Hər bir ölkənin iqtisadi inkişafının təmini üçün ən vacib faktorlardan biri investisiya axınlarıdır. Azərbaycanda da son dövrlər biznes mühitinin yaxşılaşdırılması, investisiya cəlb edilməsi imkanlarının stimullaşdırılması istiqamətində ciddi addımlar atılıb. Bu addımların nəticəsi kimi beynəlxalq hesabatlarda da dünyanın lider islahatçı ölkəsi olaraq tanınıb. Ölkəmizin apardığı islahatlara görə öndə olması xarici investorların diqqətini artıra bilər.
Məlum olduğu kimi, Azərbaycan Respublikasının Prezidenti İlham Əliyev sentyabrın 2-də Yaponiyanın ölkəmizdə yeni təyin olunmuş fövqəladə və səlahiyyətli səfiri Cuniçi Vadanın etimadnaməsini qəbul edib. Görüş zamanı Yaponiya ilə Azərbaycan arasındakı münasibətlər müzakirə edilib.
Prezident İ.Əliyev qeyd edib ki, iqtisadi sahədə çox yaxşı nəticələr görünür: “Çox şadıq ki, yapon şirkətləri Azərbaycanda iş qurmaqda maraqlıdırlar. Onlar yaxşı investorlardır. Onlar Azərbaycanın neft və qaz sektoruna çoxlu vəsait yatırıblar. Ümidvaram ki, iqtisadiyyatımızın digər sektorlarına da maraq olacaq. Xüsusilə biznes mühiti ilə bağlı vəziyyətin yaxşılaşdırılmasını nəzərə alaraq, Azərbaycan əcnəbi şirkətlər üçün cəlbedici olmağa davam edir”.
“Son illər ölkəmizdə yaşanan sabitlik və iqtisadi inkişaf xarici investorların diqqətini cəlb edir”
Biznes mühiti ilə bağlı Azərbaycanən cəlbedici ölkəyə çevrilməsi barədə fikir bildirən iqtisadçı-ekspert Pərviz Heydərov qeyd etdi ki, qeyri-neft sektoruna xarici investisiya axınını artırmaq üçün bu istiqamətdə güzəştlərin tətbiqi çox vacibdir: “İnvestisiya mövzusu dünyada çox həssas hesab edilən bir mövzudur. Xüsusilə Azərbaycan kimi inkişaf etmək yoluna qədəm qoymuş ölkələr investisiya cəlbediciliyini artırmağa daha çox can atırlar. Çünki investisiyasız inkişaf mümkün deyil. Azərbaycanın bugünkü inkişaf səviyyəsinə gəlib çıxmağına səbəb məhz xarici investisiyalar olub. 1994-cü ildə “Əsrin müqaviləsi” bağlanmasaydı, yəni neft-qaz sektorumuza xarici investisiya axını üçün müvafiq şərait yaradılaraq qapılar açılmasaydı, Azərbaycanın inkişaf səviyyəsi indikindən ən azı 10-15 il geridə qalmış olacaqdı. Son illərdə isə qarşımızda duran vəzifələrdən biri də odur ki, qeyri-neft sektoruna da xarici investisiyaların cəlb olunmasına şərait yaradaq. Amma burada incə bir məqam var. Xarici investor bir ölkəyə vəsait yatıranda onu maraqlandıran əsas məsələ daha tez gəlir götürmək olur. Ona görə də xarici investorlar ən çox xammal əldə olunan sahələrə meyl göstərirlər ki, maliyyə vəsaiti yatıraraq xammal əldə etsinlər və onun dərhal satışını həyata keçirsinlər. Onlar hansısa müəssisə yaratmağa, emal sahəsində infrastruktur qurmağa, birgə müəssisələr təşkil etməyə və məhsul istehsal edərək yerli ölkənin adıyla daxili və ya xarici bazarda satmağa bir o qədər maraq göstərmirlər. Gərək ölkədə son dərəcədə əlverişli investisiya mühiti yaradılsın ki, xarici investor bu sahələrə də vəsait yatırsın”.
Həmsöhbətimiz onu da əlavə etdi ki, son illər Azərbaycanda dövlət səviyyəsində mövcud investisiya mühitinin daha da yaxşılaşdırılması üçün xeyli iş görülür. Xüsusən də qeyri-neft sektoruna xarici investorların cəlbi üçün vergi və digər sahələrdə yumşaltmalar edilməkdə, güzəştli xarakter daşıyan addımlar atılmaqdadır: “Son illər ölkəmizdə yaşanan sabitlik və iqtisadi inkişaf xarici investorların diqqətini cəlb edir”.
Günel CƏLİLOVA
