Xalid Kərimli: “Bunun əsas səbəblərindən biri Azərbaycanın ixracının azalması ilə bağlıdır”
Azərbaycanın xarici ticarət dövriyyəsi 30 faizə yaxın azalıb. Bu ilin yanvar-fevral aylarında Azərbaycanın xarici ticarət dövriyyəsi 6 milyard 264 milyon ABŞ dolları təşkil edib. Dövlət Gömrük Komitəsinin statistika məlumatlarına əsasən, bu, 2025-ci illə müqayisədə 29,7 faiz azdır.
Bu dövr üzrə ixracın həcmi 23,1 faiz azalaraq 3 milyard 665. milyon dollar təşkil edib. İdxal da 37,2 faiz azalaraq 2 milyard 599 milyon dollara bərabər olub. Ötən il xarici ticarətin müsbət saldosu 1 milyard 65.7 milyon dollar təşkil etmişdi. İndi bu 628 milyon dollara düşüb.
Maraqlıdır, Azərbaycanın xarici ticarət dövriyyəsi iki ay ərzində niyə bu qədər çox azalıb?
Sözügedən məsələyə aydınlıq gətirən iqtisadçı-ekspert Xalid Kərimli baki-xeber.com-a açıqlamasında azalmanı bir sıra faktorlarla əlaqələndirdi: “Ticarət dövriyyəsinin aşağı düşməsinin əsas səbəblərindən biri Azərbaycanın ixracının azalması ilə bağlıdır. Burada da söhbət əsasən neft ixracının azalmasından gedir. İki ay ərzində həm neft hasilatı azalıb, həm də neftin qiyməti aşağı düşüb. Ötən ilin yanvar-fevral ayları ilə müqayisədə qiymətlər çox aşağı oldu. Xüsusən də neft hasilatı hər il azalır. 1,3 milyard dollara qədər neft ixracı aşağı düşüb. Ancaq bundan fərqli olaraq qeyri-neft ixracında bir az artım var. Keçən ilin iki ayında 441 milyon dollar ixrac qeydə alınıbsa, bu il qeyri-neft ixracı 529 milyon dollar olub. Kateqoriya üzrə götürsək görərik ki, xüsusən kənd təsərrüfatı məhsullarının ixracında müəyyən artım müşahidə edilir. İdxala gəldikdə isə, onun azalması o qədər də pis məsələ deyil. Ancaq o halda yaxşı hal deyil ki, iqtisadi aktivlik aşağı düşsün. Yəni bu baxımdan idxalın strukturuna baxdıqda görürük ki, idxalda azalan kateqoriya digərlərinin adı ilə təsnifləşdirilib. Bu, çox böyük ehtimalla hərbi-sənaye kompleksinə aid olan məhsullardır. Bu gündəlik istehlak, sənayedə istehsal, istifadə edilən məhsullar olmadığına görə, burada hər hansı azalma o qədər də iqtisadiyyat, əhali üçün ziyanlı deyil. Ölkədə qeyri-neft sektorunun real inkişafına xüsusi önəm verilməlidir. Bu sahədə ciddi uğur əldə edilsə, iqtisadi inkişaf dayanıqlı ola bilər”.
Vidadi ORDAHALLI
