Dünya Bankının region üzrə yeni hesabatı dərc olunub. Hesabatda Azərbaycandakı iqtisadi inkişafla bağlı proqnozlar öz əksini tapıb. Belə ki, Dünya Bankının yeni proqnozuna əsasən, son dörd ildə ilk dəfə olaraq, 2021-ci ildə Azərbaycanın xaricdən cəlb etdiyi birbaşa investisiyaların həcmi ölkənin xaricə birbaşa investisiya qoyuluşunu üstələyəcək.
Sözügedən məsələ ilə bağlı yeni hesabatda qeyd olunub ki, 2021-ci ildə Azərbaycanın xalis birbaşa investisiya balansı profisitli olacaq (yəni xaricdən cəlb etdiyi birbaşa investisiyalar göndərdiyi birbaşa investisiyaları üstələyəcək) və ÜDM-in 1,3 faizini təşkil edəcək. 2022-ci ildə bu göstəricinin ÜDM-in 1,2 faizinə, 2023-cü ildə isə 1,1 faizinə bərabər olacağı proqnozlaşdırılır.
Neçə müddət idi ki, Azərbaycanın xaricə qoyduğu sərmayələrin həcmi ölkəyə cəlb edilən investisiyaların həcmini üstələyirdi. Belə görünür ki, bu ildən başlayaraq sözügedən sahədə vəziyyət fərqli olacaq. O baxımdan bunu ekspertlər necə dəyərləndirirlər?
“Bütün bunlar onu deməyə əsas verir ki, Azərbaycana xarici sərmayə qoyuluşu daha da artacaq”
Məsələyə münasibət bildirən iqtisadçı-ekspert Fuad İbrahimov belə vəziyyətin yaranmasına müsbət prizmadan yanaşdı: “Əvvəla xarici investisiyaların cəlb edilməsi hər bir ölkə üçün prioritet hesab olunur. Xarici sərmayələrin cəlbi üçün nə qədər cazibədar şərait yaransa, bu bir o qədər iqtisadi inkişafa təkan verəcək. Eyni zamanda, beynəlxalq miqyasda nüfuz qazanmaqdan ötrü ölkənin özünün də investora çevrilməsi vacib əhəmiyyət kəsb edən məqamdır. Azərbaycan siyasəti elə bir müstəvidə qurulub ki, ölkənin investisiyalarla bağlı qanunvericiliyi mükəmməl formalaşıb. Biz bir dövlət olaraq beynəlxalq inteqrasiya ilə bağlı sağlam əsaslar yaratmışıq. Yəni investisiya cazibədarlığını yaratdıq və ilk böyük şah əsərimiz olaan karbohidrogen ehtiyatlarımızı iqtisadi dövriyyəyə cəlb edə bildik. Bu da, ən başlıcası, xarici investisiyaların birbaşa cəlb olunması hesabına mümkün oldu. Nəhayət, illər keçəndən sonra Azərbaycan artıq növbəti statusa qədəm qoydu. Yəni investisiya cəlb edən ölkədən sərmayə qoyan ölkəyə çevrildi. SOCAR-ın timsalında bu yöndə fəaliyyət başladı. Azərbaycan bu iki göstərici arasında balansı ustalıqla qoruyur. Həm sərmayə qoyan tərəfdir, həm də bunu qəbul edən tərəf. Bütün bunların hesabına bizim makroiqtisadi tarazlığımız qorunub saxlanır. Dörd ildən sonra Azərbaycana yatırılan xarici investisiyanın artmağa doğru getməsi təsadüfi deyil. Uğurlu Vətən müharibəsi yeni imkanlar yaradıb. Xarici şirkətlər azad olunan ərazilərin potensialının fərqində olduqlarına görə sərmayə qoymaqda maraqlıdırlar. Dünya Bankının proqnozu bu amilə söykənir. Bütün bunlar onu deməyə əsas verir ki, Azərbaycana xarici sərmayə qoyuluşu daha da artacaq”.
İqtisadçı hesab edir ki, bütün bunlar iqtisadi inkişafa təkan verəcək.
Vidadi ORDAHALLI
