Ağbənd–Kəlalə avtomobil körpüsünün tikintisi artıq başa çatıb. Bunu Bakıda Azərbaycan Respublikası ilə İran İslam Respublikası arasında iqtisadi, ticarət və humanitar sahələrdə əməkdaşlıq üzrə Dövlət Komissiyasının 17-ci iclasında baş nazirin müavini, Komissiyanın Azərbaycan tərəfindən həmsədri Şahin Mustafayev bildirib.
Ş.Mustafayev deyib ki, sərhəd-gömrük infrastrukturunun inşası tamamlandıqdan sonra həmin körpünün istismara verilməsi nəzərdə tutulur. Baş nazirin müavini əlavə edib ki, həmin layihə Şərqi Zəngəzur iqtisadi rayonunu Naxçıvanla ən qısa və səmərəli marşrutla birləşdirəcək, eyni zamanda, Fars körfəzi ilə Qara dənizi əlaqələndirən əlverişli avtomobil marşrutunun mühüm tərkib hissəsini təşkil edəcək. Qeyd edək ki, Ağbənd–Kəlalə avtomobil körpüsünün inşası Azərbaycan ilə İran arasında nəqliyyat, logistika və regional əməkdaşlıq baxımından strateji əhəmiyyət daşıyan mühüm infrastruktur layihələrindən biri hesab olunur. Araz çayı üzərində yerləşən bu körpü yalnız iki ölkəni fiziki olaraq birləşdirmir, eyni zamanda Cənubi Qafqaz və Yaxın Şərq arasında yeni iqtisadi və tranzit imkanlarının formalaşmasına xidmət edir. Körpü Azərbaycanın Zəngilan rayonunun Ağbənd qəsəbəsini İranın Şərqi Azərbaycan vilayətində yerləşən Kəlalə yaşayış məntəqəsi ilə birləşdirir. İşğaldan azad edilmiş ərazilərdə həyata keçirilən genişmiqyaslı bərpa və yenidənqurma siyasəti çərçivəsində Ağbənd bölgəsi mühüm logistika mərkəzlərindən birinə çevrilməkdədir. Bu baxımdan Ağbənd–Kəlalə körpüsü regionun iqtisadi inteqrasiyasını sürətləndirən əsas nəqliyyat halqalarından biri kimi çıxış edir. Layihənin ən mühüm tərəflərindən biri onun beynəlxalq nəqliyyat dəhlizləri ilə əlaqələndirilməsidir. Körpü Şərq–Qərb və Şimal–Cənub istiqamətində formalaşan yeni tranzit marşrutlarının bir hissəsinə çevrilərək Azərbaycan üzərindən keçən yükdaşımaların həcmini artırmaq potensialına malikdir. Xüsusilə Zəngəzur dəhlizi perspektivləri fonunda bu keçid alternativ kommunikasiya imkanları yaradır və regionda nəqliyyat şaxələndirilməsinə xidmət edir.
Ağbənd–Kəlalə körpüsü Azərbaycanın əsas ərazisi ilə Naxçıvan Muxtar Respublikası arasında əlaqələrin genişləndirilməsi baxımından da xüsusi əhəmiyyət kəsb edir. Mövcud geosiyasi şəraitdə alternativ marşrutların yaradılması ölkənin nəqliyyat təhlükəsizliyini gücləndirir və regional ticarətin davamlılığını təmin edir. İran üzərindən keçən yeni avtomobil bağlantısı Azərbaycan məhsullarının Yaxın Şərq bazarlarına daha sürətli çıxışına şərait yaradır. Ağbənd–Kəlalə avtomobil körpüsü həm də Azərbaycanın tranzit ölkə kimi rolunun güclənməsinə xidmət edir. Qlobal ticarət marşrutlarının yenidən formalaşdığı dövrdə alternativ və təhlükəsiz keçidlərin mövcudluğu strateji üstünlük hesab olunur. Azərbaycan öz coğrafi mövqeyindən istifadə edərək Avropa ilə Asiyanı birləşdirən mühüm logistika qovşağına çevrilmək istiqamətində addımlar atır və bu körpü həmin strategiyanın praktik nəticələrindən biridir.
Tahir TAĞIYEV
