Vüqar Bayramov: “SOCAR-ın investisiyalarının şaxələndirməsi müşahidə edilir və bu, iqtisadi baxımdan doğru qərardır”
Avropa Komissiyası Azərbaycan Dövlət Neft Şirkətinin (SOCAR) İtaliya şirkəti "Italiana Petroli"nin (IP) 99,82 % səhmlərini "API Holding"dən almasını təsdiqləyib. Bu barədə Avropa Komissiyası məlumat yayıb.
Komissiya qeyd edib ki, satınalma rəqabət sahəsində problem yaratmayacaq.
"Italiana Petroli" İtaliyanın ən iri inteqrə olunmuş "downstream" platformalarından biridir. Şirkət ölkə üzrə minlərlə yanacaqdoldurma məntəqəsinə, ildə təxminən 10 milyon ton emal gücünə malik iki neft emalı zavoduna, həmçinin bitum, aviasiya yanacağı və sürtgü yağları kimi xüsusi məhsulların satışına və ölkəni tam əhatə edən logistika şəbəkəsinə sahibdir.
Ümumilikdə, bunun iqtisadi əhəmiyyətini ekspertlər necə dəyərləndirir?
Sözügedən məsələni baki-xeber.com-a şərh edən millət vəkili Vüqar Bayramov Avropa Komissiyasının məlum qərarına müsbət prizmadan yanaşdı: “Görünən odur ki, SOCAR-ın investisiyalarının şaxələndirməsi müşahidə edilir və bu da iqtisadi baxımdan doğru qərardır. Praktiki olaraq bu, bir tərəfdən risklərin minimumlaşdırılması baxımından vacibdir. Digər tərəfdən dayanıqlı iqtisadi gəlirlərə nail olunması aspektindən vacib hesab edilir. Eyni zamanda nəzərə almaq lazımdır ki, "Italiana Petroli" kifayət qədər geniş şəbəkəsi olan bir şirkətdir. Avropa İttifaqının aparıcı ölkələrindən birində yerləşir. Bir məqamı xüsusilə qeyd etmək istəyirəm ki, İtaliya Avropa İttifaqında iqtisadi gücünə görə üçüncü dövlətdir. Bu, praktiki olaraq bir tərəfdən Dövlət Neft Şirkətinin gəlirliyini artıracaq, rentabelliyini yüksəldəcək. Digər tərəfdən isə, Azərbaycana daxil olan valyuta gəlirlərinin həcminə müsbət təsir göstərəcək. Bu da dövlət gəlirlərimizin artırılması baxımından vacib hesab edilir. Ona görə ki, nəticə etibarı ilə dövlət gəlirlərimizin artması həm də xaricdə investisiya qoyuluşlarının genişləndirilməsi ilə bağlıdır. O baxımdan iqtisadi nöqteyi-nəzərdən həm Dövlət Neft Şirkətinin, həm də Azərbaycanın dövlət gəlirlərinin artmasına xidmət edəcək”.
Vidadi ORDAHALLI
