Fikrət Yusifov: “Ötən il ölkə iqtisadiyyatında əldə olunan nəticələr o qədər də yüksək göstəricilərlə xarakterizə edilmədi”
Azərbaycan iqtisadiyyatına yatırılan investisiyalar azalıb. Ötən il Azərbaycanda əsas kapitala 21 milyard 226,1 milyon manat məbləğində, yaxud 2024-cü illə müqayisədə 5,6% az investisiya yönəldilib. Neft-qaz sektoruna yönəldilən investisiyaların həcmi 10,3%, qeyri neft-qaz sektoruna yönəldilən investisiyaların həcmi isə 3,9% azalıb.
İstifadə olunan investisiyanın 10 milyard 972,1 milyon manatı və ya 51,7%-i məhsul istehsalı sahələrinə, 7 milyard 179,6 milyon manatı (33,8%-i) xidmət sahələrinə, 3 milyard 74,4 milyon manatı (14,5%-i) isə yaşayış evlərinin tikintisinə sərf olunub. Əsas kapitala yönəldilən investisiyaların 17 milyard 23 milyon manatını və ya 80,2%-ini daxili investisiyalar təşkil edib. Əsas kapitala yönəldilən investisiyaların 16 min 18,3 milyon manatı və ya 75,5%-i bilavasitə tikinti-quraşdırma işlərinin yerinə yetirilməsinə sərf olunub.
Ümumən, sərmayə qoyuluşu niyə azalıb?
Sözügedən məsələyə aydınlıq gətirən sabiq maliyyə naziri, professor Fikrət Yusifov sərmayə qoyuluşunun azalmasını bir sıra amillərlə əlaqələndirdi: “Biz bu gün həm yerli və həm də xarici investisiyaların həcminin artması yolunda çox işlər görməliyik. Bu məsələdə xarici investisiyaların Azərbaycana gətirilməsi yolunda Azərbaycan prezidentinin ciddi səyləri ortadadır. Prezident Davos İqtisadi Forumunda keçirtdiyi görüşlər çərçivəsində bu məsələni önə çəkir. Keçən il Azərbaycan iqtisadiyyatında əldə olunan nəticələr o qədər də yüksək göstəricilərlə xarakterizə edilmədi. Lakin iqtisadiyyatda daha yaxşı nəticələr əldə etmək üçün potensialımız qonşu dövlətlərlə müqayisə edilməyəcək dərəcədə böyükdür. Baxın, bu gün Ermənistan və Gürcüstanın mövcud valyuta-qızıl ehtiyatları və dövlət büdcələrinin cəmi demək olar ki, Azərbaycanın dövlət büdcəsinin xərcləri ilə müqayisə edilə bilər. Və demək olar ki, haradasa ona yaxındır. Lakin dövlət büdcəsindən dolayı Azərbaycanın həm də 82 milyard dollara yaxın valyuta-qızıl ehtiyatları var. Yəni bu göstəricilərin cəmi bir tərəziyə qoyulduqda, ölkəmizin maliyyə imkanlarının bizə qonşu olan ölkələrin maliyyə imkanlarından 4 dəfəyə yaxın böyük olduğunu görə bilərik. Bax, biz bu potensialdan maksimum faydalanmağı bacarmalıyıq. Ölkə iqtisadiyyatının onurğa sütunu olan kiçik və orta biznesin ölkənin maliyyə imkanlarına əlçatanlığını təmin etməyin yollarını arayıb tapmalıyıq. Və təbi ki, daxildə yerli və xarici kapitalın yatırılmasına əngəl olan problemləri də qısa zaman kəsiyində aradan qaldırmalıyıq. O halda iqtisadiyyata bütün səviyyələrdən olan yatırımlar durmadan artacaqdır. İqtisadiyyat isə yatırımlar çoxaldıqca inkişaf edə bilir”.
Vidadi ORDAHALLI
