Osman Gündüz: “Rəqəmsallaşma ölkə iqtisadiyyatında xeyli dərəcədə hissolunan nəticələr verə biləcək”
Məlum olduğu kimi, Rəqəmsal iqtisadiyyatın inkişafına dair 2026–2029-cu illər üçün Strategiya təsdiq edilib. Bununla bağlı Prezident İlham Əliyev Sərəncam imzalayıb.
Sərəncama əsasən, 2029-cu ilə qədər Azərbaycanda rəqəmsal transformasiya proqramlarında iştirak edən müəssisələrin sayının 300-ə çatdırılması gözlənilir. Qeyd edək ki, rəqəmsal transformasiya proqramlarında iştirak edən müəssisələrin sayı 2026-cı ildə 50, 2027-ci ildə 100, 2028-ci ildə isə 180 olmalıdır. Həmçinin rəqəmsal transformasiyadan keçmiş müəssisələrdə EBİTDA artımı 2026-cı ildə 7 milyon manat, 2027-ci ildə 17 milyon manat, 2028-ci ildə 33 milyon manat, 2029-cu ildə isə 58 milyon manat təşkil etməlidir.
“Rəqəmsallaşma artıq ayrı-ayrı İT layihələri deyil, birbaşa məhsuldarlıq, ixrac və əlavə dəyər yaradan iqtisadi proses kimi nəzərdən keçirilir”
Azərbaycan İnternet Forumunun Prezidenti, ekspert Osman Gündüz “Bakı-Xəbər”ə şərhində bildirdi ki, Prezident İlham Əliyevin Sərəncamı ilə “Azərbaycan Respublikasında rəqəmsal iqtisadiyyatın inkişafına dair 2026–2029-cu illər üçün Strategiya” qəbul edilib: “Strategiyada təxminən 52 tədbir, o cümlədən 8 əsas tədbir nəzərdə tutulub ki, bunların böyük hissəsi proqramların qəbulu, yeni mərkəzlərin yaradılması, platforma və mexanizmlərin formalaşdırılması kimi real, ölçülə bilən, konkret rəqəmlər qeyd olunan tədbirlərdən ibarətdir. Startapların, startap ekosistemin inkişafına xeyli yer ayrılıb, konkret tədbirlər nəzərdə tutulub. Sənəddə Rəqəmsal İqtisadiyyatın İnkişafına Dəstək Proqramı, Yeni Nəsil Texnologiyalar Mərkəzinin yaradılması, startaplar üçün sandbox mexanizmləri, data əsaslı qərarvermə sistemləri, rəqəmsal bacarıqlar və KOB-ların transformasiyası üzrə konkret addımlar yer alır. Bu o deməkdir ki, rəqəmsallaşma artıq ayrı-ayrı İT layihələri deyil, birbaşa məhsuldarlıq, ixrac və əlavə dəyər yaradan iqtisadi proses kimi nəzərdən keçirilir. Bu strategiyanın əsas üstünlüklərindən biri də odur ki, dövlət burada yalnız tənzimləyici rolunda çıxış etmir, özəl sektor, startaplar və real iqtisadiyyat üçün bazar formalaşdıran aktora çevrilir. Rəqəmsal həllərin tətbiqi biznes üçün real stimullarla – maliyyə, platforma və infrastruktur dəstəyi ilə müşayiət olunur”.
Ekspert hesab edir ki, strategiyada əsas yük və cavabdehlik İqtisadiyyat Nazirliyinin üzərindədir – 52 təşəbbüsün böyük hissəsi və 8 əsas təşəbbüs birbaşa bu qurumun icrasına bağlıdır: “Digər əsas icraçılar isə RİNN və ETN-dir. Eyni zamanda təxminən 15 mərkəzi icra qurumu da bu prosesdə iştirak edəcək. Əsas məsələ indi bu 52 tədbirin və 8 əsas təşəbbüsün formal yox, real icra olunmasıdır. Sənəddə nəzərdə tutulanlar maraqlı tərəfləri cəlb etməklə düzgün icra edilərsə, normal koordinasiya olarsa, hesabatlılıq və şəffaflıq təmin olunarsa rəqəmsallaşma ölkə iqtisadiyyatında xeyli dərəcədə hissolunan nəticələr verə biləcək".
Günel CƏLİLOVA
