Azərbaycan Respublikası Hesablama Palatasının Kollegiyası 2014-2015-ci illərdə və 2016-cı ilin1-ci rübündə Şəmkir RayonTəhsil Şöbəsinə ayrılmış vəsaitlərin proqnozlaşdırılması və icrası vəziyyəti ilə bağlı auditin nəticələri üzrə Hesabatı təsdiq edib.
Baki-xeber.com-un Palatanın saytına istinadən xəbərinə görə, audit ümumilikdə 46901,5 min manat məbləğində vəsaiti əhatə edib, ayrılmış vəsaitlərin icra səviyyəsi 91,8%-93,3% təşkil edib.
Nəticələrə görə, 2015/2016-cı tədris ili üçün Şöbənin strukturu 79 ümumtəhsil məktəbi üzrə ümumilikdə 31059 şagird kontingenti və 1619 sinif komplekti təsdiq edilib, ümumtəhsil məktəblərində 3189 nəfər müəllim çalışıb, təhsil şöbəsinin ümumtəhsil məktəblərində şagirdlər üzrə orta sıxlıq 19,2 nəfər, o cümlədən I-IV siniflər üzrə 20,0 nəfər, V-IX siniflər üzrə 18,5 nəfər, X-XI siniflər üzrə 18,4 nəfər təşkil edib.
2015/2016-cı tədris ilində rayonun ümumtəhsil məktəblərində 57 vakant yer üçün (853 saat dərs yükü) kadr sifarişi verilib. Vakant yerlər üzrə ən çox tələbat əsasən riyaziyyat, fiziki tərbiyə, biologiya, ibtidai sinif, azərbaycan dili və ədəbiyyatı müəllimlərinə olub. Təhsilin keyfiyyət göstəricilərinin təhlili nəticəsində bəlli olub ki, attestat alanların yalnız 40,52%-nin qəbul imtahanlarında iştirak etmək üçün müraciət edib, onlardan 41,33%-i tələbə adını qazanıb, rayon abituriyentlərinin ana dili, riyaziyyat, fizika, kimya, biologiya, tarix, coğrafiya və ingilis dili fənləri üzrə göstəriciləri respublikanın orta göstəricilərindən aşağı olub.
Əməyin ödənilməsi ilə bağlı fəaliyyətin araşdırılması nəticəsində müəyyən olunub ki, lazımı avadanlıqlarla təchiz edilmədiyi halda, tədris kabinetinə rəhbərliyə görə, şagirdlərin sayı normadan az olan siniflərin yarımqruplara bölünməsi nəticəsində artıq tarifləşdirilmiş dərs saatlarına görə və dərslərin normadan artıq tarifləşdirilməsi səbəbindən Şöbə tərəfindən artıq əmək haqqı ödənilib. Audit prosesində əvəz edilməmiş, lakin əvəz edilməsi rəsmiləşdirilmiş dərs saatlarına görə, həmçinin əvəzetmə zamanı əvəzedici müəllimlərə düzgün olmayaraq sinif və kabinet rəhbərlikləri üzrə vəzifələrin əvəz olunmasına görə də əlavə haqq müəyyənləşdirilərək ödənildiyi müəyyən olunub.
Yoxlama nəticəsində o da bəlli olub ki, azkontingentli ibtidai siniflərdə komplektləşdirilmə düzgün aparılmayıb, siniflər üzrə şagirdlərin say həddi gözlənilmədən paralel siniflər yaradılıb, nəticədə artıq büdcə vəsaiti xərclənib. Eyni zamanda tarifləşmə siyahılarına salınmış dərs saatlarının ünvanlı bölgüsünün müvafiq qaydada rəsmiləşdirilməməsi, həmçinin artıq ştat vahidlərinin saxlanması nəticəsində artıq büdcə vəsaitinin ödənişinə yol verilib.
Daha bir qanunsuzluq məzuniyyət günləri ilə üst-üstə düşən bayram günlərinin məzuniyyətin təqvim günlərinə daxil edilməsi formasında baş verib ki, nətiədə artıq əmək haqqı və kompensasiya ödənilməsi hallarına yol verilib, həmçinin funksional fəaliyyətə aid edilməyən və xərclər smetasında nəzərdə tutulmayan istiqamətlərə vəsait yönəldilib.
Bir sıra hallarda vəsaitin satınalma metodlarından istifadə edilmədən xərcləndiyi, icraçıya malların alınmasına görə qaimədə göstərilmiş yekun məbəğindən artıq vəsaitin ödənilməsi, həmçinin şöbə tərəfindən alınan malların ehtimal olunan qiymətlərinin düzgün müəyyənləşdirilməməsi nəticəsində artıq xərcə yol verildiyi müəyyən olunub.
Beləliklə, audit dövrünün sonuna kreditor borcun məbləği 5,9 dəfə artaraq 126,0 min manat olub ki, həmin məbləğin 70,1%-ni kommunal xidmət haqlarıının ödənişi ilə bağlı yaranmış borclar təşkil edib, həmçinin müxtəlif mal-material qiymətliləri uçota alınmayıb.
Hesablama Palatasının Kollegiyası Şəmkir Rayon Təhsil Şöbəsi tərəfindən yol verilmiş nöqsanların əsasən audit dövründə aradan qaldırıldığı nəzərə alınmaqla müəyyən edilmiş digər nöqsanların qısa müddət ərzində ləğv edilməsi, həmçinin nöqsanlara yol vermiş vəzifəli şəxslərin Azərbaycan Respublikasının qanunvericiliyi ilə nəzərdə tutulmuş qaydada məsuliyyətə cəlb edilməsi barədə qərar qəbul edərək, icra olunması və həyata keçirilmiş tədbirlər barədə Hesablama Palatasına məlumat verilməsi məqsədilə qərarın surəti Şəmkir Rayon Təhsil Şöbəsinə göndərilb.
Auditin nəticələri ilə bağlı Milli Məclisə məlumat verilib.
