Pandemiyaya baxmayaraq, Azərbaycanda elektron xidmətlər və bu xidmətlər üzərindən iqtisadi sifarişlərdə artım tendensiyası müşahidə edilir. Məsələn, 2020-ci ilin yanvar-iyul aylarında “Azexport.az” portalına daxil olan ixrac sifarişləri 374,5 milyon dollar təşkil edib. Bu, ötən ilin eyni dövrü ilə müqayisədə 8 faiz çoxdur. 2020-ci ilin iyul ayında isə portala daxil olan ixrac sifarişlərinin dəyəri 55 milyon dollar təşkil edib və ötən ilin müvafiq ayı ilə müqayisədə 26,4 faiz artıb.
Cari ilin iyul ayında “Azexport.az” portalına ən çox ixrac sifarişi pambıq mahlıcı və pambıq yağı, fındıq ləpəsi, pomidor, tütün, toyuq əti, alma, toyuq yumurtası, quru süd, qənnadı məhsulu, şərab, tikinti materialı, mühərrik yağı, kosmetik vasitə, sarımsaq, nar şirəsi, uşaq bezi, Naftalan yağı və s. mallara daxil olub. 2017-ci ilin yanvar ayından 2020-ci ilin 31 iyul tarixinə kimi (43 ay ərzində) “Azexport.az” portalına dünyanın 141 ölkəsindən daxil olan ixrac sifarişlərinin dəyəri 1 milyard 959,3 milyon dollar təşkil edib.
Bundan başqa, 2020-ci ilin yanvar-iyul aylarında “Azərkosmos” ASC 28 ölkəyə 28,1 milyon dollar məbləğində xidmət ixrac edib. Nəticədə “Azərkosmos”un xidmət ixracından gəlirləri 10,2 faiz artıb.
Ümumilikdə, indiki şəraitdə elektron xidmətlərdə müşahidə olunan bu artımın əhəmiyyətini ekspertlər necə dəyərləndirirlər?
“...ölkənin ixrac gəlirlərinin artmasına nail oluruq”
Məsələyə münasibət bildirən millət vəkili Aydın Hüseynovun sözlərinə görə, belə bir uğurlu nəticənin əldə edilməsi düzgün iqtisadi strategiyanın qurulmasından xəbər verir: “Bu, Prezident İlham Əliyevin həyata keçirdiyi çox mühüm iqtisadi strategiyanın bir bəhrəsidir. Məsələ ondadır ki, bir zamanlar pandemiyanın ola biləcəyi ilə bağlı hansısa təsəvvür yox idi. Ancaq ölkədə “Azərkosmos” ASC fəaliyyət göstərməyə başladı. Nəticədə Azərbaycan kosmosda peyki olan ölkələr sırasına daxil oldu. Azərbaycanda “Azexport.az” portalı fəaliyyətə başladı və ölkədə istehsal olunan məhsulların dünya bazarına çıxarılması təşkil edildi. Bununla bağlı işlər elaktron sifarişlər əsasında quruldu. “Made in Azerbaijan” brendi adı altında ölkədə istehsal olunan məhsulların ixracı başladı. Pandemiya şəraitində bu kimi resurslar ölkə iqtisadiyyatında çox önəmli rol oynayır. Biz həmin xidmətlərdən çox məharətlə istifadə edərək ölkənin ixrac gəlirlərinin artmasına nail oluruq. Zamanında bu xidmətlər yaradılmasaydı, qurulmasaydı, o zaman bu uğurlara da nail ola bilməzdik. Müşahidələr göstərir ki, Azərbaycanın elektron xidmətləri üzərindən ixracatı və bundan əldə olunan gəlirlər daha da artacaq. Çünki xidmətlərin keyfiyyəti, çoğrafiyası artır. Bu xidmətlərdən istifadə edən ölkələrin sayı artır. Bu isə o deməkdir ki, ölkənin qeyri-neft sektoru sürətlə inkişaf edir. Bütün bunlar ölkəyə əlavə valyutanın daxil olmasına birbaşa şərait yaradır. Əldə olunan bu kimi uğurlar onu göstərir ki, aparılan iqtisadi strategiya çox düzgündür. İstənilən situasiyada, istənilən kritik məqamlarda bax, bu kimi yaradılan və strateji formada həyata keçirilən layihələr ölkə iqtisadiyyatına öz töhfəsini verir”.
Millət vəkilinin fikrincə, bütün bunlar bir daha Azərbaycanın düzgün iqtisadi siyasət apardığını sübut edir.
Vidadi ORDAHALLI
