Azərbaycanda V çağırış Milli Məclisə keçiriləcək seçkilərə sayılı günlər qalıb. Respublika ərazisində hazırlıq işləri demək olar ki, artıq yekunlaşıb. Azərbaycan növbəti dəfə tarix yazma ərəfəsindədir. Milli Məclisin 125 deputat mandatı uğrunda 769 namizəd mübarizə aparacaq ki, seçkilər ərəfəsində onlar üçün hər cür şərait və imkanlar yaradılıb.
Deputatlığa namizədlər azad şəkildə seçiciləri ilə görüşür, qarşılarında öz platformaları haqqında məlumat verir, dəstək qazanmaq üçün müxtəlif ideya və təkliflərlə çıxış edirlər. Seçicilər də öz növbələrində yaradılan şəraitə uyğun olaraq kimə səs verəcklərini tam müəyyən ediblər. Bundan başqa bütün dairə seçki komissiyaları noyabrın 1-nə təyin edilmiş parlament seçkilərinə tam hazırdır. Söhbət etdiyimiz dairə və məntəqə-seçki komissiyalarının sədrləri Azərbaycan Respublikasının Seçki Məcəlləsinin müvafiq tələblərinə uyğun olaraq seçkilərin azad və demokratik şəkildə baş tutacağına əmin olduqlarını söyləyiblər.
13 saylı Xəzər-Pirallahı Dairə-Seçki Kommisiyasının sədri Mütəllim Balaqardaşov: " Namizədliyi qeydə alınanlar onlar üçün ayrılmış açıq və qapalı yerlərdə təbliğat və təşviqat işləri aparırlar"
- Mərkəzi Seçki Komissiyasının təsdiq etdiyi təqvim planına uyğun olaraq bütün məntəqə-seçki komissiyalarında seçkiyə hazırlıq işləri başa çatmaq üzrədir. Məntəqələr telefon rabitəsi, elektrik enerjisilə təmin olunub, 10 veb-kamera quraşdırılıb. Namizədlərə təbliğat və təşviqat aparmaq üçün açıq və qapalı yerlər ayrılıb. Hazırda namizədliyi qeydə alınanlar onlar üçün ayrılmış açıq və qapalı yerlərdə təbliğat və təşviqat işləri aparırlar. Onu da qeyd etmək yerinə düşər ki, 13 saylı Xəzər-Pirallahı Seçki Dairəsinin tərkibinə daxil olan 27 seçki məntəqəsi üzrə 45 min 106 seçici qeydə alınıb. Onlardan 335 nəfəri ilk dəfə olaraq seçki hüququndan istifadə edəcək gənclərdir. Seçicidən 530 nəfəri 80-100 yaş arasıdır. Daşınan qutuların sayı isə 27-dir.
14 saylı Xəzər dairə-seçki kommisiyasının sədri İmran Qəmbərov: "Bildirişlərin paylanılması başa çatdırılıb"
-14 saylı Xəzər Seçki Dairəsi üzrə 36 seçki məntəqəsi var ki, onlarda da 48 min 423 seçici qeydə alınıb. Seçicilərdən 722 nəfəri ilk dəfə olaraq seçki hüququndan istifadə edəcək gənclərdir. Seçicidən 422 nəfəri 80-100 yaş arasıdır. 36 daşınan qutu tam istifadəyə yararlıdır. Digər seçki dairələri kimi bu dairədə də səsvermə gününə hazırlıq işləri başa çatıb. Məntəqələrdə seçkilərin şəffaf və demokratik keçirilməsi üçün hər cür şərait yaradılıb. Səsvermə prosesini onlayn izləmək üçün veb-kameralar da quraşdırılıb. Seçicilərə səsvermənin keçirilmə tarixi, vaxtı və yeri barədə bildirişlərin paylanması işi başa çatdırılıb. Məntəqələr səsvermə kabinələri, seçki qutuları ilə təmin olunub. Seçici siyahıları, təbliğat və təşviqat xarakterli plakatlar seçki məntəqəsinin girişində, nəzərəçarpacaq yerlərdə asılıb. Artıq bildirişlərin paylanılması da başa çatdırılıb.
30 saylı Suraxanı birinci Dairə-Seçki Komissiyasının sədri Fikrət Məmmədov: " Xəstə və əlil insanların səs verməsi üçün evlərə aparılacaq xüsusi səsvermə qutuları hazırdır"
- 30 saylı Suraxanı birinci Seçki Dairəsi üzrə 27 məntəqədə seçkilərə hazırlıq işləri demək olar, başa çatıb. Seçki günü səsvermənin açıq, şəffaf və demokratik keçirilməsi üçün bütün işlər Seçki Məcəlləsinə uyğun vaxtında aparılıb. Dəqiqləşdirmə aparıldıqdan sonra seçicilərin sayı 36 min 914 nəfər müəyyənləşdirilib və siyahı tərtib edilərək məntəqələrdə asılıb. Seçki kabinələri, səsvermə qutuları hazır vəziyyətə gətirilib. Xəstə və əlil insanların səs verməsi üçün evlərə aparılacaq xüsusi səsvermə qutuları da hazırdır. Bildirişlərin paylanması da başa çatdırılıb. Deputatlığa namizədlərin hər birinə təbliğat və təşviqat aparmaq üçün bərabər şərait yaradılıb. Düşünürəm ki, seçki dairəsinin hər bir üzvü üzərinə düşən vəzifəni yaxşı dərk edərək seçkilərin demokratik və şəffaf keçməsi üçün əllərindən gələni əsirgəməyəcəklər.
