Bu gün "Holiday İnn Otel"ində "Seçkinin mediada işıqlandırılması" mövzusunda birgünlük seminar keçirilib. Seminar Avropa Şurası tərəfindən Azərbaycan Respublikası Mərkəzi Seçki Komissiyası və Azərbaycan Mətbuat Şurası ilə birgə təşkil olunub.
Medianın seçkidə iştirakı, seçkinin işıqlandırılması, bu prosesdə mətbuatın oynayacağı rol haqqında çıxışlar və müzakirələrlə müşayiət olunan seminar seçki maarifçiliyi ilə bağlı idi. Yerli KİV-lər üçün təşkil edilən seminarda çıxış edən Azərbaycan Respublikası Prezidentinin Administrasiyasının ictimai-siyasi məsələlər şöbəsinin müdir müavini Vüqar Əliyev bildirdi ki, Azərbaycanda seçkilərin şəffaf, demokratik keçirilməsi üçün münbit şərait var. Ölkəmizdə növbəti parlament seçkiləri keçiriləcəyini qeyd edən V.Əliyev Azərbaycanda seçkilərin demokratik, ədalətli, şəffaf keçirilməsi üçün seçki qanunvericiliyinin, beynəlxalq təcrübəyə əsaslanan böyük seçki təcrübəsinin və hakimiyyətin demokratik seçki keçirmək üçün siyasi iradəsinin olduğunu əminliklə ifadə etdi. V.Əliyev dedi ki, siyasi partiyalar, vətəndaş cəmiyyəti institutları, namizədlər bu seçkilərdə fəal iştirak edə bilir. Qarşıdan gələn parlement seçkilərinin işıqlandırılmasında, bu prosesin izlənməsində medianın da rolundan danışan V.Əliyevin bildirdiyinə görə, seçkilərdə vətəndaş cəmiyyəti, eləcə də media fəallıq göstərir: "Bilirsiniz ki, 1998-ci ildə Azərbaycanda senzura ləğv olunandan sonra medianın inkişafı ilə bağlı çox mühüm dövr başladı. Azərbaycan mediası inkişaf edir, bölgədə heç bir ölkədən geri qalmır, hətta deyərdim ki, bəzilərini qabaqlayır. Bu gün ölkəmizdə iqtisadi, ictimai-siyasi, sosial, mədəni prosesləri çox fəallıqla işıqlandıran onlayn media var. Sosial şəbəkələrdən geniş istifadə edilir, sosial şəbəkə istifadəçilərinin sayı 2 milyonu ötüb. Təbii ki, belə bir mühitdə Azərbaycanda cəmiyyətin seçkilərdə iştirakı üçün əlavə tədbirlərə ehtiyac qalmır. Mən bir məsələni xüsusi qeyd etmək istəyirəm ki, namizədliklərin irəli sürülməsində, istərsə də təbliğat və təşviqat məsələsində deyə bilərlər ki, aktivlik müşahidə olunmur, passivlik var və sair. Əslində təbii ki, mahiyyətcə məsələ bu cür deyil, kifayət qədər aktivlik var. Mən bunu bir halla əlaqələndirirəm, seçiciləri namizədlər haqqında yayılan fikirlər, mətbuata ötürülən kompromatlar deyil, namizədin platforması, onun görmək istədiyi işlər, fəaliyyəti maraqlandırır. Bu da onu təsdiq edir ki, Azərbaycanda insanları demokratik cəmiyyətlərdə olan ab-hava daha çox maraqlandırır. Seçki məsələsi ilə, ümumiyyətlə, cəmiyyətdə baş verənlərlə əlaqədar namizədlərə, seçkilərdə iştirak edən adamlara həqiqətlərin çatdırılmasında hesab edirəm ki, medianın rolu əvəzsizdir. Seçicilər də namizədlər və onların platformaları haqqında ən çox mediadan informasiya götürür, mediadan oxuyurlar. Seçicilər də, təbii ki, namizədlərə öz fikirlərini media vasitəsilə çatdırır. Yəni media onlar arasında qarşılıqlı əlaqə qurur".
V.Əliyevin sözlərinə görə, əsas şərt ondan ibarətdir ki, media öz işin görsün, hadisələri işıqlandırsın, işıqlandırma funksiyasını qərəzsiz şəkildə həyata keçirsin, geniş maarifləndirmə funksiyasına malik media seçki qanunvericiliyinə uyğun işini görsün.
Azərbaycan Respublikası Mərkəzi Seçki Komissiyasının sədr müavini Natiq Məmmədov da seminarda çıxış edərək bildirdi ki, medianın seçkiləri işıqlandırmasına böyük şərait yaradılıb: "Müşahidəçilər öz yerində, amma medianın bu məsələdə rolu əvəzsizdir".
Avropa Şurasının Bakı ofisinin rəhbərinin müavini Teymur Məlik-Aslanov çıxış edərək seminar iştirakçılarına təşəkkür etdi və bildirdi ki, Azərbaycanda keçiriləcək parlament seçkilərinin işıqlandırılmasında medianın rolu əhəmiyyətlidir.
Azərbaycan Mətbuat Şurasının sədr müavini Umud Mirzəyevə də söz verildi. Seminarda iştirak edən Mətbuat Şurası təmsilçisi qeyd etdi ki, MŞ 12 ildir fəaliyyət göstərir və bu illər ərzində ölkəmizdə keçirilən parlament, bələdiyyə, prezident seçkilərində fəal iştirak edib. İndiyə qədər media üçün bir sıra tədbir, seminar və treninqlərin keçirildiyini vurğulayan U.Mirzəyev qeyd etdi ki, MŞ-nin keçirdiyi seçki maarifçiliyi tədbirində 500-dən artıq jurnalist iştirak edib.
Azərbaycan Respublikası Mərkəzi Seçki Komissiyasının üzvü Qabil Orucov "Seçkinin mediada işıqlandırılması: Azərbaycan qanunvericiliyi" mövzusunda çıxışında bildirdi ki, media mənsubları sərbəst şəkildə seçki hərəkətlərini izləməlidir. Q.Orucovun sözlərinə görə, seçki prosesinin mediada işıqlandırılması qaçılmazdır. O qeyd etdi ki, media seçkidə ancaq informasiya yayan, onu işıqlandıran tərəf kimi deyil, həm də müşahidəçi kimi çıxış edə biləcək.
Azərbaycan Mətbuat Şurası İdarə Heyətinin üzvü Yadigar Məmmədli isə "KİV-in seçkiqabağı kampaniyada rolu" mövzusunda çıxış etdi. O qeyd etdi ki, bu gün Azərbaycan mediası çox fəal şəkildə seçkiyə hazırlıq prosesini, namizədlərin təbliğat-təşviqat kampaniyasını izləyir, yayır.
Y.Məmmədlinin sözlərinə görə, media nümayəndələri qəzetlərlə yanaşı, onlayn mediada, sosial şəbəkələrdə də fəallıq göstərir, münasibət bildirir. O bildirdi ki, seçki ilə bağlı treninqlər, seminarlar təşkil olunur və jurnalistlər burada da aktiv iştirak edir.
Seminarda "Seçkinin mediada işıqlandırılmasına dair Avropa Şurası standartları və ən yaxşı Avropa təcrübəsi" mövzusunda Avropa Şurasının eksperti xanım Leyla Turcilo da çıxış etdi.
Günel Cəlilova
İradə SARIYEVA
