Mətləb Salahov: "Qərbin Cənubi Qafqazda ikinci marionet hökumət ideyası iflasa uğradı"
Gürcüstandakı parlament seçkiləri Qərbin daha bir xaos və qanlı iğtişaş "layihəsini" puça çıxartdı. Bir çox Qərb dairələrinin gürcü xalqına öz iddialarını qəbul etdirmək üçün əl atdıqları təxribatlar əslində bu siyasi dairələrin yırtıcı simasını ortaya qoyur. Budur, gürcü xalqı öz seçimini edib, amma Qərbdəkilər seçkidən sonra aranı qatmaq üçün iyrənc planlar üzərində "baş sındırırlar". Bu fikirləri jurnalist-ekspert Mətləb Salahov "Baki-xeber.com"-a açıqlamasında bildirib. M.Salahov qeyd edib ki, bu seçim müstəqil Gürcüstanın gələcəyi üçün çox böyük məna daşıyır. "İndi Qərbdəkilər demokratik seçkilərin nəticələrini qəbul etmir, min cür hədyanla gürcü xalqının seçiminə qarşı çıxırlar. Məqsəd nədir, seçki qanunvericiliyinin müddəalarını qorumaq, yoxsa "demokratiya limitini" gözləmək?-qətiyyən! Məqsəd Gürcüstanda xaos və anarxiya ortamı yaratmaq, hakimiyyət dəyişikliyini zorakı şəkildə də olsa gerçəkləşdirmək, Cənubi Qafqazda Rusiya əlehyinə yeni cəbhə formalaşdırmaq. Həqiqətən də son zamanlar böyük güclərin Gürcüstan üzərindən regionla bağlı qurduğu planlara və ölkədaxili yaradılan süni münaqişələrə nəzər salsaq, seçkilərin nəticələrinin Gürcüstan xalqının gələcək taleyi üçün nə qədər vacib olduğunu deyə bilərik. Məhz bu səbəbdən vətəndaşlar öz səslərini müstəqil Gürcüstan və onun maraqları üçün istifadə etdilər. Qərbin məqsədi Cənubi Qafqazda Ermənistanın ardınca Gürcüstanda da marionet hökumət formalaşdırmaq, ölkəni ekspansiya platformasına, Qərb-Rusiya qarşıdurması məkanına çevirməkdir.
Diqqət edin, regionda özünə yer etmək istəyən xarici qüvvələrin müstəqil siyasət kursu seçən Gürcüstanı öz maraqlarının girovuna çevirmələri mümkünsüzdür. əslində seçkilərdəki mövqeyi ilə gürcü xalqı bu məsələyə açıqca aydınlıq gətirib. Düzdür, Qərbdəkilər yeni təxribatlarə cəhd edəcəklər. Çünki bu onların ənənəvi siyasətidir. Bu baxımdan da hələ çox oyunları, bir sıra çirkin ssenarilərin reallaşdırılması üçün ciddi cəhdlər edilməsini müşahidə edə bilərik. Çünki həmin ssenarilər səsvermənin nəticəsindən asılı olmayaraq, Qərb tərəfindən artıq əvvəlcədən yazılıb və hazırkı situasiyada gerçəkləşdirilməyə çalışılacaq. Qərbin Gürcüstanda aranı qatmaq istəyinin daha bir görüntüsünü təqdim edək. Gürcüstanda hazırki müxalifətinin fəaliyyətindən və ələlxüsus da iddialarından belə məlum olur ki, müxalif qüvvələri mövcud hakimiyyətin qələbəsini qətiyyən qəbul etmək, həzm etmək belə istəmir. Bu isə onu göstərir ki, Gürcüstan müxalifəti xeyli əvvəldən artıq Qərbdən istənilən istiqamətdə kifayət qədər dəstək olacağı barədə vəd alıb. Deməli, məsələ heç də göründüyü qədər sadə və bəsit deyil, əksinə, kifayət qədər mürəkkəbdir və yenə də bu ölkədə Qərbin "barmağı" görünür.
Hər kəsə gün kimi aydındır ki, Cənubi Qafqazın hansı ölkəsi müstəqil siyasət yürüdürsə, regionun hansı ölkəsi Qərbin diqtəsi ilə hərəkət etmirsə, hansı ölkədə inkişaf və tərəqqi müşahidə edilirsə, Qərb həmin ölkəni dərhal hədəfə alır. Məqsəd mərkəzdənqaçma ideyasına birdəfəlik son qoymaqdır. Hazırda Gürcüstanın təkcə qlobal və regional layihələrdə iştirakı deyil, irimiqyaslı infrastruktur layihələri belə həyata keçirməsi ABŞ və Avropalıları bərk narahat edir. Əvvəla ona görə ki, qeyd olunduğu kimi, Qərb üçün hansısa Cənubi Qafqaz ölkəsinin inkişafı, tərəqqisi, müstəqil siyasət yürütməsi qətiyyən qəbuledilən sayılmır. Digər tərəfdən də Qərb görür ki, region ölkələrindən hansı inkişaf edirsə, Cənubi Qafqazda sülhün təminatçısına çevrilir. Bu isə onların maraq və planlarına daxil deyil."
Namiq
