Pandemiya ilə əlaqədar aparcı beynəlxalq maliyyə qurumları ehtiyat edərək bir sıra ölkələrə kredit verməkdən imtina edirlər. Yaxud da çox ciddi şərtlər ortaya qoyurlar. Buna səbəb götürüləcək kreditlərin geri qaytarıla bilməsinə beynəlxalq maliyyə təşkilatlarının inamının olmamasıdır.
Ancaq Azərbaycan az sayda ölkələrdən biridir ki, belə bir problemi yoxdur. Məsələn, Asiya İnkişaf Bankı Azərbaycana 700 milyon dollardan çox kredit ayırmağa hazır olduğunu bəyan edib. Biznes-plana əsasən, 2021-ci ildə AİB təhsil, irriqasiya, biznesin dəstəklənməsi, iqtisadi islahatlar və dəmir yollarının inkişafı sahələrində layihələrin reallaşdırılması üçün kreditlər ayıracaq.
Qeyd olunur ki, 2021-ci ildə 85 milyon dollar, 2022-ci ildə 370 milyon dollar, 2023-cü ildə isə 325 milyon dollar kreditin ayrılması nəzərdə tutulur. Bundan başqa, AİB 2021-2023-cü illərdə Azərbaycana 4,5 milyon dollar məbləğində texniki yardım göstərəcək.
Onu da qeyd edək ki, Azərbaycan hökuməti, öz növbəsində, irriqasiya və drenaj sistemlərinin inkişafı layihələrinə əlavə 15 milyon dollar ayırıb. “Şimal-Cənub” beynəlxalq nəqliyyat dəhlizinin cənub dəmir yolu sahəsinin bərpasına isə hökumət 20 milyon dollar ayırıb.
Göründüyü kimi, digər ölkələrdən fərqli olaraq, beynəlxalq maliyyə qurumları Azərbaycana həvəslə kredit ayırırlar. Bu isə ölkəmizin növbəti üstün cəhətini özündə ehtiva edir.O baxımdan bunun əhəmiyyətini ekspertlər necə dəyərləndirirlər?
“Pandemiya belə buna mənfi təsir edə bilməyib”
Sözügedən məsələyə aydınlıq gətirən iqtisadçı-alim Əli Əlirzayev bununla bağlı bir sıra məqamlara toxundu: “Hər bir ölkənin krediti qaytarmaq qabiliyyəti olmalıdır. Ölkənin götürülən krediti qaytarmaq potensialı, milli sərvəti, ehtiyatı yoxdursa, o zaman həmin ölkəyə kredit vermək çox risqlidir. Bu səbəbdən beynəlxalq maliyyə qurumları hər ölkəyə kredit vermirlər. Kredit verəndə də bunu çox ağır şərtlərlə təqdim edirlər. Şükürlər olsun ki, Azərbaycanın bu baxımdan elə bir problemi yoxdur. Azərbaycanın krediti qaytarmaqla bağlı göstəriciləri üstün olduğuna görə beynəlxalq maliyyə qurumları bizə kredit ayırmaqda tərəddüd etmirlər. Pandemiya belə buna mənfi təsir edə bilməyib. Məsələ ondadır ki, Azərbaycanın 50 milyard dollardan çox valyuta ehtiyatı var, digər sərvətləri var. Sözügedən məsələnin kökündə dayanan əsas faktor bununla bağlıdır. Asiya İnkişaf Bankı neçə ildir Azərbaycanla yaxından əməkdaşlıq edir. Müxtəlif konkret sahələrə kredit ayırır. Əsasən infrastruktur yönümlü layihələrin maliyyələşdirilməsi məqsədilə kredit ayırırlar. AİB-in Azərbaycanda artıq formalaşmış bir potensialı var. Digər tərəfdən, beynəlxalq maliyyə qurumları görürlər ki, Azərbaycan üzərinə düşən öhdəlikləri vaxtında yerinə yetirir. Bu amilin də sözügedən məsələdə rolu böyükdür. Azərbaycan neçə ildir beynəlxalq maliyyə qurumları ilə uğurlu əməkdaşlıq edir. Azərbaycanın tranzit ölkə olaraq artan rolu, müəyyən kredit qoyulan sahələrin gəlir gətirməsi beynəlxalq maliyyə qurumlarının ölkəmizə marağını artırır”.
İqtisadçı-alimin fikrincə, Azərbaycanın kredit reytinqinin yüksək olması ümumən ölkəmizin mənafeyinə cavab verir.
Vidadi ORDAHALLI
