Natiq Cəfərli: “Milli valyutalarda ticarət etmək üçün Azərbaycan və İranda valyutalararası birjanın fəaliyyət göstərməsi lazımdır”
İran Azərbaycana ikitərəfli ticarətdə hər iki ölkənin milli valyutasından istifadə etməyi təklif edir. Bu barədə İranın iqtisadiyyat və maliyyə naziri Məsud Karbasian media nümayəndələrinə açıqlamasında deyib.
O bildirib ki, tərəflər Azərbaycan və İran arasında maliyyə münasibətlərinin sadələşdirilməsi məqsədilə müstəqil bankın yaradılması imkanlarını da müzakirə edirlər: "Bank sahəsində əməkdaşlığın genişləndirilməsi ölkələrimiz arasında iqtisadi və istehsal əlaqələrinin gələcək inkişafı üçün yoldur".
M.Karbasian Türkiyə və Rusiya ilə ticari əlaqələrdə milli valyutadan istifadənin müsbət nəticələrini vurğulayaraq, belə bir təcrübənin Azərbaycanla ticari əməkdaşlıqda tətbiq edilməsi imkanını qeyd edib.
İran-Azərbaycan ticarət münasibətlərində milli valyutadan istifadə tətbiq olunarsa, bunun ölkə iqtisadiyyatına necə təsir edəcəyini öyrənmək məqsədilə iqtisadçı-ekspert Natiq Cəfərliyə müraciət etdik. O, “Bakı-Xəbər”ə açıqlamasında qeyd etdi ki, ölkələrarası ticarət əlaqələrində milli valyutadan istifadə etmək yeni istək deyil: “Zamanla bir çox ölkələr bu qaydanı tətbiq ediblər. Qeyd etmək lazımdır ki, ölkələrarası ticarət əlaqələrində milli valyutadan istifadə olunanda bir çox texniki problemlər yaşana bilər. Bəllidir ki, müqavilələrin əksəriyyəti dollar və ya avro ilə bağlanır. Azərbaycan manatında son zamanlar sabitlik müşahidə olunsa da, İran milli valyutasının məzənnəsində isə tez-tez dəyişmələr hiss olunur. Ticarət əlaqələrində milli valyutanın tətbiqi əlavə çətinlik yarada bilər. Bəllidir ki, milli valyutalarda ticarət etmək üçün Azərbaycan və İranda valyutalararası birjanın fəaliyyət göstərməsi lazımdır. İran iş adamlarına manat lazım olanda onlar birja vasitəilə istədikləri valyutanı əldə etsinlər. Eyni ilə Azərbaycan iş adamlarına da rialı əldə etmək üçün birbaşa çıxış imkanı olsun. Bu kimi məsələlər həll olunarsa, ölkələrarası ticarət əlaqələrində milli valyutadan istifadə oluna bilər. Onu da qeyd etmək lazımdır ki, yenidən məzənnənin dəyişmə ehtimalını nəzərə alaraq, avro və ya dollarla qiymətlər təsbit olunacaq. Müqavilənin xarici valyuta ilə imzalanması iş adamlarını əlavə itkilərdən qoruyur.
Xatırladım ki, 3 il öncə Rusiya ilə Çin milli valyuta ilə ticarət etməyi qərara alsalar da, bu günə qədər məsələ reallaşdırılmayıb”.
Günel CƏLİLOVA
