"Texnika Bank"ın keçmiş sədri Etibar Əliyev yenidən həmin bankın rəhbərliyinə qayıdıb. Belə ki, bankda toplantı keçirilib və E.Əliyev Texnika Bankın Müşahidə Şurasının sədri seçilib. Bankda Milli Bankın nümayəndələrinin iştirakı ilə təhvil-təslim işləri başlayıb.
Bir neçə il əvvəl E.Əliyev MTN tərəfindən həbs edilmişdi. Eldar Mahmudov bankı qudası Cahangir Hacıyevə vermiş və adı dəyişdirilərək "Bank Technique" adlandırılmışdı. Bankın defolt vəziyyəti də elə bundan sonra başlamışdı. İndi Etibar Əliyev hansı hədəflərlə qayıdır? E.Əliyev açıqlamasında faktı təsdiq edib. O bildirib ki, ilk işi bank kollektivi ilə toplantı keçirib yaranmış problemləri dəyərləndirmək, təhlil etmək və bu problemlərin həlli yollarını tapmaq olacaq. O, bankın əvvəlki nüfuzunun geri qaytarılacağını qeyd edib.
Bundan başqa, bankın Mərkəzi ofisi yenidən Atatürk prospektində yerləşən binaya köçürüləcək. Bəs Etibar Əliyev onu şərləyib tutduran MTN-çilərlə mübarizədə öz haqqının bərpasına necə, çalışacaqmı? Vaxtilə Eldar Mahmudovun dəstəsinin "Navodkaları" ilə işləyən və Etibar Əliyevi hətta əsassız ölüm işində suçlayan, ürək xəstəliyindən dünyasını dəyişmiş şəxsin ölümünü onun ayağına yazmağa çalışmaqla MTN-çilərə xidmət göstərən bəlli "reket qəzetlər"in taleyi necə olacaq? Birdən Etibar Əliyev özü də həmin məsələlərə yenidən qayıtsa və hansı reketin həmin günlərdə nə rol oynayacağını aydınlaşdırmağa başlasa, necə olacaq?
