Nahid Bağırov: “Şopinq Festivalının payız və yaz aylarında keçirilməsi turizm sektoruna öz töhfəsini verəcək”
Bu payız paytaxtımız möhtəşəm bir ticarət bayramına evsahibliyi edir. Bakı Şopinq Festivalı noyabrın 15-nə qədər davam edəcək. Şopinqsevərlər bu ay paytaxtımızın ticarət mərkəzlərində toplaşıblar. Onlar zövqlə istədikləri məhsulu “Tax free” yazılan dükanlardan əldə edə bilərlər.
Festival çərçivəsində əcnəbilərlə yanaşı, Azərbaycan vətəndaşları da "Tax free" (əlavə dəyər vergisinin qaytarılması) sistemindən istifadə edə bilirlər. Festival günlərində 100 manat və daha çox alış-veriş edən hər bir əcnəbi və ya Azərbaycan vətəndaşı bu sistemdən yararlanmaq imkanına malikdir. Bakı Şopinq Festivalının internet saytı — www.bakushopfest.com Azərbaycan, ingilis, rus, ərəb dillərində fəaliyyət göstərir.
Onu da qeyd edək ki, artıq şəhərimiz dünyanın ən qabaqcıl alış-veriş mərkəzlərindən birinə çevrilmək ərəfəsindədir.
Məlumat üçün bildirək ki, Bakıda keçirilən Şopinq Festivalı haqqında xarici media orqanlarında mütəmadi məlumatlar yayılır. Növbəti reportaj Birləşmiş Ərəb Əmirliklərinin Əbu-Dabi dövlət televiziya kanalında yayımlanıb. Reportajda Avropa və Şərq mədəniyyətlərinin, keçmişlə müasirliyin qovşağında yerləşən Azərbaycan turistlərin istirahət və əylənmək üçün üz tutduqları məkan kimi təqdim edilir.
Əbu-Dabi telekanalı qeyd edir ki, Bakı Şopinq Festivalı bundan sonra əcnəbi turistləri cəlb edən Azərbaycan paytaxtının vizit kartlarından biri olacaq.
Bakıda keçirilən Şopinq Festivalının Azərbaycanın vizit kartına çevrilməsi artıq dünya mediasında da geniş müzakirə olunur. Xarici media orqanlarında ikinci Şopinq Festivalı haqqında silsilə materialların yayımlanması şopinq üçün ölkəyə gələcək turistlərin sayına təsir edir.
Azərbaycan Turizm Assosiasiyası idarə heyətinin sədri Nahid Bağırov “Bakı-Xəbər”ə açıqlamasında qeyd etdi ki, Şopinq Festivalı turizmin bir növüdür: “Ticarəti sevənlər ilk öncə şopinqin hansı ölkədə keçirilməsini araşdırır. Araşdırma nəricəsində hansı ölkədə ticarət bayramı keçirilirsə, onlar həmin ölkəyə alış-veriş etməyə yollanırlar”.
Həmsöhbətimizin sözlərinə görə, ölkəmizdə keçirilən beynəlxalq əhəmiyyətli yarışlar, tədbirlər, festivallar sayəsində turizm sektoru daha da inkişaf edir: “Bəllidir ki, ölkəmizdə artıq ikinci Şopinq Festivalı keçirilir. İlk festival aprel ayının 15-dən may ayının 15-nə qədər davam edib.
Belə ki, ötən illə müqayisədə bu il turizm sektorunda xeyli dəyişiklik olub. Biz hamıya göstərdik ki, Azərbaycan xeyli sayda turist qəbul etmək potensialına malikdir və turizm səfərləri üçün cəlbedici və turizm potensialı olan ölkədir.
Dünya təcrübəsinə nəzər salsaq görərik ki, əksər xarici ölkələrdə müəyyən tarixlərdə şopinq festivalları keçirilir. Şopinq festivalı ölkəmizə gələcək turistlərin sayına təsir edəcək. Onu da bildirim ki, bu günə qədər nə aprel-may aylarında, nə də oktyabr-noyabr aylarında Şopinq Festivalı keçirilməyib. Bu aylarda Şopinq Festivalının ilk olaraq Azərbaycanda keçirilməsi turizm sektoruna öz töhfəsini verəcək. Alış-veriş məqsədilə gələn turistlərin sayı daha da artacaq. Turistlərin sayında artım ildən-ilə hiss olunacaq”.
N.Bağırov onu da vurğuladı ki, Bakı Şopinq Festivalı əcnəbi turistləri cəlb edən ticarət bayramlarının vizit kartına çevriləcək.
Günel CƏLİLOVA
