Fikrət Yusifov: “Adam sanki Naxçıvana divan tutmaq üçün gəlmişdi”
2026-cı ildən etibarən dövlət büdcəsindən Naxçıvan Muxtar Respublikasına ayrılan dotasiyaların əhəmiyyətli dərəcədə azaldılması gözlənilir. Hətta 2025-ci il üçün nəzərdə tutulan dotasiyaların belə tam icra olunmaması ilə bağlı açıqlamalar var.
Hesablama Palatasının “Naxçıvan Muxtar Respublikasının 2026-cı il üzrə büdcə layihəsinə dair audit hesabatı”nda göstərilir ki, 2025-ci il üzrə Naxçıvan MR-ə ayrılan dotasiyanın təxminən 30 faiz ixtisarı gözlənilir. 2026-ci ilə gəlincə isə, MR-in cari ilin büdcə layihəsində dövlət büdcəsindən transfertlərin həcmi 211,6 mln manat müəyyən edilib. Bu məbləğ 2025-ci ilin təsdiq edilmiş dotasiya göstəricisindən 74,1 mln manat və ya 26 faiz azdır.
Naxçıvana ayrılan dotasiyanın həcminin azaldılması bilavasitə əvvəlki səlahiyyətli nümayəndə Fuad Nəcəflinin günahıdır. Problem ondadır ki, 2025-ci ildə o, Naxçıvana ayrılan dotasiyadan lazımı qədər istifadə etmədi. Ayrılan dotasiyanın böyük hissəsi xərclənmədiyinə görə, Maliyyə Nazirliyi də mərkəzi büdcədən Naxçıvana ayrılan dotasiyaların həcmini daha da azaltdı.
Sözügedən məsələ ilə bağlı fikirlərini bakı-xeber.com-la bölüşən sabiq maliyyə naziri, professor Fikrət Yusifov hesab edir ki, növbəti il üçün dövlət büdcəsindən aşağı büdcələrə ayrılan dotasiyanın həcmini müəyyənləşdirərkən diqqət mərkəzində olan əsas göstəricilərdən biri də cari il üçün ayrılmış dotasiyanın istifadə olunması səviyyəsidir: “Yəni bu il üçün ayrılmış dotasiya yerdə tam istifadə olunmayıbsa, bu o deməkdir ki, növbəti ilin büdcəsinə dotasiya ən azından cari il üçün ayrılan dotasiyanın faktiki icrası səviyyəsində ola bilər. Büdcə palanlaşdırılmasında belə bir qaydalar mövcuddur. 2025-cı il üçün Naxçıvana dövlət büdcəsinə ayrılmış dotasiya Muxtar Respublikaya rəhbərlik etmiş nümayəndənin səriştəsiz idarəçiliyi nəticəsində tam istifadə olunmayıb. Bunun nəticəsidir ki, növbəti 2026-cı il üçün Naxçıvana ayrılan dotasiyanın həcmi kəskin şəkildə azaldıldı. Naxçıvana ayrılan dotasiya ilə bağlı yaranmış neqativ durum Naxçıvana rəhbərlik etmiş nümayəndənin fəaliyyətindəki yeganə yaramazlıq deyil. Onun bacarıqsızlığı üzündən 2024-cü ildə Prezidentin Naxçıvanın Sosial İqtisadi İnkişafına dair Dövlət Proqramı çərçivəsində Muxtar Respublikaya ayrılmış 249 milyon manat vəsaitdən cəmi 1 milyon manat istifadə edilmişdi. Bu səbəbdən Prezident həmin vəsaitləri ilin sonuna doğru geri götürmək məcburiyyətində qaldı. Bu adam Naxçıvana rəhbərlik etdiyi dövrdə özündən əvvəlki rəhbər - Naxçıvan əhalisinə zülm etmiş Vasif Talıbovun atasına rəhmət oxutdurdu. Gördüyü əsas iş isə Naxçıvanda əxlaqsızlıq yuvaları açmaq oldu. Keçmiş rəhbərin ağılsız idarəçiliyi nəticəsində Naxçıvanda 10 minlərlə iş yerləri bağlandı. Adam sanki Naxçıvana divan tutmaq üçün gəlmişdi. Hesab edirəm ki, hüquq-mühafizə orqanlarımız onun Naxçıvana rəhbərlik etdiyi dövrdəki fəaliyyətini dərindən araşdırmalı və bu adam törətdiyi əməllərə görə hüquq müstəvisində cavab verməlidir. Naxçıvana yeni təyin olunmuş nümayəndənin fəaliyyəti haqqında hələ ki, ancaq yaxşı fikirlər eşidirik. Təki axıra qədər belə olsun!”.
Vidadi ORDAHALLI
