Bu gün Bakıda “Azərbaycan ərazilərinə silahlı erməni təcavüzü: itki və tələfatlar” mövzusunda beynəlxalq konfrans keçirilib. Trend-in məlumatına görə, tədbirdə Prezident Administrasiyası rəhbərinin müavini, Beynəlxalq əlaqələr şöbəsinin müdiri Novruz Məmmədov, dövlət və hökumət nümayəndələri, xarici ölkələrin Azərbaycandakı səfirləri, ictimaiyyət nümayəndələri və digər qonaqlar iştirak edib.
Konfransda Azərbaycan Respublikası Ərazilərinin Ermənistan silahlı qüvvələrinin işğalı nəticəsində itki və tələfatların qiymətləndirilməsi üzrə İşçi qrupunun üzvü, “MBA” qiymətləndiricilər şirkətinin direktoru Nüsrət İbrahimov Dağlıq Qarabağ münaqişəsi nəticəsində Ermənistan tərəfindən Azərbaycana vurulmuş maddi və mənəvi zərərə dair hesabatla çıxış edib.
Hesabatda qeyd olunub ki, Ermənistanın havadarlarının himayəsi altında həyata keçirdiyi silahlı təcavüz və işğal nəticəsində Azərbaycanın məruz qaldığı itki və tələfatlar zaman keçdikcə sürətlə artmaqda davam edir ki, bu da münaqişədən sonrakı bərpa xərclərinin də həddindən çox olacağına dəlalət edir.
Hazırda Ermənistan tərəfindən işğal olunan Azərbaycan ərazilərindəki zəngin yeraltı və yerüstü təbii sərvətlərin talan edilməsi, həmçinin torpaqlarımızın işğalının ümumi daxili məhsulun strukturuna mənfi təsiri davam etməkdədir. Azərbaycanda məhsuldar və rəqabətli kənd təsərrüfatı məhsulları istehsalının və bunun müqabilində emal sənayesinin zəifləməsi, Azərbaycanın yay otlaqlarının 70%-nin işğal altında qalması, işğal olunmuş ərazilərdən başqa cəbhə xəttindən Azərbaycanın içərilərinə doğru 50-80 kilometrə qədər məsafədə olan bölgələrin mədəni, mənəvi, sosial-iqtisadi, təbii sərvətlər potensialından istifadədən məhrumiyyətlərə gətirib çıxarır. Beləliklə, qeyd olunan amillərə görə investisiya qoyuluşunun mümkünsüzlüyü kimi əsaslı təsirlər nəticəsində Azərbaycan böyük itki və zərərlərə məruz qalmaqda davam edir.
"Son 200-300 il ərzində regionda aparılan siyasət Azərbaycan əleyhinə yönəlib, Azərbaycan torpaqları işğal edilib, soydaşlarımız öz doğma yurdlarından didərgin düşüb". Bunu isə Prezident Administrasiyası rəhbərinin müavini, Beynəlxalq əlaqələr şöbəsinin müdiri Novruz Məmmədov deyib.
N.Məmmədov qeyd edib ki, bu siyasətin davamı olaraq Azərbaycan əraziləri Ermənistan tərəfindən işğal edilib, Ermənistandan 250 min azərbaycanlının qovulması və Azərbaycanda yaşayan insanların öz doğma yurdlarından didərgin düşməsi nəticəsində 1 milyondan artıq qaçqın və məcburi köçkün yaranıb.
PA rəsmisi bildirib ki, Azərbaycanın işğal olunmuş ərazilərində yüz minlərlə hektar münbit torpaqlarımız var və Azərbaycan o torpaqlardan istifadə edib öz iqtisadiyyatını inkişaf etdirə bilmir: “Bu ərazilərdə məscidlər, qəbiristanlıqlar dağıdılıb. Bunların mənəvi zərərini qiymətləndirmək mümkün deyil. Dünya birliyi niyə bir milyondan artıq əhalinin fundamental hüquqlarının pozulması haqqında danışmır?! Bəs bunların səmimiliyi harada qaldı?! Biz indi onlara necə inana bilərik?! Azərbaycanın ərazi bütövlüyü pozulub. Bunu bütün beynəlxalq təşkilatlar, ayrı-ayrı dövlətlər qəbul edirlər, ancaq heç bir tədbir görmürlər. Ermənistana qarşı sanksiyalar tətbiq edilə bilinərdi, ancaq bu barədə düşünən yoxdur. Onlar ancaq öz maraqlarını güdürlər, iqtisadi, siyasi və geosiyasi maraqlarını güdürlər".
N.Məmmədov deyib ki, Azərbaycan dünyanın geosiyasi baxımdan mühüm bir hissəsində, böyük dövlətlərin maraqlarının toqquşduğu regionda yerləşir: "Ona görə də müəyyən təzyiqlərə məruz qalırıq. Ancaq bütün bu təzyiqlərə baxmayaraq, 25 il müharibə şəraitində olmağımıza baxmayaraq, Azərbaycan həm siyasi baxımdan, dünyanın enerji təhlükəsizliyini təmin etməklə, həm də idman sahəsində beynəlxalq aləmə böyük töhfələr verir".
