Pandemiya ilə əlaqədar olaraq bir sıra ölkələdə muzdla çalışan işçilərim orta aylıq əməkhaqqı ya azalıb, ya da əvvəlki kimi qalıb. Bununla belə, iqtisadi fəallığın aşağı düşməsi səbəbindən muzdla çalışanların sayında azalma var.
Ancaq Azərbaycanda bu sahədə də artım var. Bu ilin yanvar-iyun aylarında ölkə iqtisadiyyatında muzdla çalışan işçilərin orta aylıq nominal əməkhaqqı 2019-cu ilin müvafiq dövrünə nisbətən 23 faiz artaraq 720 manat təşkil edib. Bu da yanvar ayı ilə müqayisədə 1,1% çoxdur. Rəsmi məlumatlara görə, bu ilin 1 iyul tarixinə ölkədə muzdlu işçilərin sayı 2019-cu ilin eyni dövrü ilə müqayisədə 5 faiz artaraq 1,7 milyon nəfərə çatıb. Eyni dövrdə orta aylıq əməkhaqqı 23 faiz artıb.
Bununla yanaşı, əməkhaqqı neft-qaz sektorunda 3571 manat, qeyri neft-qaz sektorunda 657,9 manat təşkil edib. Dövlət müəssisələrində çalışan işçilərin əməkhaqları 627 manat, özəl müəssisələrdə isə 839,8 manat olub. Mədənçıxarma sənayesində, maliyyə və sığorta fəaliyyəti, peşə, elmi-texniki fəaliyyət, informasiya və rabitə, eləcə də nəqliyyat və anbar təsərrüfatı sahələrində orta aylıq nominal əməkhaqqı ölkə üzrə orta göstəricidən yüksək olub.
Göründüyü kimi, bu ilin birinci yarısında Azərbaycanda muzdla çalışan işçilərin həm əməkhaqları, həm də bu sahədə çalışanların sayı artıb. Bütövlükdə, pandemiya şəraitində sözügedən proseslər iqtisadiyyatda müsbət meyllərin olmasının bir göstəricisidir.
“...sahibkarlara yardımlar buna öz müsbət təsirini göstərib”
Sözügedən məsələ ilə bağlı fikirlərini “Bakı-Xəbər”lə bölüşən iqtisadçı-ekspert Fuad İbrahimov bununla bağlı bir sıra məqamlara toxundu: “Muzdlu işçilərin əməkhaqlarının pandemiya dövründə dayanıqlığının qorunub saxlanması, hətta yanvar ayı ilə müqayisədə onun artması müsbət haldır. Bu, həmin sahələrin dayanıqlığını, eyni zamanda, pandemiya dövrünə uyğunlaşaraq fəaliyyət göstərməsini ortaya qoyur. Ölkədə mövcud olan sabitlik də buna öz müsbət təsirini göstərib. Bu həm də sözügedən sahənin dayanıqlı olmasına dəlalət edir. Bununla belə, hökumətin mart ayından etibarən qəbul etdiyi sosial paketlər, sahibkarlara yardımlar buna öz müsbət təsirini göstərib. Yəni sözügedən qərarlar bu və ya digər formada muzdla çalışanların həm əməkhaqlarının, həm də o sahədə çalışanların saylarının artmasına öz təsirini göstərib. Ümumiyyətlə, MDB məkanında Azərbaycan koronavirus pandemiyası dövründə əlindən gələni edir. Yardım paketlərinin qəbul olunması və digər bu qəbildən olan məsələlərdə çox operativ hərəkət edir. Bununla yanaşı, çox qənaətbəxş formada bu işləri görüb. Pandemiya ilə bağlı iqtisadi problemlər bütün dünyada var. Belə şəraitdə ideal vəziyyət axtarmaq düz çıxmaz. Bu, alicənablıqdan kənar olur. Azərbaycan dövləti əlindən gələni edir ki, vətəndaşların sosial vəziyyəti yaxşı olsun. Hesab edirəm ki, bütün bunlar təqdirəlayiq haldır”.
Ekspertin fikrincə, proseslərin gedişi göstərir ki, postpandemiya dövründə muzdla çalışan işçilərin həm gəlirləri, həm də bu sahədə çalışanların sayı daha da artacaq.
Vidadi ORDAHALLI