31 saylı Suraxanı ikinci Dairə-Seçki Komissiyasının sədri İlham Bayramov: " İstənilən şəxs seçki günü səsverməni onlayn izləyə biləcək"
-Hər yerdə olduğu kimi, 31 saylı Suraxanı ikinci Seçki Dairəsi üzrə seçicilərin səsvermədə mütəşəkkil iştirak etməsi üçün hər cür şərait yaradılıb. Seçici siyahıları dəqiqləşdirilərək xüsusi lövhədən asılıb. Səsvermə kabinələri də hazırdır. İlk dəfə səs verəcək gənclərlə söhbətlər aparılıb, görüşlər keçirilib. Dairəni əhatə edən 33 məntəqənin hər birinə daşınan və daşınmayan qutular təqdim edilib. 39 min 56 seçici qeydiyyata alınıb. Bildirişlərin paylanılması da başa çatdırılıb. Hazırda namizədliyi qeydə alınanlar onlar üçün ayrılmış açıq və qapalı yerlərdə təbliğat və təşviqat işləri aparırlar. Məntəqələrdə veb-kamera da quraşdırılıb. İstənilən şəxs seçki günü səsverməni onlayn izləyə biləcək.
32 saylı Suraxanı birinci Dairə-Seçki Komissiyasinin sədri Qasım Rzayev: " Seçkilərə hazırlıq işləri yüksək səviyyədə həyata keçirilir"
-Dairə üzrə 31 məntəqə mövcuddur ki, onların da hər biri daşınan və daşınmayan qutularla təmin olunublar. Dəqiqləşdirilmiş siyahıya görə dairəsi üzrə 39 min 10 nəfər qeydə alınıb. Ərazidən köçüb gedənlər, ərazidə yaşamayanların hamısı tam dəqiqləşdirilib. Dairə üzrə namizədlərə təbliğat-təşviqat işlərini həyata keçirmək üçün açıq və qapalı yerlər müəyyənləşdirilib. Onlar öz platformalarına uyğun olaraq, seçki kampaniyalarını aparmaqdadırlar. Bütün bunlar bir daha onu deməyə əsas verir ki, ölkəmizdə Milli Məclisə seçkilərə hazırlıq işləri yüksək səviyyədə həyata keçirilir.
18 saylı Nərimanov-Nizami Dairə-Seçki Komissiyasının sədri İslam Muradov: " Dairə və məntəqələrdə maddi-texniki təminat öz qaydasındadır"
- 18 saylı Nərimanov- Nizami Seçki Dairsəi üzrə 16 məntəqə qarşıdan gələn parlament seçkilərilə bağlı hazırlıq işlərini yekunlaşdırmaq üzrədir. Dairə və məntəqələrdə maddi-texniki təminat öz qaydasındadır. Məntəqə-seçki komissiyasının üzvləri üçün təşkil olunan seminarlar artıq başa çatıb. Onlara səsvermənin gedişatı, səslərin hesablanması, protokolun tərtib edilməsi və digər qaydalar öyrədilib. Seçici siyahıları da hazırdır. Vətəndaşların daha çox hərəkət etdiyi yerlərə qoyulan lövhələrdə seçicilər öz adlarını tapa bilərlər. Deputatlığa namizədlərin kimliyi də bəllidir. Onlar öz təbliağat və təşviqat işlərini aparır, seçilərlə mütəmadi görüşlər keçirilrər. Seçki günü bu dairə üzrə 20 minə yaxın seçici səs verəcək ki, onlar öz deputatlarını seçəcəklər.
24 saylı Nizami birinci seçki dairəsinin sədri Niyazi Nəcəfov: "Hazırlıq işləri seçki qanunvericiliyinin tələblərinə uyğun aparılır"
-24 saylı Nizami birinci Seçki Dairəsinin əhatə etdiyi 31 məntəqədə səsvermə gününə hazırlıq işləri seçki qanunvericiliyinin tələblərinə uyğun aparılır. 40 min seçicinin adı dəqiqləşdirilərək seçici siyahıları lövhələrə asılıb.
25 saylı Nizami ikinci Seçki Dairəsinin sədri Heydər Vəliyev: "Seçicilərə öz iradələrini demokratik və şəffaf şəkildə bildirmələri üçün lazımi şərait yaradılıb"
-Bu dairə üzrə 33 məntəqə var. Məntəqələr üzrə seçici siyahıları dəqiqləşdirilərək lövhələrə asılıb. 44 min seçicisi olan dairənin bütün məntəqələrində veb-kameralar quraşdırılıb. Daşınan və daşınmayan qutularla təmin olunub. Müşahidə olunanlar onu deməyə əsas verir ki, noyabrın 1-də seçicilərə öz iradələrini sərbəst, demokratik və şəffaf şəkildə bildirmələri üçün lazımi şərait yaradılıb.
