"Bu baxımdan indi rayonların iqtisadi inkişafının dəstəklənməsi siyasətinin davamına ehtiyac duyulur"
Salyan şəhərinə Şirvan-Muğan magistral kəmərindən çəkilmiş yeni içməli su xəttinin açılışı zamanı yerli ictimaiyyət nümayəndələri ilə görüşündə Prezident İlham Əliyev bir sıra məsələlərə toxunub.
Onun fikrincə, çalışmaq lazımdır ki, hər bir rayon öz potensialını gücləndirsin: "Rayonlarımızın potensialı böyükdür, o cümlədən Salyan rayonunun. Sadəcə olaraq, gərək işlər düzgün qurulsun. Belə olan halda, rayonlarımız öz daxili imkanları hesabına yaşaya bilər. Bizim bu gün əksər rayonlarımız subsidiya, dövlət büdcəsindən dotasiya ilə yaşayır. Buna nə qədər ehtiyac varsa, belə də olacaq. Ancaq çalışmalıyıq ki, hər bir rayonun öz imkanları, potensialı maksimum dərəcədə realizə edilsin. Mən göstəriş vermişəm, hər bir rayonda sənaye zonaları yaradılsın ki, həm iş yerləri açılsın, həm də yerli istehsal artsın. Emal müəssisələri yaradılmalıdır, xüsusilə kənd təsərrüfatına daha da böyük diqqət göstərilməlidir və daha çox rayonun iqliminə, torpağına, şəraitinə uyğun bitkilər yetişdirilməlidir. İndi bütün təhlillər aparılır, təkliflər hazırlanır. Əminəm ki, yaxın gələcəkdə biz gözəl nəticələri görəcəyik".
Bütövlükdə rayonlar öz potensialını səmərəli şəkildə realizə edə bilsə, bu həm onların dayanıqlı inkişafına təkan verəcək, həm də dövlət büdcəsinə ağırlıq düşməz. Maraqlıdır, bəs ekspertlər bunu necə dəyərləndirir? Sözügedən məsələni dəyərləndirən iqtisadçı-ekspert Vüqar Bayramovun fikrincə, əvvəlki illərdə rayonlar üçün prioritet istiqamətlər yenicə seçilməyə başlanmışdı: "Yəni Azərbaycan iqtisadiyyatı üçün qeyri-neft sektorunda bu istiqamətlər müəyyənləşdirilmişdi və həmin istiqamətdə inkişafın formalaşmasına çalışılırdı. Ancaq hər bir rayonun öz potensialı və strukturuna uyğun olaraq prioritet sektorların müəyyənləşdirilməsinə və onların inkişaf etdirilməsinə ehtiyac var. Eyni zamanda, rayonlarda xüsusi iqtisadi zonalar yaradılmalıdır. Belə zonaların yaradılması yerli və xarici sərmayələrin həmin rayonlara yönəlməsinə imkan verəcək. Əslində mövcud dünya praktikası göstərir ki, xarici investisiyaların cəlb edilməsinin əsas yollarından biri məhz belə zonaların formalaşmasıdır. İnvestisiyaların yaradılması isə özlüyündə yeni iş yerlərinin yaradılması deməkdir. Bu gün Azərbaycan iqtisadiyyatında gəlirlilik baxımından əsas problemlərdən biri də odur ki, ölkə iqtisadiyyatının 90 faizindən çoxu Abşeron iqtisadi zonasının, əsasən də paytaxtın payına düşür. Digər rayonların payı isə olduqca azdır. Əlbəttə, bu, neft sektorunun Abşeron iqtisadi zonasında təşəkkül tapması ilə bağlıdır, amma, bütün hallarda, indiki məqamda regionların iqtisadi inkişafını stimullaşdırmaq lazımdır. Buna nail olmaqla hökumət arada fərqin götürülməsinə çalışmalıdır ki, bununla da bölgə əhalisinin həm işlə təminatında, həm də sosial vəziyyətinin yaxşılaşdırılmasında ciddi addımlar atmaq mümkün olsun. Bu baxımdan indi rayonların iqtisadi inkişafının dəstəklənməsi siyasətinin davamına ehtiyac duyulur".
Vidadi ORDAHALLI
