“S&P Global Ratings” agentliyi Azərbaycan bankları ilə bağlı proqnoz açıqlayıb. Hesabatda qeyd olunur ki, bu il noyabrın 1-nə Azərbaycandakı kommersiya banklarının iqtisadiyyata tələbi 15 302,4 mln. manat və ya ÜDM-in 26,2%-ni təşkil edib ki, bu da həcm ifadəsində aylıq müqayisədə 2,4% çoxdur.
Qeyd edək ki, "S&P Global Ratings" agentliyinin son proqnozuna əsasən, bu il Azərbaycanda kommersiya banklarının iqtisadiyyata tələbinin ÜDM-ə nisbəti 21,6% təşkil edəcək, lakin növbəti 3 ildə ÜDM-də payı tədricən azalaraq, müvafiq olaraq 20,3%, 20,1% və 19,6%-ə bərabər olacaq.
Beynəlxalq agentliyin hesabatına əsasən, 2021-ci il dünyada və Azərbaycanda banklar üçün ağır, çətin il olacaq.
"S&P" mütəxəssisləri bildirirlər ki, aşağı neft qiymətləri Azərbaycanın iqtisadi inkişaf perspektivlərini daha da çətinləşdirir və bu da, öz növbəsində, potensial valyuta ucuzlaşmasına qarşı yüksək həssaslıqla birlikdə bank sektorunu yüksək iqtisadi tarazsızlıqlara məruz qoyur və aktivlərin keyfiyyətinə təzyiqi artırır. Açıqlamada deyilir ki, bəzi banklar öz xərclərini çətinliklə ödəyəcək və bu ili çətinliklə itkisiz başa vuracaq. Səbəb olaraq, problemli kreditlərin ikiqat artacağı və gəlirliliyin azalacağı göstərilir.
“...gələn il devalvasiya istisna deyil”
Məsələ ilə bağlı fikir bildirən bank məsələləri üzrə ekspert Əkrəm Həsənov bildirdi ki, "S&P Global Ratings" agentliyinin hesabatına əsasən, 2021-ci il Azərbaycanın bank sektoru üçün çətin il olacaq: “Bu il dünyada və Azərbaycanda banklar üçün ağır, çətin ildir. Çünki problemli kreditlər dünyada hər yerdə artır və bunun əsas səbəbi pandemiyadır. Pandemiya dövründə insanların bir qismi banklarda olan əmanətlərini çıxarır və bizdə də bu müşahidə edilir”.
Həmsöhbətimiz hesab edir ki, pandemiya, müharibə, işğaldan azad edilmiş ərazilərin bərpası və s. ilə bağlı xeyli vəsait gedib və gedəcək: “Təbii ki, dövlət büdcəsində bunun üçün vəsait nəzərdə tutulmayıb. Bunun üçün Neft Fondunun valyuta ehtiyatlarından istifadə ediləcək. Valyuta ehtiyatları azalan kimi manata təzyiq artır, yəni manatın məzənnəsini saxlamaq çətinləşir. Bu baxımdan gələn il devalvasiya istisna deyil".
Günel CƏLİLOVA
