Əli Mustafa: “Rusiya Qarabağ münaqişəsindən istifadə edib 30 il bölgədə meydan sulayıb”
Qarabağda ermənilər yaşamırdı, onlar sadəcə bu region bəhanəsi ilə Ermənistanda hakimiyyəti əldə saxlamaq istəyən Köçəryan-Serj klanının girovları idilər. Bu sözləri Ermənistanın baş naziri Nikol Paşinyan regionlara təşviqat səfəri zamanı vətəndaşlarla söhbətində deyib.
“Qarabağ xalqı indi Ermənistanda yaşayacaq, burada onların evi, sülhü, işi və sosial təminatları olacaq. Bu gün Ermənistanın beynəlxalq arenada nüfuzu tarixin heç bir dövründə olmadığı qədər yüksəkdir. Bizi “Qarabağ hərəkatı” ilə tələyə salmışdılar ki, bu bəhanə ilə pensiya və maaşları artırmasınlar, əsgərləri qarət etsinlər”, — deyə Paşinyan bildirib.
Burda diqqəti çəkən məqam odur ki, Paşinyan “bizi “Qarabağ hərəkatı” ilə tələyə salmışdılar” deməklə bunun arxasında məhz Rusiyanın dayandığına rəsmi şəxs olaraq eyham vurur. Belə baxanda düz deyir. Qarabağ işğalının arxasında dayanan, separatçıları Ermənistanda hakimiyyətə gətirən Rusiya olub. Yoxsa bir qrup quldurun işi deyildi ki, həm Ermənistanda hakimiyyətə gəlsinlər, həm də hakimiyyəti 20 il əllərində saxlasınlar.
Sözügedən məsələni baki-xeber.com-a şərh edən siyasi ekspert Əli Mustafanın fikrincə, Paşinyanın toxunduğu məsələlər həqiqətləri özündə əks etdirir: “Bəli, Qarabağ Ermənistan üçün bir tələ idi, Azərbaycan üçün isə inkişafa mane olan bir əngəl idi. Qarabağ konflikti üzündən Cənubi Qafqazın iki dövləti münaqişə vəziyyətində idi. Hər iki dövlətin inkişafı, tərəqqisi yubanırdı, suverenliyi məhdud qalırdı. Necə deyərlər, məhdud çərçivədə suverenliyə malik olurdular. Eyni zamanda bunların düşmənçiliyi, bir-birinə zərər vurması təbii ki, üçüncü tərəfin xeyrinə işləyirdi. Burada da “baş qəhrəman” rolunda Rusiya çıxış edirdi. Rusiya bundan bir alət kimi istifadə edərək həm Azərbaycana, həm də Ermənistana təzyiq edirdi. Ancaq daha çox bundan Ermənistan itirirdi. Yəni de-fakto Ermənistan Rusiyanın vassalına çevrilmişdi. Həm hərbi, iqtisadi baxımdan, həm də siyasi baxımdan. Çünki Ermənistanda Moskvadan gələn təlimatları yerinə yetirən “Qarabağ klanı” 20 il hakimiyyətdə qaldı. Onların legitimliyi yox idi. Sadəcə, bilavasitə Rusiyanın yardımı ilə Qarabağ dalğasında bunlar hakimiyyətə gətirildi. Paşinyan da əslində doğru olaraq buna işarə edir. Bunun da açması odur ki, həmin qüvvələr Ermənistanı idarə etmək üçün bir vasitə idi. Köçəryan-Sarkistan cütlüyünün hakimiyyəti dövründə hansı talançılıqların, korrupsiyanın, siyasi qətllərin baş verdiyini erməni cəmiyyəti yaxşı bilir. Paşinyanın mesajları həm də bu yaxın tarixi xatırlamağa hesablanıb. Düzdür, Paşinyan qarşı tərəflə rəqibdir, amma ədalət naminə demək lazımdır ki, dedikləri həqiqətdir. Erməni cəmiyyəti bütün bunlardan ciddi nəticə çıxarmalıdır və revanşist qüvvələrə qarşıdakı seçkilərdə etimad göstərməməlidir. Əks təqdirdə onlar bundan daha çox itirəcək. Azərbaycan onsuz da ərazi bütövlüyünü və suverenliyini tam təmin edib. Erməni cəmiyyəti anlamalıdır ki, Qarabağ münaqişəsi olmasaydı, Cənubi Qafqaz tamam fərqli inkişaf səviyyəsində olardı. Rusiya bundan istifadə edib 30 il bölgədə meydan sulamazdı”.
Vidadi ORDAHALLI
