Sosial şəbəkələrdə Azadlıq Partiyasının sədri Əhməd Orucun ailəsi adından oğlu Abdul Oruclunun Prezident İlham Əliyevə təşəkkür etdiyinə dair məlumat yayılıb. Təşəkkür məktubunda deyilir:
"Möhtərəm cənab Prezident! İcazə verin, ailəmiz üçün ən çətin anlarda – atam, Azadlıq Partiyasının sədri Əhməd Orucun səhhətindəki problemlər ucbatından düşdüyümüz çıxılmaz vəziyyətdə bizə etdiyiniz yardıma, göstərdiyiniz dəstək və qayğıya görə Sizə sonsuz minnətdarlığımızı bildirək. Sizə olan təşəkkür və rəğbətimiz sonsuzdur. Ölkəmizdə koronavirus pandemiyası ilə mübarizə aparılan bu gərgin şəraitdə bizə göstərdiyiniz xüsusi diqqət, müxtəlif siyasi baxışlara məhəl qoymadan atdığınız nəcib addım Sizin ən yüksək insani keyfiyyətlərə malik əsl lider olduğunuzu bir daha təcəssüm etdirir. Sizin və çox hörmətli Mehriban xanımın hər bir vətəndaşı düşünməsinin, ehtiyacı olan hər bir kəsin yardımına tələsməsinin bariz nümunəsini şəxsən gördük. Atamın həyatı ciddi təhlükə altında olduğu məqamda etdiyiniz əvəzsiz köməyi heç vaxt unutmayacağıq. Tanrı Sizi qorusun, cənab Prezident".
Məktubun Əhməd Orucun oğlu tərəfindən niyə yazıldığını və həmin ailədəki hazırkı vəziyyəti tam dəqiqləşdirmək üçün müəlliflə əlaqə saxladıq. Abdul Oruclu “Bakı-Xəbər”ə açıqlamasında bildirdi ki, məktub həqiqətən onun tərəfindən yazılıb:
“Mən ölkə rəhbərinə təşəkkür məktubu yazdım. Atamın sağlıq durumu yaxşı deyildi. Açıq ürək əməliyyatı keçirdi, səhv etmirəmsə, 5 damar dəyişib. Əməliyyat “Bakı Mediakal Klinaka”da keçirilib. Məlumat Fonda sızandan sonra onların müdaxiləsi oldu və əməliyyat keçirildi. Sözün düzü, atam hələ xəstəxanadan çıxmayıb. Mən buna qədər olan dəstəyi hiss etdim ki, təşəkkür ünvanladım. Vəziyyət eləydi ki, atamı əməliyyata götürmürdülər. Açıq ürək əməliyyatı həm bahalıdır, həm də atamda qanaxma vardı. Əməliyyat uğurla olub. Bir həftədən sonra səhhətində olan stabilləşmə ilə bağlı nələrisə demək olacaq. Mən həkim olmadığım üçün bu prosedurun gələcəkdə necə olacağını tam dəqiq bilmirəm. Belə bir mürəciətin olmasından atamın məlumatı yoxdur. Səhhəti düzələndən sonra özü də bu məsələyə münasibət bildirər. Bir daha əməyi keçənlərə minnətdarlğımızı bildiririk”.
Məhəmmədəli QƏRİBLİ
