Aydın Hüseynov: “Nəzərə almaq lazımdır ki, iki dövlət regionda böyük layihələrin həyata keçirilməsinə imza atıblar”
İğdır şəhərində keçirilən Türkiyə-Azərbaycan biznes forumunda iqtisadiyyat naziri Şahin Mustafayev çıxış edərək diqqətə çatdırıb ki, ölkələrimiz arasında Yüksək Səviyyəli Strateji Əməkdaşlıq Şurası fəaliyyət göstərir, Azərbaycanın strateji layihələri məhz qardaş Türkiyə ilə birgə həyata keçirilir.
Bakı-Tbilisi-Ceyhan, “Cənub Qaz Dəhlizi”, "STAR", "PETKİM", "Enerji körpüsü" belə layihələrdəndir: “Bakı-Tbilisi-Qars dəmir yolu əlaqələrimizi daha da gücləndirməklə, ölkələrimizin tranzit imkanlarını artıracaq. Türkiyə Azərbaycanın əsas ticarət və investisiya tərəfdaşlarındandır. 2017-ci ilin yanvar-sentyabr aylarında ölkələrimiz arasında ticarət dövriyyəsində əhəmiyyətli artım müşahidə olunub. Hazırda Preferensial Ticarət Sazişi üzrə müzakirələr aparılır. Azərbaycanda Türkiyə sərmayələri əsasında 3 mindən çox, Türkiyədə isə Azərbaycan investisiyalı 2 minə yaxın şirkət fəaliyyət göstərir. Türkiyənin Azərbaycana investisiyaları 11,7 mlrd. ABŞ dolları, Azərbaycanın Türkiyəyə investisiyaları isə 10,1 mlrd. ABŞ dollarıdır”. Tədbirdə o da diqqətə çatdırılıb ki, iqtisadiyyatın müxtəlif sahələrində əlaqələrin daha da inkişaf etdirilməsi üçün böyük potensial mövcuddur. Ş.Mustafayevin fikrincə, birgə səylər iqtisadi sahədə əməkdaşlığı daha da genişləndirəcək və xalqlarımızın rifahına töhfə verəcək.
Ümumən iki ölkə arasında olan bu ticarət tərəfdaşlığını ekspertlər necə dəyərləndirir?
Məsələyə münasibət bildirən millət vəkili Aydın Hüseynovun sözlərinə görə, bütün bunlar uğurlu iqtisadi tərəfdaşlığın göstəricisidir: “Məlumdur ki, Azərbaycanda türk şirkətləri fəaliyyət göstərir və iqtisadi əlaqələr daha da genişlənir. Müstəqilliyimizin ilk illərəndən başlayaraq Türkiyə Azərbaycana həm siyasi, həm də iqtisadi dəstək verib. Azərbaycanın ən böyük layihələrində Türkiyə şirkətləri fəal iştirak ediblər və ölkəyə böyük sərmayələr yatırıblar. Eyni zamanda, son dövrlərdə Azərbaycan şirkətləri Türkiyədə fəaliyyət göstərir və qardaş ölkənin iqtisadiyyatına böyük sərmayələr qoyurlar. Hər iki dövlətin bu yöndə iqtisadi əlaqələri genişlənir. Azərbaycanda Türkiyə kapitalı ilə minlərlə şirkət fəaliyyət göstərir. O cümlədən, Türkiyədə də Azərbaycan kapitalı ilə şirkətlər fəaliyyət göstərir. Azərbaycanda Türkiyə kapitalı ilə fəaliyyət göstərən şirkətlər iqtisadiyyatın müxtəlif sahələrində iş qurublar. Bura həm istehsal, həm də xidmət sektoru daxildir. Türk şirkətlərinin Azərbaycanın qeyri-neft sektorunun inkişafında daha yaxından iştirak etmələri arzuolunandır. İki ölkə arasında iqtisadi əlaqələrin genişlənməsi Azərbaycanla Türkiyənin iqtisadi qüdrətini, siyasi nüfuzunu daha da artırır. Eyni zamanda, onu da qeyd etməliyik ki, artıq Türkiyə ilə Azərbaycan arasında bu kimi ticarət dövriyyələrinin yüksək olması və biznes forumların keçirilməsi iqtisadi əlaqələrin dərinləşməsinə xidmət edir. Nəzərə almaq lazımdır ki, iki dövlət regionda böyük layihələrin həyata keçirilməsinə imza atıblar. Məsələn, TANAP, Bakı-Tbilisi-Qars layihələrinin adını çəkmək olar. Bu layihənin işə düşməsi Şərqlə-Qərbi birləşdirəcək. Bu kimi layıhələr həm Türkiyənin, həm də Azərbaycanın birgə həyata keçirdiyi layihələr sırasındadır. Hesab edirəm ki, sözügedən layihələr iki ölkə arasında ticarət əlaqələrinin daha da genişlənməsinə öz müsbət təsirini göstərəcək”.
Vidadi ORDAHALLI
