Yadigar Məmmədli: "Kanalın yayımının bərpası informasiya təminatında mühüm rol oynayacaq"
Xəbər verildiyi kimi, Türkiyənin "TRT 1" telekanalının Azərbaycanda yerüstü rəqəmli yayımı ilə bağlı Milli Televiziya və Radio Şurası (MTRŞ) və TİKA arasında razılıq əldə olunub. MTRŞ-nın Texniki nəzarət şöbəsinin müdiri, professor İsa Məmmədov mətbuata açıqlamasında bildirib ki, analoq yayımla bağlı müqavilə olduğu üçün yeni müqavilənin bağlanmasına ehtiyac qalmayıb.
Şöbə müdiri qeyd edib ki, mövcud müqavilə 2018-ci ilə qədər qüvvədədir: "TİKA və MTRŞ arasında razılıq əldə olunub, "TRT 1" telekanalının yaxın zamanlarda yayımı bərpa olunacaq. Bakı şəhəri və Abşeron yarımadası ərazisində "TRT 1" 48-ci TV yayım kanalında, bölgələrdə isə ümumölkə TV proqramları ilə eyni paketdə yayımlanacaq".
Qeyd edək ki, Azərbaycanda rəqəmli TV yayımına keçildikdən sonra "TRT 1"in yerüstü yayımı ötən ildən dayandırılıb. Noyabrın 1-dən etibarən Bakı şəhəri və Abşeron yarımadasında, dekabrın 1-i, 10-u və 20-si bölgələrdə analoq TV yayımı dayandırılıb. Azərbaycanda yalnız rəqəmli TV yayımı həyata keçirilir. "TRT 1" Azərbaycan və Türkiyə hökumətlərarası ("TRT 1", keçmiş Rabitə və İnformasiya Texnologiyaları Nazirliyi və Milli Televiziya və Radio Şurası arasında imzalanmış) müqaviləsinə uyğun olaraq, Radiotezliklər üzrə Dövlət Komissiyasının 8 dekabr 1995-ci il tarixli razılığı əsasında yayımlanıb.
Ümumilikdə, "TRT 1"in yayımının bərpa olunması hər iki ölkənin informasiya təminatında, iki ölkə münasibətlərinin ümumi inkişafında və media əməkdaşlığında nə kimi rol oynayacaq? Məsələyə münasibət bildirən Demokratik Jurnalistlər Liqasının rəhbəri Yadigar Məmmədlinin sözlərinə görə, telekanalın yayımının bərpası bütün sahələrdə əməkdaşlığa müsbət təsir göstərəcək: "Sözügedən telekanal 90-cı illərdən Azərbaycanda yayımlanır. 2007-ci ildən milli təhlükəsizlik baxımından bir sıra xarici kanalların analoq yayımı dayandırıldı. Həmin dövrdə "TRT 1" kanalının da yayımı dayandırıldı. Sonra tərəflər arasında əldə olunan razılaşmaya əsasən, "AzTV 1" Türkiyədə, "TRT 1" isə Azərbaycanda yayımlanmağa başladı. Ötən il rəqəmsal yayıma keçiddən sonra "TRT 1"in yayımı yenidən dayandırıldı. Bəlli bir müddətdən sonra yenidən razılaşmanın əldə olunması müsbət haldır. Nəzərə alsaq ki, Türkiyə Azərbaycanla qardaş dövlətdir, məlum razılaşma iki dövlət arasında münasibətlərin daha da inkişaf etməsinə xidmət edəcək. Digər tərəfdən, həm Türkiyədə, həm də Azərbaycanda baş verən hadisələrə hər iki toplumun marağı çox böyükdür. Bu baxımdan telekanalın yayımının bərpası informasiya təminatında mühüm rol oynayacaq. İnformasiyanı paylaşmaq baxımından hər iki tərəf bundan udacaq".
Vidadi ORDAHALLI
