Fikrət Yusifov: “Azərbaycan son illər ərzində bir çox ölkələrlə yüksək əməkdaşlıq münasibətləri yarada bilib”
Azərbaycan və Slovakiya arasında münasibətlər dostluq, əməkdaşlıq və qardaşlıq ruhunda inkişaf edir. İki ölkə arasındakı bu münasibət iqtisadi əməkdaşlıq sahələrində güclənərək son illərdə daha da inkişaf edib.
Məlumat üçün bildirək ki, Azərbaycanla Slovakiya arasında diplomatik münasibətlər 23 noyabr 1993-cü ildə qurulub. İkitərəfli münasibətlərin genişlənməsində Azərbaycan Prezidenti İlham Əliyevin Slovakiya Respublikasına səfəri böyük rol oynayır. Səfər çərçivəsində Prezident İlham Əliyev bir sıra beynəlxalq təşkilatların və xarici ölkələrin rəhbər şəxsləri ilə görüşlər keçirib.
Azərbaycan və Slovakiya arasında iqtisadi münasibətlər energetika, ticarət, texnologiya və turizm kimi sahələrdə genişlənməkdədir. İki ölkə arasında münasibətlərin inkişafı qarşılıqlı investisiya yatırmağa səbəb olur.
“İqtisadi müstəvidə əməkdaşlığın ən maraqlı hissəsi ölkələr arasında qarşılıqlı investisiya yatırımlarıdır”
İqtisad elmləri doktoru, professor Fikrət Yusifov “Bakı-Xəbər”ə açıqlamasında qeyd etdi ki, Azərbaycan son illər ərzində bir çox ölkələrlə yüksək əməkdaşlıq münasibətləri yarada bilib. Bu münasibətlərin kökündə iqtisadi sahədə əməkdaşlıq xüsusi yer tutur: “İqtisadi müstəvidə əməkdaşlığın ən maraqlı hissəsi ölkələr arasında qarşılıqlı investisiya yatırımlarıdır. Bu dediklərimizə dair bir çox nümunələr göstərmək mümkündür. Birləşmiş Ərəb Əmirlikləri (BƏƏ) ilə Azərbaycan arasında dostluq və əməkdaşlığın getdikcə dərinləşməsi fonunda son illər ərzində bu ölkə Azərbaycanın energetika sektoruna çox böyük yatırımlar edir. Yaxın gələcəkdə BƏƏ-nin yaşıl enerji istehsalı ilə bağlı Azərbaycana daha böyük yatrımları olacaq.
Azərbaycan iqtisadiyyatının və xüsusilə onun real sektorunun bu gün investisiya yatırımlarına çox böyük ehtiyacı var. Təbii ki, bu sırada xarici kapitalın yeri xüsusi olmalıdır. Hesab edirəm ki, hökumət diplomatik müstəvidə qazandığımız uğurların verdiyi siyasi dividendlərdən xarici investisiyaların cəlb edilməsi üçün məharətlə istifadə etməlidir”.
Günel CƏLİLOVA
