ABŞ dolları faktiki olaraq çökür və prezident Donald Trampın bu xüsusda etdiklərinə haqq qazandırması Amerika valyutasının tənəzzülünü sürətləndirir. Trampdan valyutanın ucuzlaşmasından narahat olub-olmadığı soruşulduqda o bildirib: “Xeyr, məncə əladır. Məncə, dollar əla işləyir. Dollarla bağlı hər şey əladır. Gördüyümüz işlərə baxın. Xeyr, dollar çox yaxşı gedir”.
Trampın şərhləri və ötən il tətbiq edilən tariflər dolların dəyər itirməsini tezləşdirir. Onun gözlənilməz siyasəti xarici investorların ABŞ-dan qaçmasına səbəb olacağı ilə bağlı qorxuları da artırır. Onun son dedikləri isə treyderlərə dollar satmağa icazə kimi qəbul edilib və bu da administrasiyanın ixracı artırmaq üçün daha zəif dollara üstünlük verdiyini göstərir. Beləliklə, prezident dolları çökdürür. Valyutanın ucuzlaşması həmçinin Trampın xarici müttəfiqlərini və investorları narahat edən gözlənilməz siyasəti ilə daha da ağırlaşıb: onun Qrenlandiyanı ələ keçirmək təhdidləri xüsusilə istiqraz sahiblərinə zərər verib. Federal Ehtiyat Sisteminə təzyiq maliyyə sisteminə və valyutaya da təsir edib. Ən əsası, Trampın aqressiv liderlik tərzi ABŞ daxilində siyasi qütbləşməni və xaricdə təcridi dərinləşdirib.
Tramp illərdir dolların gücünü üstünlüyü qorumağın vacibliyini bəyan edir. Amma ikitərəfli danışıqlar zamanı eyni zamanda zəif dolların istehsal sektoru üçün faydalarını müzakirə edir: "Mən güclü dolları sevən biriyəm, amma zəif dollar sizə daha çox pul qazandırır". İndiTramp dolların gücünü manipulyasiya edə biləcəyini bəyan edərək bildirib: “Mən onu yo-yo kimi yüksəldə və ya aşağı sala bilərəm, istədiyimi edə bilərəm”. İndiyə qədər o, yalnız sözlərini qismən yerinə yetirib, yəni ABŞ valyutasını çökdürüb. Çin və Yaponiyanın valyutalarını devalvasiya etmək istədiklərini xatırladan Tramp, bu səbəbdən keçmişdə həmin ölkələrlə ciddi mübarizə apardığını bildirib. O vurğulayıb ki, bu, ədalətli deyil, çünki onlar valyutalarının dəyərini aşağı saldıqda rəqabət daha da çətinləşir. Tramp qeyd edib ki, dollar hazırda öz real səviyyəsini tapmağa çalışır və bunun ədalətli proses olduğunu bildirib. Trampın açıqlamalarından sonra ABŞ dollarının avro, İsveçrə frankı, Yapon yeni, Kanada dolları, Britaniya funt sterlinqi və İsveç kronu qarşısındakı dəyərini ölçən dollar indeksi 95,6 səviyyəsinə enərək son 4 ilin ən aşağı həddini görüb.
Samirə SƏFƏROVA
