Məlum olduğu kimi, pandemiya əksər ölkənin iqtisadiyyatına ciddi mənfi təsir etdiyi üçün, bu onların idxalında da özünü göstərir. Bu səbəbdən əksər ölkədə avtomobil idxalı azalıb. Belə ki, iqtisadi vəziyyətin pisləşməsi avtomobil alışına olan marağı azaldıb.
Ancaq müşahidələr və rəqəmlər göstərir ki, bu ilin 7 ayında Azərbaycanda avtomobil idxalı artıb. Belə ki, bu ilin yeddi ayı ərzində Azərbaycana 27,8 minə yaxın nəqliyyat vasitəsi gətirilib, bu da 2019-cu ilin eyni dövrü ilə müqayisədə 20,9% çoxdur. Bu il distribyutor və dilerlər, eləcə də fiziki şəxslər xaricdən 26 min ədəd minik avtomobili alıblar, bu da ötən ilin yeddi ayı ilə müqayisədə 25% çoxdur.
Bundan başqa, bu ilin yeddi ayında ölkəyə 1 615 ədəd yük daşımaq üçün mühərrikli nəqliyyat vasitəsi, 101 ədəd sürücü daxil olmaqla 10 nəfər və ya daha çox adam daşımaq üçün nəzərdə tutulmuş mühərrikli nəqliyyat vasitəsi və 77 ədəd xüsusi təyinatlı motorlu nəqliyyat vasitəsi idxal olunub. Eyni zamanda, bu ilin yanvar-iyul aylarında ölkəyə 2 453 ədəd daxili yanma mühərriklə yanaşı, elektrik mühərriklə də hərəkətə gətirilən nəqliyyat vasitələri, həmçinin, 105 ədəd yalnız elektrik mühərriklə hərəkətə gətirilən nəqliyyat vasitəsi idxal olunub. Ümumi olaraq, yanvar-iyul aylarında avtomobil idxalının dəyəri 340 968,72 min dollar təşkil edib.
Bütün bunlar onu göstərir ki, pandemiya Azərbaycan iqtisadiyyatına, ölkədəki alıcılıq səviyyəsinə ciddi mənfi təsir göstərə bilməyib.
“...ölkənin tədiyyə balansı ilə müqayisə olunur”
Sözügedən məsələ ilə bağlı fikirlərini “Bakı-Xəbər”lə bölüşən millət vəkili Aydın Hüseynovun sözlərinə görə, bütün bunlar Azərbaycan iqtisadiyyatının gücündən xəbər verir: “Ölkədə baş verən proseslər onun iqtisadi göstəriciləri, eyni zamanda, ölkənin tədiyyə balansı ilə müqayisə olunur. Azərbaycanın tədiyyə balansı müsbətdir. Bunun özü çox yaxşı göstərici və üstün keyfiyyətdir. Nəzərə almaq lazımdır ki, alıcılıq qabiliyyətinin səviyyəsi həm də idxalın həcmi ilə ölçülür. Görünən odur ki, bir sıra ölkələrdən fərqli olaraq, Azərbaycanda avtomobil idxalı azalmayıb. Bu onu göstərir ki, vətəndaşların alıcılıq səviyyəsi yüksəkdir. Nəinki vətəndaşların, hüquqi şəxslərin də alıcılıq səviyyəsi yaxşıdır. Avtomobil sıradan bir əşya deyil. Bu, bahalı bir məhsuldur. Müşahidə olunan müsbət tendensiya həm də onunla bağlıdır ki, pandemiya ilə əlaqədar qəbul olunan sosial paketlər, dövlətin sahibkarlara verdiyi maddi dəstək öz müsbət effektini verir. Bütün bunlar imkan vermir ki, pandemiya alıcılıq səviyyəsinə ciddi mənfi təsir göstərə bilsin”.
Millət vəkili hesab edir ki, qarşıdakı dövrdə əhalinin alıcılıq səviyyəsinin daha da artacağı gözlənir.
Vidadi ORDAHALLI
