“Birləşmiş Krallıqdan Azərbaycana 30 milyard dollardan çox investisiya yatırılıb”. Bunu Prezidenti İlham Əliyev Böyük Britaniyanın ixracat naziri Qraham Styuartı qəbul edərkən deyib.
Ölkə başçısının sözlərinə görə, bu rəqəm həqiqətən də çoxdur: “Sizin səfəriniz planlarımızın icrasında və yeni tədbirlərin planlaşdırılmasında çox önəmli bir addım olacaqdır. Əlbəttə ki, səfər uğurla inkişaf edən ikitərəfli əlaqələrimizi hətta daha da gücləndirəcəkdir. Bütün bunlar çox fəal siyasi dialoqu və iqtisadi sahədə böyük perspektivləri nümayiş etdirir. Sizin Azərbaycana gəlişinizdən əvvəl məlumatlara nəzər saldım və gördüm ki, Birləşmiş Krallıqdan Azərbaycana 30 milyard dollardan çox investisiya yatırılıb. Bu, həqiqətən də çoxdur. Bu, bizim inkişafımıza kömək edib. Bu, bizə nəinki təkcə neft və qaz sənayesini inkişaf etdirməyə kömək edir, eyni zamanda, ümumi inkişafımıza kömək edir. Çünki bu investisiya bizim büdcəmizə daxil olan və qeyri-neft sahələrinə təkrar investisiya kimi yatırdığımız gəlirlərə gətirib çıxarmışdır. Bu gün əməkdaşlıq çox fəal şəkildə davam edir. BP 30 il ərzində və ən azından bundan sonra da 30 il ərzində bizim strateji tərəfdaşımızdır, çünki yeni perspektivlər var, yeni müqavilələr imzalanıb”.
Görünən odur ki, BP-nin Azərbaycanın neft sektoruna yatırdığı investisiyalar ölkənin ümumi iqtisadi inkişafında vacib rol oynayıb. Çünki neftdən əldə edilən gəlirlər qeyri-neft sektorunun inkişafına yönəldilir. Bəlli olur ki, bundan sonra da BP Azərbaycana sərmayə qoyuluşunu davam etdirəcək.
“Yaşıl enerji, yeni texnologiyalar üzərində qurulan sahələrin inkişafı, innovasiya xarakterli tədbirlər vacib əhəmiyyət kəsb edir”
Məsələyə münasibət bildirən iqtisadçı-alim, professor Əli Əlirzayevin sözlərinə görə, İngiltərənin bundan sonra da investisiya qoyuluşunda aktiv iştirakı Azərbaycan iqtisadiyyatının inkişafında təkanverici rol oynayacaq: “Məlum olduğu kimi, 90-cı illərdə postsovet ölkələrinin, o cümlədən, Azərbaycan iqtisadiyyatının durumu çox pis idi. Əvvəlki iqtisadi əlaqələr pozulmuşdu və çox çətin bir vəziyyət yaranmışdı. 1994-cü ilin sentyabrında xarici neft şirkətləri ilə saziş imzalandı. O vaxt əsas paya malik olan şirkər BP idi. Neft kontraktları sayasəndə Azərbaycana milyonlarla dollar bonus verildi. Bununla yanaşı, neft sektoruna qoyulan sərmayələr iqtisadiyyatın yan sahələrinin inkişafına müsbət təsir etdi. Neft gəlirləri ölkəyə daxil olandan sonra digər sahələrin inkişafı üçün geniş maliyyə imkanları yarandı. Böyük Britaniya əsasən neft-qaz sektoruna sərmayə qoysa da, hazırda digər sahələrə də investisiya qoymaq üçün yeni imkanlar yaranır. Müasir şəraitdə Azərbaycan üçün daha prioritet istiqamətlərdən biri də qeyri-neft sektoruna xarici sərmayə cəlb etməkdir. O cümlədən, işğaldan azad edilən ərazilərə xarici kapital qoyuluşunu yönəltmək. Burada da yeni prioritetlər və hədəflər meydana çıxır. O cümlədən, yaşıl enerji, yeni texnologiyalar üzərində qurulan sahələrin inkişafı, innovasiya xarakterli tədbirlər vacib əhəmiyyət kəsb edir. Kommunikasiya, informasiya əlaqələrinin qurulması, logistik mərkəzlərin yaradılması başlıca məsələlərdən biridir. Bunların hamısı elmi-texniki tərəqqinin bilavasitə əsas istiqamətləridir. Sözügedən sahələrdə Britaniya şirkətlərinin böyük təcrübəsi var. Fikrimcə, bundan sonra İngiltərə şirkətlərinin sözügedən sahələrə qoyduqları sərmayələr daha səmərəli ola bilər. Görünən odur ki, bundan sonra Britaniya təkcə neft-qaz sahəsində yox, qeyri-neft sektorunda da böyük layihələr həyata keçirməkdə qərarlıdır. İki ölkə arasında oturuşmuş əlaqələr və Azərbaycanın çoxşaxəli potensialı bunu deməyə tam əsas verir”.
Professor onu da qeyd etdi ki, bu həm iqtisadiyyatın dayanıqlı inkişafını təmin edəcək, həm də azad olunan rayonların bərpasına töhfə verəcək.
Vidadi ORDAHALLI
