“Koronavirus pandemiyası ilə əlaqədar Qarabağ probleminin həlli prosesində yaranmış fasilənin aradan qaldırılması özlüyündə əhəmiyyətli hadisədir. Eyni zamanda Qarabağ probleminin danışıqlarla həlli prosesində yeni format olan video konfrans formatının işə düşdüyünü gördük. Video konfrans Azərbaycanın təşəbbüsü ilə həyata keçirilib. Bu bir daha göstərir ki, Azərbaycan koronavirusla mübarizə kimi çətin bir şəraitdə olmasına baxmayaraq Qarabağ probleminin dincliklə həll olunmasında öz iradəsini itirmir və bu prosesin ardıcıl aparılmasında maraqlı olduğunu nümayiş etdirir”.
Bunu SİA-ya açıqlamasında “Bakı Xəbər” qəzetinin baş redaktoru, siyasi şərhçi Aydın Quliyev deyib.
Onun sözlərinə görə, aparılan müzakirələrin detalları ilə əlaqədar məlumatlar olmasa da, müəyyən nəticələrə gəlmək mümkündür: “Yaxın vaxtlarda həmsədrlərin bu regiona yeni səfərləri olacağı gözləniləndir. Həmçinin həmsədrlərin iştirakı ilə bu ilin yanvar ayında Cenevredə əldə olunmuş humanitar xarakterli tədbirlərin həyata keçirilməsinə başlanılması mümkündür. Ermənistana dünya birliyi və ATƏT-in Minsk qrupunun həmsədrləri tərəfindən daha ciddi təzyiq olacağını demək olar. Çünki bu video konfransda müzakirə olunan məsələlərin bir çoxu, xüsusilə də bizim üçün ən prinsipial məsələ olan Qarabağ probleminin həlli düsturu aydın şəkildə ifadə olunub. Format dəyişməyəcək. Ermənistanın qondarma respublikanı danışıqlara tərəf kimi cəlb etmək cəhdi demək olar ki, tam şəkildə iflasa uğrayıb və Azərbaycandan, Ermənistandan, ATƏT-in Minsk qrupunun həmsədrlərindən və ATƏT-in sədrinin xüsusi şəxsi nümayəndəsindən ibarət olan formatın dəyişməzliyi bir daha elan olunub. Bu Azərbaycan diplomatiyasının mühim qələbələrindən biridir. Çünki Ermənistan illərdir Qondarma Dağlıq Qarabağ Respublikasını danışıqlara tərəf kimi daxil etməyə çalışsa da, artıq həmsədrlərdən və Rusiyanın özündən buna tutarlı şəkildə cavab alıb”.
A.Quliyev vurğulayıb ki, Ermənistanın bu konfransdan sonra mövqeyinin dünya miqyasında ifşa olunması prosesi bir qədər də dərinləşəcək: “Demək olar ki, konfrans Ermənistanın təkləndiyini göstərib. Qarabağ probleminin həlli ilə əlaqədar dünyanın qəbul etdiyi prinsipləri Ermənistan aşkar şəkildə və həyasızcasına inkar edərək tamamilə başqa mövzu gündəmə gətirib. Xüsusilə qondarma rejimin yeni seçilmiş qondarma prezidetinin 7 bəyanatından birində həyasızcasına Azərbaycana edə biləcəkləri hücumlardan danışıblar. Guya indiyə qədər Azərbaycan torpaqlarında məskunlaşmayıblar və Azərbaycan guya güc tətbiqi ilə hədələmə taktikasına son qoymazsa, Azərbaycana hücum edəcəklərmiş kimi həyasız bəyanatlar veriblər. Bir sözlə bu video konfrans Azərbaycanın mövqelərinin nə qədər möhkəm olduğunu bir daha nümayiş etdirib. Azərbaycan diplomatiyasının hərtərəfli işlədiyini, xüsusilə də Ermənistanın ənənəvi strateji müttəfiqi sayılan Rusiyanın mövqeyində obyektivliyə doğru xeyli dönüşün yarandığını və möhkəmləndiyini göstərib. Bundan sonra proseslər ləng getsə də hər halda müsbət perspektiv gözlənilir”.
