Azərbaycanda “Əmanətlərin sığortalanması haqqında” Qanuna dəyişiklik təklif edilir. Dəyişikliyə əsasən, qüvvədə olma müddətinin 2021-ci ilin aprelin 5-nə qədər artırılması nəzərdə tutulan “Əmanətlərin tam sığortalanması haqqında” Qanun qüvvədən düşdükdən sonra əmanətlərin sığortalanması üzrə kompensasiya məbləği 30 min manatdan 100 min manata qaldırılacaq.
Qeyd edək ki, ölkəmizdə 2016-cı ilin martından tətbiq olunan əmanətlərin tam sığortalanması qlobal iqtisadiyyatda baş verən proseslər fonunda ölkədə maliyyə sabitliyinin qorunmasında, bank sistemində sabitliyin tam təmin edilməsində, əmanətçilərin bank sisteminə etibarının artırılmasında mühüm rol oynayıb.
Onu da vurğulayaq ki, 4 il 9 ay ərzində qüvvədə olan bu qanunun müddəti iki dəfə uzadılıb, sonuncu müddət cari ilin dekabrın 4-də başa çatıb.
Maraqlıdır, sığortalanan əmanətlərin məbləğinin 30 mindən 100 minə qaldırılması bank sektoruna necə təsir edəcək?
İqtisadçı-ekspert Rövşən Ağayev bildirdi ki, əmanətlərin sığortalanması ilə bağlı qanunvericiliyə dəyişikliklərin müzakirəsində maraqlı rəqəmlər səsləndirilib. Bütün əmanətlərin 3.4 milyard manatı və ya 44 faizi 100 min manatdan yuxarı əmanət hesablarındadır. Bu hesablar bütün əmanət məcmu hesablarının təxminən 1 faizidir.
İqtisadçının sözlərinə görə, əmanətlərin yerdə qalan 56 faizi (4.4 milyard manat) və ya bütün əmanət hesablarının 99 faizi isə 100 min manatdan aşağı məbləğlərdir: “Sərvət bölgüsü və təmərküzləşməsilə bağlı araşdırmalarda bu göstərici ən mühüm məlumat mənbələrindən biri hesab edilir. Bütün əmanətlərin 1 və 99 faizi əmanət hesabları arasında bölgüdə ümumi mənzərəni təsəvvür etməyə yardım edir. Şübhəsiz ki, leqal saxlanan maliyyə sərvətləri ev təsərrüfatlarının məcmu maliyyə sərvtələrinin hamısı deyil, amma ümumi vəziyyət haqda informasiya təqdim edir”.
Günel CƏLİLOVA
