ABŞ Prezidenti Donald Tramp, artıq deyəsən sözün həqiqi anlamında “yerə-göyə sığmır”. Bəllidir ki, 2026-cı il başlayandan Tramp gah Qrenlandiya dedi, gah Venesuelaya üz tutdu, axırda da İranın başına od ələməyə başladı. Lakin Qrenlandiya planı tez bir zamanda “suya düşdü”, Venesuelada istənilən nəticə əldə olunmadı, İran isə, şəhərlərinin viran qoyulmasına, rəhbər şəxslərin ard-arda məhv edilməsinə baxmayaraq, bir aydan çoxdur dirəşib, öldü var, döndü yoxdur deyir.
Bu arada bəlli olub ki, ABŞ düz 50 illik fasilədən sonra Aya heyət göndərib. “Artemis-2” Ay missiyasının bir hissəsi olan “Orion” kosmik gəmisinin 10 gün ərzində Ayın ətrafında fırlanıb Yerə qayıtması planlaşdırılır. Əcəba, Tramp yerdəki torpaqlardan əlini üzdümü ki, ümidini Aya bağladı? Yoxsa milyardlar xərclədiyi müharibənin vurhavur vaxtında Ay onun yadına hardan düşə bilər? Görünür, o da Məşədi İbad kimi, Yer olmasın, Ay olsun variantını nəzərdən keçirməyə başlayıb. Nə deyək, xeyirlisi...
Əslində, “Tramp yerə-göyə sığmır” deyəndə təkcə planetləri nəzərdə tutmadım. Bu günlərdə “Vaşinqton Post” xəbər yayıb ki, Tramp Ağ Evdə söküntü-tikinti işlərinə başlayıb. Yəni əslində söküb, amma tikə bilməyib. Belə ki, macərabaz ABŞ Prezidenti yerin-göyün od tutub yandığı bu günlərdə Ağ Evin Şərq qanadını sökdürərək yerində böyük bir bal zalı tikdirmək istəyib. Bundan xəbər tutan məhkəmə bir qərarla işi dayandırıb ki, bəs buna Konqresin razılığı olmalıdır. Bina da qalıb bir tərəfi sökülmüş durumda.
Deyirəm, bəlkə Tramp bu boyda fasilədən sonra elə bu yarımçıq arzuları üzündən Aya üz tutub? İşdi də, birdən Yer arzuları Ayda çin olar, hətta aydan Yerin başına od ələmək daha rahat olar. Üstəlik Konqres-filan da qarışa bilməz, kimə nə?..
SAMİRƏ
P.S.Bütün bunlara baxanda Anadolu türkünün bir gözəl məsəli yada düşür: “Köy yanır, gəlin daranır...”
