Dünya Bankı tərəfindən hazırlanan “Doing Business 2018” hesabatında Azərbaycan 8 pillə irəliləyərək 190 ölkə arasında 65-ci pillədən 57-ci yerə yüksəlib.
Ölkədə aparılan davamlı iqtisadi islahatların məntiqi nəticəsi olaraq Azərbaycan 8 pillə irəliləməklə yanaşı, Avropa və Mərkəzi Asiya regionu üzrə ən islahatçı 3 ölkədən biri kimi müəyyənləşib. Qeyd edək ki, Azərbaycana münasibətdə 2009-cu ildən sonra ilk dəfə 4 indikator üzrə islahat qeydə alınıb.
Sözügedən reytinqə əhəmiyyətli təsir edən aşağıdakı islahatları xüsusi qeyd etmək lazımdır. Belə ki, bağlanan müəssisələrin iflas prosedurlarının daha da sadələşdirilməsi istiqamətində qanununda dəyişikliklər edilib. Kiçik investorların hüquqlarının qorunması istiqamətində investorların hüquqlarının qorunması ilə bağlı qanuna bir sıra əlavə müddəalar əlavə olunub.
Sahibkarların məhkəmələrə elektron formada rüsum ödəyə bilməsi üçün müvafiq elektron ödəniş sistemi yaradılıb. Sahibkarların maliyyə resurslarına əlçatanlığını təmin etmək istiqamətində aparılan islahatlar çərçivəsində bir neçə qanun qəbul edilib.
Bütövlükdə, “Doing Business 2018” hesabatında Azərbaycanın mövqeyi 10 indikatordan altı indikator üzrə yaxşılaşıb. Son 15 ildə 33 islahat həyata keçirilib ki, bunlardan 7-si biznesə başlama, 6-sı kreditin əldə olunması və 5-i vergilərin ödənilməsi sahəsində olub. Müqayisə üçün qeyd edək ki, 2003-cü ildə Bakıda biznesə başlamaq üçün 105 gün tələb olunurdusa, bu gün 4,5 gün tələb olunur.
Sözügedən məsələni “Bakı-Xəbər”ə şərh edən ekspert Zakir Əhmədovun sözlərinə görə, hesabatda Azərbaycanın reytinqinin artması gözlənilən idi: “Çünki ötən iki il ərzində Azərbaycanda biznes mühitinin yaxşılaşdırılması istiqamətində bir sıra kompleks tədbirlər görülüb. Qanunvericilikdə əhəmiyyətli dəyişikliklər edilib. Biznesin inkişafına maneə yaradan bir sıra prosedurlar aradan qaldırılıb. Prezidentin qərarı ilə sahibkarlıq subyektlərinin yoxlanılması dayandırılıb. Bütün bunlar Azərbaycanın reytinqinin yüksəlməsinə təsir edən əhəmiyyətli faktorlardır. Ötən dövrlərlə müqayisədə bir neçə indikator üzrə vəziyyət müsbətə doğru dəyişib. Bütün bunlar Azərbaycanda işgüzar mühitin daha da yaxşılaşmasına öz müsbət təsirini göstərir. Nəzərə almaq lazımdır ki, xarici sərmayədarlar hansısa ölkəyə investisiya qoymaq istəyəndə bu kimi faktorlara xüsusi diqqət edirlər. Çox vaxt bununla bağlı göstəricilərin yaxşı olmadığını nəzərə alıb sərmayə qoymaqdan çəkinirlər. Azərbaycanda sahibkarlığın inkişafı üçün hər cür şərait var. Hazırda reallaşdırılan mühüm layihələr nəticəsində ölkədə makroiqtisadi sabitlik qorunub saxlanır. İiqtisadiyyatın şaxələnməsi uğurla təmin olunur, özəl sektorun, sahibkarlığın inkişafı üçün daha əlverişli biznes və investisiya mühiti formalaşdırılır. Azərbaycanda sahibkarlığın inkişafına dövlət dəstəyi tədbirləri davam etdirilir. İqtisadiyyat Nazirliyinin Sahibkarlığa Kömək Milli Fondu sahibkarlardan hər bir region üçün prioritet hesab olunan sahələr üzrə investisiya layihələrinin qəbulunu reallaşdırmaqla sözügedən sahələri nəzərdə tutan investisiya layihələrinin ümumi dəyərinin əhəmiyyətli hissəsinin güzəştli kreditləşməsini həyata keçirir. Bu gün Azərbaycanda sahibkarlığa dövlət dəstəyinin əsas hədəflərindən birini kiçik və orta sahibkarlıq təşkil edir. Bu yöndə ardıcıl işlər görülür”.
Vidadi ORDAHALLI
