Fevralın 21-də Azərbaycanın Braziliya Federativ Respublikasındakı Səfirliyi "Xocalıya ədalət" beynəlxalq kampaniyası çərçivəsində bu faciəvi hadisələrə həsr olunmuş fotosərgi təşkil edib.
Səfirlikdən baki-xeber.com-a verilən məlumata görə, tədbir çərçivəsində, həmçinin, Ermənistan-Azərbaycan Dağlıq Qarabağ münaqəsinə aid müxtəlif dillərdə dərc olunmuş kitab sərgisi də təşkil olunub. Tədbirdə Braziliya ictimaiyyətinin tanınmış şəxsləri, o cümlədən Parlamentin aşağı və yuxarı palatalarının nümayəndələri, yerli diplomatik korpusun üzvləri və müxtəlif universitlərdən müəllim və professor heyəti iştirak edib. Qonaqlara "Xocalıya ədalət" kampaniyası çərçivəsində bir sıra səfirliklərimizin dəstəyilə hazırlanmış videoçarx nümayiş etdirilib və portuqal dilində tərtib edilmiş bukletlər paylanıb.
Tədbiri giriş nitqi ilə açan səfir Elxan Poluxov Xocalı faciəsi, "Xocalıya Ədalət" beynəlxalq kampaniyası və Ermənistan-Azərbaycan Dağlıq Qarabağ münaqişəsi haqqında ətraflı məlumat verib. Leyla Əliyeva tərəfindən 2008-ci ildə başlanan bu kampaniyanın bütün dünyada böyük uğurla həyata keçirildiyini bildirən səfir Leyla Əliyevanın təşəbbüsü nəticəsində Xocalı soyqırımının bir çox ölkələr tərəfindən tanındığını və tanınmaqda davam etidiyini tədbir iştirakçılarının diqqətinə çatdırıb.
Səfir dünyada hələ də ikili standartların mövcud olduğunu dilə gətirərək, Xocalı soyqırımının təşkilatçılarının məsuliyyətə cəlb edilməsinə, eyni zamanda, dünyada belə dəhşətli hadisələrin təkrarına yol verilməməsinə çağırıb.
Baki-xeber.com
