Kənd təsərrüfatı məhsulu istehsalının subsidiyalaşdırılması qaydasının pozulmasına görə cərimə müəyyənləşdirilir. İnzibati Xətalar Məcəlləsinə bununla bağlı yeni - 411-2 maddəsinin əlavə edilməsi təklif olunur.
Layihəyə əsasən, fermer tərəfindən “elektron kənd təsərrüfatı” informasiya sisteminə bilərəkdən yanlış məlumat daxil edilməklə subsidiya alınmasına, yaxud hesablarına köçürülən subsidiya məbləğindən təyinatı üzrə istifadə edilməməsinə görə xəbərdarlıq edilir və ya inzibati xəta nəticəsində vurulmuş ziyanın (əldə edilmiş gəlirin) 2 mislindən 4 mislinədək miqdarda cərimə tətbiq olunması nəzərdə tutulur.
Beləliklə, yeni qaydaya əsasən, subsidiyalardan təyinatı üzrə istifadə etməyən fermerlər cərimələnəcəklər.
Danılmaz faktdır ki, bəzən fermerlər əkmədikləri sahələrə görə dövlətdən subsidiya almağa cəhd edir və ya alınan subsidiyanı təyinatı üzrə istifadə etmirlər.
Aqil Məmmədov: “Bəzən fermer tərəfindən "elektron kənd təsərrüfatı" informasiya sisteminə bilərəkdən yanlış məlumat daxil edilir, nəticədə fermer əkmədiyi sahələrə görə də subsidiya almağa cəhd göstərir”
Məsələ ilə bağlı fikir bildirən millət vəkili Aqil Məmmədovun sözlərinə görə, bəzən fermer tərəfindən "elektron kənd təsərrüfatı" informasiya sisteminə bilərəkdən yanlış məlumat daxil edilir. Nəticədə fermer əkmədiyi sahələrə görə də subsidiya almağa cəhd göstərir: “Fermer sistemə bilərəkdən səhv məlumat daxil edərsə, bu zaman o, əldə etdiyi subsidiyanın 2 mislindən 4 mislinə qədər cərimə ödəyəcək”.
Millət vəkili onu da vurğuladı ki, qanuna əlavənin edilməsinin məqsədi xoşagəlməz halların qarşısını almaq və kənd təsərrüfatı sahələrinin inkişafını stimullaşdırmaqdır: “Məlumdur ki, əkin sahələrinə nəzarət günü-gündən gücləndirilir. Fermerlərin bilərəkdən yanlış məlumat daxil etmək şansları xüsusi texniki vasitələrlə minimuma endirilir”.
Fikrət Yusifov: “Subsidiyaların təyinatı üzrə istifadə olunmasına ciddi nəzarət edilməlidir”
İqtisadçı-ekspert Fikrət Yusifov bildirdi ki, aqrar sektorun subsidiyalaşdırılması çox önəmli məsələdir. Məsələ ondadır ki, Azərbaycan aqrar ölkədir. Bir sıra məhsulların istehsalı üçün ölkədə əlverişli iqlim mövcuddur. Bu səbəbdən də aqrar sektorun inkişafı üçün çox böyük perspektivlər və ehtiyatlar var: “Ona görə də dövlətimiz ölkə iqtisadiyyatının neftdən asılılığını minimuma endirmək üçün qeyri-neft sektorunun aparıcı sahələrindən olan aqrar sektora xüsusi önəm verir. Nəticədə kənd təsərrüfatına verilən dövlət dəstəyi ilbəil artır. Subsidiyaların artırılması dövlətin aqrar sektora olan münasibətindən irəli gəlir. Məqsəd bu sahənin daha dinamik inkişafını təmin etməkdir. Bundan əvvəlki dönəmlərdə subsidiyaların verilməsində çox böyük pozuntular aşkarlanmışdı. Mexanizmlər nə qədər təkmillləşdirilsə də, nəzarət tədbirləri də bir o qədər artırılmalıdır. Subsidiyaların təyinatı üzrə istifadə olunmasına ciddi nəzarət edilməlidir. İşbazlar həmin vəsaitləri mənimsəmək üçün mütləq yeni yollar axtaracaqlar”.
Günel CƏLİLOVA
