Pandemiya dövründə bir sıra sahələrdə durğunluq yaşanır. Durğunluq yaşanan sahələrdən biri də avtomobillərin alqı-satqısıdır. Alıcı azlığından əziyyət çəkən bəzi maşın satışı ilə məşğul olan şirkətlər elan saytlarında avtomobili yüksək qiymətə təklif edirlər.
Elan saytlarının birində avtomobil üçün müəyyən edilən qiymət diqqət çəkir. Belə ki, vətəndaş “Toyota” markalı maşınını 11.500 manata satdığını bildirib və əlavə edib ki, ilkin ödəniş 6 min manatdır. Qalan 5500 manatı isə aylıq 650 manat olmaqla 50 faizə vurularaq 15 aya qədər kreditə salmaq mümkündür. 50 faizlik kredit insanlarda narazılıq yaradır. Məlumdur ki, kredit faizləri 16-30 faiz arasında dəyişdiyi halda, 50 faizlik kredit faizi nə deməkdir?
“...yüksək kredit faizinin müəyyən edilməsi təəccüblü deyil”
Məsələ ilə bağlı fikir bildirən iqtisadçı-ekspert Əkrəm Həsənov bildirdi ki, ticarət şəbəkələrinin kreditlərinin ucuz olması haqqında məlumatlar yayılır. Ancaq bu belə deyil. Onların kredit faizləri bəlkə də daha çoxdur, 60-70 faizdir: “İndi iri ticarət şəbəkələri belə edirlərsə, adi vətəndaş niyə etməsin? Üstəgəl, nəzərə almaq lazımdır ki, vətəndaş malını istədiyi qiymətə sata bilər. Düzdür, 50 faizlik kredit çoxdur, amma qanunazidd deyil. Hər gün, hər yerdə ticarət mərkəzlərinin yüksək faizlərlə kredit verdiyini nəzərə alsaq, deməli, vətəndaşı ittiham etmək olmaz”.
Həmsöhbətimizin sözlərinə görə, elan saytlarında təklif edilən avtomobil və ya digər məhsul üçün yüksək kredit faizinin müəyyən edilməsi təəccüblü deyil. Bu sahədə xüsusi standart tətbiq etmək lazımdır: “Azərbaycanda avtomobil bazarına nəzarət yoxdur və buna görə də dəllallar həmişə bazarı özləri tənzimləyirlər. İstədikləri vaxt qiyməti qaldırıb, aşağı salırlar. Düşünürəm ki, pandemiyadan asılı olaraq, maşın bazarı 5-6 aya dirçələcək. Lakin, hər halda, digər dövlətlərin təcrübəsi nəzərə alınaraq, hesab edirəm ki, Azərbaycanda da maşın bazarına nəzarət edilməsi yaxşı olardı. Yəni insanlar aldadılmasınlar”.
Günel CƏLİLOVA
