Əkrəm Həsənov: "Banklardan depozitin geri alınması halı zamanla müşahidə olunur"
Bu günlərdə bir neçə bank depozitlərinin azalması ilə bağlı məlumatlar yayıb. "Azəri-Türk Bank"-ın məlumatında deyilir ki, hesabat dövründə fiziki şəxslərin depozitləri ilin əvvəlinə nisbətən 3,4 % və ya 7 milyon 224 min manat azalaraq 207 milyon 208 min manat olub.
"Azərbaycan Sənaye Bankı"nın (ASB) depozit portfeli 2024-cü ilin III rübündə 14 milyon manatdan çox azalıb. Əhalinin bankdakı müddətli əmanətləri 4,89 milyon manat azalaraq 293,4 milyon manatdan 288,5 milyon manata enib. Bu dövrdə əhali 4,99 milyon manat depozitini geri çəkib. "Xalq Bank"ın depozit portfeli 240 milyon manatdan çox azalıb.
Bir qisim ekspertlər banklardan depozitin geri çəkilməsini devalvasiya olma ehtimalı ilə əlaqələndirir.
Maraqlıdır, banklardan depozitin geri çəkilməsinə səbəb nədir? Bank sektorunda nə baş verir?
"Digər banklar daha sərfəli şərtlərlə əmanət qəbul etdiyi üçün həmin bankların əmanətçiləri depoziti ora qoymağa üstünlük verir"
Bank sahəsi üzrə ekspert Əkrəm Həsənov "Bakı-Xəbər"ə şərhində bildirdi ki, bəzi banklarda əmanətlərin geri çəkilməsi müşahidə olunur. Ancaq bu hal bütün banklara şamil edilməməlidir: "Ümumiyyətlə, banklardan depozitin geri alınması halı zamanla müşahidə olunur. Əsasən müştərilər əmanətlərini bir bankdan götürüb, digər banka yatırırlar. Bu da əmanətlərə tətbiq edilən faizlə bağlıdır. Ola bilsin ki, digər banklar daha sərfəli şərtlərlə əmanət qəbul etdiyi üçün həmin bankların əmanətçiləri depoziti ora qoymağa üstünlük verir".
Həmsöhbətimiz onu da əlavə etdi ki, Azərbaycanda insanlarımız banklara etimad etməsələr də, əmanətlərin sığortalanması mövcuddur: "Yəni bir nəfərin 100 minə qədər olan əmanəti bankda sığortalanır. Vətəndaşlar etimad etsələr də, etməsələr də, bu sığortalanma mövcuddur. Sahibkarlar və şirkətlərə gəldikdə isə, onlar daha çox iri banklara üstünlük verirlər. Çünki qorxurlar ki, kiçik banklar bağlandığı təqdirdə onların ləğv prosesini Əmanətlərin Sığortalanması Fondu həyata keçirir və bu proses kifayət qədər qeyri-şəffaf və qanun pozuntuları ilə baş verir. Belə olan halda da sahibkarların və şirkətlərin pulları banklarda "batır". Ona görə də şirkətlər çalışır ki, pullarını daha etibarlı yerlərdə yerləşdirsin".
Günel CƏLİLOVA
