Ermənistan Azərbaycandan ümumi həcmi 7 600 ton olan neft məhsullarının idxalını gözləyir.Bunu Ermənistanın iqtisadiyyat naziri Gevork Papoyan sosial şəbəkələrdəki hesabında bildirib: “2026-cı il yanvar 8-nə olan məlumata görə, Azərbaycan ərazisindən dəmir yolu vasitəsilə Ermənistana artıq 8 485 ton Rusiya taxılı çatıb. 4 103 ton taxıl, həmçinin 7 600 ton Azərbaycan neft məhsulları - 6 100 ton benzin, 1 500 ton dizel yanacağı yoldadır. Yenilik odur ki, bu dəfə təkcə premium benzin deyil, həm də regular və dizel yanacağı da idxal olunur. Tədarük gələcəkdə davam edə bilər”.
Nazir əlavə edib ki, Azərbaycandan gətirilən benzin bir neçə gün ərzində satılıb, çünki bu yanacağa tələbat yüksəkdir. Onun sözlərinə görə, yeni yanacaq partiyasının qiyməti bazar qiymətindən 80 dram aşağıdır. O bildirib ki, eyni müəssisələr məhsulu ötən dəfəki kimi idxal edirlər: “İstəyən hər kəs sərbəst şəkildə idxal edə bilər, hər şey danışıqların gedişatından asılıdır”. Papoyan əlavə edib ki, dizel yanacağının 80 dram ucuz olması torpağın becərilməsində istifadə olunan traktorların xərclərini 20% azaldacaq. O xatırladıb ki, 2025-ci ildə Azərbaycan ərazisindən dəmir yolu ilə Ermənistana 6 580 ton taxıl gətirilib ki, bunun da 1 000 tonu Qazaxıstan, 5 580 tonu isə Rusiya mənşəlidir, həmçinin 1 210 ton Azərbaycan benzini də çatdırılıb. Nazir, həmçinin qeyd edib ki, Azərbaycan neft məhsullarının yeni partiyasının gəlməsi ilə əlaqədar Ermənistanda benzin qiymətlərinin aşağı düşməsi gözlənilir: “Artıq qeyd etdiyim kimi, benzin və dizel yanacağının qiymətlərinin əvvəlki ayın qiymətləri ilə müqayisədə litr üçün 80 drama (0,36 manat) qədər azalması gözlənilir. Məmnuniyyətlə bildirirəm ki, bu inkişafla əlaqədar olaraq, neft məhsullarının satışı ilə məşğul olan digər şirkətlər də qiymətlərin azaldılması üzərində işləyirlər”.
Ermənistanın baş naziri Nikol Paşinyan da bundan öncə qeyd edib ki, Ermənistan və Azərbaycan potensial ticarət üçün mal siyahılarını mübadilə üçün araşdırır: “Hazırda proseslər davam edir - Ermənistan və Azərbaycan satmaq və ya almaqda maraqlı ola biləcəkləri potensial mal siyahılarını mübadilə edir”. Hökumətin Azərbaycan benzinini kimin alacağını necə müəyyən etdiyinə dair şərhində Paşinyan bazarın əvvəlcədən araşdırıldığını və bu fürsəti siyasi oyuna çevirməyəcək iş adamlarına təklif verildiyini qeyd edib. Paşinyanın sözlərinə görə, Azərbaycan neft məhsullarının ilk partiyası Ermənistana daxil olarkən bəzi erməni pərakəndə satıcılar həmin benzinini satmaqdan imtina ediblər. Onun sözlərinə görə, bir neçə göndərişdən sonra bazarın və imkanların hər kəs üçün açıq olduğu aydın olacaq. Və istəyən hər kəs Azərbaycan benzinindən yararlana biləcək. Paşinyan ölkəsi ilə Azərbaycan arasında benzinlə yanaşı, digər malların ticarət imkanları barədə danışıb: “Hazırda proses gedir, Ermənistan və Azərbaycan potensial malların siyahısının mübadiləsini aparır, hansı məhsulu satmaq və hansını almaqla maraqlıdırlar - bunlar aydınlaşdırılır. Proses davam edir, yeni məlumatlar olduqda biləcəksiniz. Bilirəm ki, ilkin məhsul siyahıları üzrə dəyişikliklər edilib, hələ araşdırma prosesi davam edir”.
Ramil QULİYEV
