Elməddin Muradlı: "Yanğınsöndürən balonu 3 günlük alıb texniki baxışdan keçməklə dövlət qurumunu aldatmaq mümkündür, bəs yanğın hadisəsi baş verəndə nə olacaq?”
Şəmsəddin Əliyev: "Bu vasitələrin avtomobildə gəzdirilməsi məcburi olmamalıdır"
Mediada yayılan xəbərə görə, Bakıda avtomobillərin texniki baxışı üçün tələb olunan avadanlıqların icarəyə verilməsi ilə bağlı maraqlı vəziyyətdən bəhs olunur. Sosial şəbəkələrdə yayılan görüntülərdə bəzi şəxslərin yanğınsöndürən balon, ilkin tibbi yardım çantası və digər zəruri vasitələri qısa müddətlik icarəyə təklif etdiyi görünür. Bildirilir ki, bu avadanlıqların satış qiyməti 60 manat olduğu halda, icarə haqqı 20 manatdır.
Məsələ ictimai müzakirələrə səbəb olub. Sürücülərin bir qismi bunu praktik çıxış yolu kimi dəyərləndirsə də, digər tərəf təhlükəsizlik baxımından düzgün yanaşma olmadığını vurğulayır. Çünki bu vasitələr yalnız texniki baxışdan keçmək üçün deyil, fövqəladə hallarda istifadə üçün avtomobildə daimi saxlanılmalıdır.
Rəsmi qurumlar da bu cür yanaşmanın yolverilməz olduğunu bildiriblər. Qanunvericiliyə əsasən, avtomobildə zəruri avadanlıqların olmaması inzibati məsuliyyət yaradır və cərimə ilə nəticələnə bilər. Ümumilikdə, məsələ həm təhlükəsizlik, həm də qanuni tələblərə əməl olunması baxımından cəmiyyət üçün aktual olaraq qalır.
Jurnalistika və İnkişaf Mərkəzinin sədri, nəqliyyat eksperti Elməddin Muradlı məsələ ilə bağlı "Bakı-Xəbər" qəzetinə açıqlamasında bildirdi ki, bu heç də xoşagələn hal deyil, çünki avtomobildə lazım olan həmin avadanlıqlar görüntü üçün olmamalıdır, onların müvəqqəti dövr üçün icarəyə verilməsi qəbul edilən hal deyil: "Məsələn, dərman qutusu avtomobildə necə müvəqqəti saxlanıla bilər? Düzdür, dərman qutusunun tərkibini müzakirə etmək olar, çünki o siyahıda elə dərmanlar var ki, yay fəslində yüksək temperaturda zərər verə bilər. Mən də bu istiqamətdə dəfələrlə araşdırma aparmışam, həkimlər də etiraf edir ki, bu dərmanların o temperaturda saxlanılması yolverilməzdir. Səhiyyə Nazirliyi bu siyahını təsdiqləyib, ona yenidən baxmaq olar. Amma qanun bunu tələb edirsə, dərman qutusu maşında olmalıdır. Qəza üçbucağı nişanı ona görə vacibdir ki, avtomobil texniki nasazlıq səbəbindən yolda qalanda bu qurğu təhlükəsizlik məqsədilə quraşdırılır, digər hərəkət iştirakçıları bu nişanı kənardan görüb manevr edib istiqamətini dəyişmək imkanına malik olsunlar. Bu olmadıqda qəza baş verir, hərəkət axınının ritmi pozulur, yollarda tıxaclar yaranır.
Yanğınsöndürən balonuna gəldikdə, bu da vacib elementdir, hər bir avtomobildə hər an olması vacibdir. Çünki həm qanunun tələbidir, həm də bu avadanlıq sürücünün əlinin altında olmayanda avtomobildə baş verən kiçik alov bəzən avtomobilin yanıb sıradan çıxmasına səbəb olur. Son illər belə hadisələr tez-tez baş verir. Sürücü bu balonu 3 günlük alıb maşında saxlayıb texniki baxışdan keçirməklə elə bilir ki, dövlət qurumunu aldatdı, bəs yanğın hadisəsi baş verəndə nə olacaq, onda da həmin icarəçi sürücüyə kömək edə biləcəkmi? İndi bu qədər deyiləndən sonra sürücülər özləri qərar versinlər: o vasitələri icarəyə götürmək, yoxsa alıb avtomobildə saxlamaq sərfəlidir? Bu vasitələr təxminən 55-60 manat xərc tələb edir, amma lazım olan anda sürücünün həyatını, əmlakının tamamilə sıradan çıxmasını sığortalaya bilər. Hər bir sürücünün bu vasitələri alıb avtomobildə saxlamağa imkanı çatır."
Hüquqşünas Şəmsəddin isə bildirdi ki, sürücülərin bu vasitələri avtomobillərində saxlamaması və ya texniki baxış üçün müvəqqəti icarəyə götürməsi inzibati məsuliyyət yaradır: "Bu cür fövqəladə hallar üçün nəzərdə tutulan vasitələrin sovetlər dönəmində də avtomobillərdə olması məcburi idi. Amma yanğınsöndürən balonun avtomobildə gəzdirilməsi bir qədər diskomfort yaradırdı. O vaxt avtomobillərin yük yerində həm tibb çantası, həm də kiçik yanğınsöndürən balon olurdu.
Hazırda populyar olan xarici avtomobillərdə çox nadir hallarda yanğın baş verir. Amma qəzaların sayı artıb və bu qəzalarda sürücülər həm xəsarət alır, həm də avtomobildə yanğın baş verə bilir. Yəni sözügedən vasitələr hazırda da aktualdır.
Mən düşünürəm ki, bu vasitələrin avtomobildə gəzdirilməsi məcburi olmamalıdır. Avtomobil sahibi özünün və əmlakının qayğısına qalmaq istəyirsə, qoy bu vasitələri gəzdirsin, istəmirsə də qoy öz həyatını və avtomobilinin taleyini riskə atsın. Bunu biz təbliğ edə bilərik, amma vətəndaşın ixtiyarına buraxmalıyıq. Avtomobil texniki baxışdan keçiriləndə bu vasitələr tapılmırsa, onda sürücüyə tövsiyə edilməlidir ki, bu vasitələr sizin təhlükəsizliyiniz üçündür, avtomobilinizi bu vasitələrlə təchiz edin".
Akif NƏSİRLİ
