Azərbaycan iqtisadiyyatında şəffaflığın artırılması istiqamətində iqtisadi artımın və investisiyaların maliyyə mənbələrinin genişləndirilməsi məqsədilə ölkədə kapitalın və əmlakın amnistiyası nəzərdən keçirilir.
Bu barədə Nazirlər Kabinetinin 2020-ci ildəki fəaliyyətinin yekunları ilə bağlı hesabatda bildirilir. Hesabatda o da qeyd edilir ki, iqtisadi artımın və investisiyaların maliyyə mənbələrinin genişləndirilməsi baxımından ölkədə kapital və əmlakın amnistiyasının nəzərdən keçirilməsi məqsədilə kapital və əmlak amnistiyası ilə bağlı digər ölkələrin təcrübəsi araşdırılmış və bu sahədə beynəlxalq standartlar və kapital amnistiyası tətbiq edən ölkələrə dair tələblər təhlil olunub, mövcud prosedura uyğun olaraq, üzvü olduğumuz Avropa Şurasının MONEYVAL Komitəsinin katibliyi Azərbaycanda kapital amnistiyasının tətbiqi prosedurlarına başlanması barədə məlumatlandırılıb və hazırda bununla bağlı hazırlanmış layihələr üzərində iş aparılır.
Maraqlıdır, əmlak və kapital amnistiyasının tətbiq olunmasının ölkənin iqtisadi sferasına nə kimi əhəmiyyəti olacaq?
“...xüsusən də dövlət məmurları öz gəlir və xərclərini bəyan etməlidirlər”
Məsələ ilə bağlı fikir bildirən iqtisadçı-ekspert Əkrəm Həsənov qeyd etdi ki, əmlak amnistiyasının verilməsi üçün xüsusi qanun qəbul edilməlidir: "Orada şərt qoyulur ki, kimin nə qədər daşınar və daşınmaz əmlakı, pulu varsa, onu bəyan etsin. Bəyan edəndə onun müəyyən bir hissəsini, tutaq ki, 10%-ni vergi versin. Qalanını isə dövlət həmin vətəndaşın əmlakı kimi tanıyır, sənədləşdirir. Bundan sonra artıq heç vaxt həmin şəxs ona məxsus olan əmlakı, maliyyə vəsaitlərini necə əldə etməsi barədə sorğu-sual edilməyəcək. Yəni, faktiki olaraq, dövlət kimin hansı yolla pul qazanmasına göz yumur. Buna qədər nə baş veribsə, kim necə qazanıbsa, bağışlanır, amma bundan sonra belə olmayacaq”.
Həmsöhbətimiz onu da əlavə etdi ki, qeyd olunan qanun qəbul edildikdən sonra hamı, xüsusən də dövlət məmurları öz gəlir və xərclərini bəyan etməlidirlər. Əks halda, suallarla qarşılaşa bilərlər: “Yəni əmlak amnistiyasından sonra kimsə öz gəlirlərini və ya əmlakını gizlədə bilməz. Sonradan müəyyən olunar ki, filankəsin əynindəki kostyumun 50 min manat qiyməti var və ya çox bahalı maşın istifadə edir. O zaman ondan soruşacaqlar ki, bu qədər pul haradandır? Məhz əmlakını bəyan etmədiyinə görə məsuliyyət daşıyacaq. Həmin şəxs əvvəlcədən əmlakını bəyan edərsə, o zaman sorğu-sual olunmayacaq. Çünki hökumət artıq onun nə qədər əmlakının olduğunu biləcək”.
Həmsöhbətimiz hesab edir ki, əmlak amnistiyası həm dövlətə, həm də vətəndaşlara faydalı olacaq: “Azərbaycanda yerli sərmayəçilər öz əmlaklarını, maliyyə vəsaitlərini iqtisadiyyata yatırmaqdan qorxurlar. Onlara amnistiya verilərsə, həmin aktivlər ölkə iqtisadiyyatının inkişafına sərf oluna bilər. Əmlak amnistiyası iqtisadiyyatın inkişafına təkan verəcək”.
Günel CƏLİLOVA
