Türkiyə Prezidenti Rəcəb Tayyib Ərdoğan bir neçə gün davam edən tələbə etirazlarından sonra İstanbulun özəl Bilgi Universitetinin bağlanması qərarını ləğv edib.
BBC-nin xəbərinə görə, Universitetin bağlanması əmri 21 mayda, ləğvi haqqında fərman isə 24 may bazar günü imzalanıb və sənəd Resmi Gazette-də dərc olunub.
Qeyd edək ki, Universitetin buraxılış imtahanlarından bir ay əvvəl bağlanması qərarı tələbələr və bəzi müəllim heyəti tərəfindən üç gün davam edən kütləvi etirazlarla müşayiət olundu. Xüsusilə 24 mayda universitet kampusunda təxminən 1000 nəfər mitinqlərdə iştirak etdi. Onlarla tələbə universitet binasını ələ keçirdi və polis tərəfindən binadan çıxarıldı.
BBC-nin türk xidməti bildirir ki, Bilgi Universitetinin bağlanması qərarı İstanbulda yerləşən böyük bir konqlomerat olan Can Holdingə qarşı 2025-ci ilin sentyabr ayından bəri davam edən fırıldaqçılıq və vergidən yayınma ilə bağlı davam edən istintaqın bir hissəsi olaraq qəbul edilmişdi. Əsas televiziya kanalları da daxil olmaqla 120-dən çox şirkətdən ibarət olan qrup 2019-cu ildən bəri universitetə sponsorluq edir. Can Holding daxilindəki şirkətlər hazırda dövlət nəzarətindədir.
Qeyd olunur ki, 1996-cı ildə təsis edilən Bilgi Universitetində hazırda 20.000-dən çox tələbə təhsil alır. Universitetdə 150-dən çox dərəcə proqramı təklif edən səkkiz fakültə var. Bilgi həmçinin Avropa Birliyinin tələbə mübadiləsi proqramı olan Erasmusda da iştirak edir.
Onu da qeyd edək ki, bu, Türkiyədə universitetlərin bağlanması ilə bağlı ilk qalmaqal deyil. Bənzər hadisə illər öncə də baş vermişdi.
ZÜMRÜD
