Fuad İbrahimov: “Fərmanda nəzərdə tutulan məqamlar dövrün tələbidir”
Prezident İlham Əliyev idxal-ixrac, tranzit, nəqliyyat və logistika üzrə fəaliyyətin rəqəmsallaşdırılması ilə bağlı əlavə tədbirlər haqqında fərman imzalayıb.
Fərmana əsasən, xarici ticarətin tənzimlənməsi sahəsində dövlət idarəetmə mexanizminin təkmilləşdirilməsi, dövlət orqanlarının (qurumlarının) fəaliyyətinin səmərəli şəkildə əlaqələndirilməsi, o cümlədən idxal-ixrac, tranzit, nəqliyyat və logistika əməliyyatları üzrə vahid giriş imkanı əsasında tam rəqəmsal mühitin yaradılması və yük axınlarının "ağıllı" idarə edilməsi sisteminin tətbiqi məqsədilə "Bir pəncərə" informasiya sistemi yaradılacaq.
Ümumilikdə bu sistem ticarətin sadələşməsində, bürokratik maneələrin aradan qaldırılmasında necə müsbət rol oynayacaq?
“Biz bunu etməsək, öhdəlikləri yerinə yetirə bilməyəcəyik və rəqabətdə uduzacağıq”
Sözügedən məsələni “Bakı-Xəbər”ə şərh edən iqtisadçı-ekspert Fuad İbrahimov fərmana bir neçə prizmadan yanaşdı: “Fərmanda nəzərdə tutulan məqamlar dövrün tələbidir. Bunların olması zəruridir. Söhbət logistika, nəqliyyat və tranzitdən gedirsə, belə qərarların verilməsi zəruridir. Yükaşırma qabiliyyətinin elastikliyini artırmaqdan ötrü mütləq şəkildə sərhəd-keçid məntəqələrində gömrük qeydiyyatı prosedurları çox sürətli olmalıdır. Nəzərə almaq lazımdır ki, Çinlə Avropa arasında ticarət gündən-günə artır. Trilyon dollardan çox həcmi olan ticarət dövriyyəsinə bu gün sərhədlərdə maneələr, əngəllər olsa, vaxt itirmək kimi məsələlər olsa, o zaman yükaşırma qabiliyyətimizi artıra bilmərik. Əsas odur ki, məhz tranzit yüklərin keçidində avtomatlaşdırılmış idarəetmə sistemi olsun. İnsan faktorunun mövcudluğu minimum səviyyədə olsun. Burada görünməyən məqamlar var. Bir neçə dövlət orqanının avtomatik sürətdə bəyannamələrinin, qeydiyyatlarının aparılması prosedurunun elektronlaşması vacibdir. Söhbət bütün bu işlərin təmassız həyata keçirilməsindən gedir. Bu göstəricilərin hamısı müasir dövrün tələbidir. Məsələn, sərhədə qatar, avtomobil yaxınlaşdıqda artıq onun bütün göstəriciləri sistemdə oxunur. Bu zaman hər hansı vaxt itkisinə yol verilmir və tranzit yüklərin sürətlə daşınması təmin edilir. Güman edirəm, imzalanan fərmanda məqsəd budur. Hesab edirəm ki, fərmandan irəli gələn tələbləri həyata keçirə bilərik. Çünki bu istiqamətdə kifayət qədər maddi-texniki təchizat bazamız, maliyyə dayanıqlığımız var. Yəni bütün bunlar müəyyən investisiya, kapital qoyuluşu tələb edir ki, belə bir sistem tətbiq edilsin. Ən başlıcası isə, bu, günün tələbidir. Biz bunu etməsək, öhdəlikləri yerinə yetirə bilməyəcəyik. Bu gün bizim məsuliyyətimiz, öhdəliyimiz elastik, cazibədar bir tranzit nəqliyyat sistemi qurmaqdır. Əks təqdirdə rəqabətdə uduzacağıq. Ona görə də fərmandan irəli gələn bütün məsələlər həll edilməlidir”.
Vidadi ORDAHALLI
