Fuad İbrahimov: “Xüsusən Gürcüstanla müqayisədə ölkəmizin biznes mühiti tamamilə sıxılmış vəziyyətdədir”
Dünya Bankı ölkələr üzrə özəl sektorun fəaliyyəti üçün yaradılan şəraitin keyfiyyətini qiymətləndirən “Business Ready 2025” (B-READY) hesabatını açıqlayıb. Azərbaycan ilk dəfə olaraq bu hesabatda yer alıb.
Bir sıra sütunlar çərçivəsində biznesə giriş, vergi sistemi, rəqabət mühiti, biznesin iflası ilə bağlı qaydaların şəffaflığı və digər bu kimi məsələlər üzrə sahibkarlıq mühiti qiymətləndirilib.
Hesabat üç əsas sütun üzrə qruplaşdırılan 10 mövzunu əhatə edir. Dünya Bankının qiymətləndirməsinə görə, Azərbaycanın biznes mühiti Gürcüstan və Ermənistandan daha aşağı səviyyədədir. Ölkəmiz özəl biznes sektorunda şəffaflıq, davamlılıq, bürokratik maneələr, tariflər və digər indikatorlar baxımından Gürcüstan və Ermənistandan geri qalır.
Sözügedən məsələni baki-xeber.com-a şərh edən iqtisadçı-ekspert Fuad İbrahimovun fikrincə, Azərbaycanda sadalanan problemlər mövcuddur: “Biznesə əngəllər də, maneələr də var. Dəfələrlə cənab Prezidentin çıxış etməsinə baxmayaraq, yenə də bu əngəllər davam edir. Ən azından, işdən azad edilən məmurların fəaliyyətinə nəzər saldıqda, aparılan həbslərə baxdıqda görürük ki, bu problem ortadan qaldırılmır. Xüsusən Gürcüstanla müqayisədə ölkəmizin biznes mühiti tamamilə sıxılmış vəziyyətdədir. Əsasən də istehsal sektoru üzrə. Hansısa işi başlamaq, onu başa çatdırmaq ümumiyyətlə, mümkün deyil. Bizdə bəzi qurumlar arasında sanki yarış gedir. Hamı istəyir ki, öz xeyrinə işləsin. Ölkədə biznesi qurmağa yaradılan maneələr çoxdur. Biri bir obyekt açanda ən azı bir neçə orqan buna mane olmağa çalışır. Ancaq müqayisə üçün qeyd edək ki, İsveçrədə, Belçikada kimsə fəaliyyətə başladıqda, dövlət orqanları özləri gəlib sənədləşməyə yardım edirlər. Nə sənəd lazımdırsa məmur özü gətirir ki, sahibkar vaxt itirib harasa getməsin. Əlavə iş yeri açan sahibkarlara faizsiz kreditlər verilir. Bizdə isə hər vasitə ilə sahibkarlar sıxılır. Düzdür, bizdə biznes mühiti ilə bağlı əvvəlki illərlə müqayisədə müsbət dəyişikliklər də var, amma neqativ hallar hələ də qalmaqdadır. Bir sıra qurumlar texniki şərtlər versələr də, bu sahələrdə şəffaflıq yoxdur. Bizdə bir sıra hallarda sahibkar min bir əziyyətlə kredit götürür, amma işi qura bilmir. Sonra götürülən krediti qaytarmaq problem olur. Əgər biznes sahəsində maneələr, problemlər aradan qaldırılmasa, bunun iqtisadiyyatda ciddi fəsadları olacaq”.
Vidadi ORDAHALLI
