Firudin Xəlilov: "Bu qərar sosial sifarişə uyğun, qeyri-qanuni və nizamsız tikintilərin qarşısını almaq cəhdidir"
Əvvəllər bu limit 5 metr hündürlük və 100 kvadratmetr sahə olaraq müəyyən edilmişdi. Lakin son qanunvericilik dəyişiklikləri ilə hündürlük həddi bəzi kateqoriyalar üçün 3 metrə endirilmişdir.
Qeyd edək ki, tikintiyə icazə tələb olunmasa da, belə obyektlər şəhərsalma sənədlərinə (məsələn, qonşu sahə ilə ara məsafəsi) və tikinti normalarına uyğun inşa edilməlidir.
Bu dəyişiklik şəhərdə bəlkə də səmərəli olacaq, amma kənd yerlərində necədir? Belə tələblərin qüvvədə olması normaldırmı? Azərbaycanda icazə məsələsi tez-tez bir bəhanə kimi istifadə olunur. Bununla kənd yerlərində tikinti məsələsi çətinləşəcəkmi?
"Bakı-Xəbər" qəzetinə danışan daşınmaz əmlak eksperti Firudin Xəlilov bildirdi ki, burada məsələnin iki tərəfi var:
"Xatırlayırsınızsa, son vaxtlara qədər sosial narazılıq vardı ki, Bakı və Sumqayıt şəhərlərində evlər bir-birinin gözündə tikilirdi. Yasamal, Həzi Aslanov metrosu yaxınlığında və şəhərin bir çox yerlərində nəfəs almaq mümkün deyildi, hamı bir-birinin evinin içini görə bilirdi. 2020-ci ildə qərara alındı ki, əmsallar azaldılsın. Belə ki, Bakı şəhərində 1 hektar ərazidə 60 min kvadratmetr tikinti aparılırdısa, indi bu əmsal 22 min kvadrata endirilib. Hazırda əmlak qiymətlərində baş verən artımın birinci dərəcəli səbəbi budur.
Burada həmçinin sosial sifariş mövcuddur ki, evlər bir-birinə çox yaxın tikilməsin və məsafə problemi həll olunsun. İki tendensiya var: birincisi, icazələr getdikcə sərtləşir, ikincisi isə dövlət əsasən tikinti komplekslərinə icazə verməyə meyillidir, çünki burada planlı tikinti həyata keçirilir və ara məsafəsi nəzərə alınır."
Xəlilov əlavə etdi ki, eyni qaydalar kənd təsərrüfatı üçün də keçərlidir:
"Bir sel və ya daşqın hadisəsi zamanı diqqət bütünlükdə dövlətə yönəlirdi, çünki bu tikililərin nə standartı, nə də sığortası var idi. Dövlət xərclərdən qaçmaq üçün bütün daşınmaz əmlakı eyni standartlara gətirir, beləliklə sığortalanma mümkün olur və xərclər azalır. Bu standartlar həm əmlakın qeydiyyata alınmasına və sığortalanmasına şərait yaradır, həm də bəzi neqativ hallara yol aça bilər. Bəzi məmurlar fürsətdən istifadə edərək kənd sakinlərini incidə və süründürə bilər. Yaxşı olar ki, bu sahəyə nəzarət daha güclü olsun."
Nəticə olaraq, bu qərar sosial sifarişə uyğun, qeyri-qanuni və nizamsız tikintilərin qarşısını almaq cəhdidir. Lakin şəffaflıq təmin edilməzsə, bu, rüşvətxorluq və korrupsiyaya da yol aça bilər.
Akif NƏSİRLİ
