Ölkəmizdə koronavirusla bağlı xüsusi karatin rejimi qüvvədədir. Bu, ölkəmizdə keçirilən parlament seçkilərindən dərhal sonraya təsadüf etdiyindən, vətəndaşlarımızın yeni seçilmiş deputatları sınaması baxımından da həssas məqam sayıla bilər. Çünki bu çətin zamanda ölkəmizdə həm də bir yardımlaşma hərəkatına start verildi. İmkanlı adamlar ehtiyacı olanlara gücləri çatan köməklikləri etdilər. Belə məqamda millət vəkillərinin də fəal olmaları gərəkir. İnsafən demək lazımdır ki, bəzi millət vəkillərinin bu yöndə fəaliyyəti nəzərə çarpdı. Ancaq sosial şəbəkələrdə gedən müzakirələrdən görürük ki, vətəndaşların heç də hamısı öz deputatlarından razı deyillər. Bu qəbildən olan insanlar qeyd edirlər ki, yeni seçilmiş deputatlarını görə bilmirlər:
“Müraciət edəndə isə pandemiayanı bəhanə edib deyir ki, belə şəraitdə vətəndaşlarla görüş keçirmək olmaz”. Bəs indiki halda deputatlar seçiciləri ilə görüş problemini virtual qaydada keçirilən toplantılarla kompensasiya edə bilərmi? Azərbaycan Sosialist Partiyasının sədri Elşən Həsənov “Bakı-Xəbər”ə bildirdi ki, millət vəkilləri məhz belə məqamda xalqın yanında olmalı, onların probleminin həllinə kömək göstərməlidirlər:
Elşən Həsənov:“Dövlət başçıları videokonfrans formatında çox mühüm mövzuları müzakirə edirlərsə, deputatlar da seçiciləri ilə bu formatda görüşə bilərlər”
“Seçkilər yeni bitib. Əminəm ki, bütün deputatlar seçiləndə xalqa vədlər veriblər. Həmin vədlərin ən aparıcı tezisi bu olub ki, seçicilərə bütün bacardıqları dəstəyi verəcəklər. Buyursunlar, indi bunu etmək üçün əsl meydan var. Mən demirəm ki, deputat cibindən bütün seçicilərinə yardım paylasın. Onlar ictimai statuslarından istifadə edib, prosesə çoxlu sayda adamı cəlb edə bilərlər. Biz görürük ki, heç kimin tanımadığı bir adam yardımlaşma ilə bağlı çağırış edir, neçə nəfər ona dəstək verir. Nəticədə bir neçə adama yardımlar olunur. İndi təsəvvür edin ki, bunu deputat statusunda olan adam eləsə nə olar. Deputatlar görüş keçirməyin mümkünsüzlüyünü bəhanə etməməlidirlər. Texnoloji imkanlar bünün üçün alternativ yol göstərir. Dövlət başçıları videokonfrans formatında çox mühüm mövzuları müzakirə edirlərsə, deputatlar da seçiciləri ilə bu formatda görüşə bilərlər. Müxtəlif kəndlərdən, qəsəbələrdən bir neçə adamı qoşmaqla belə onlayn formatında görüş keçirib onların problemini dinləmək olar. Millət vəkilləri bu metoddan geniş istifadə etməlidir. Hətta şəffaflığın daha çox olması üçün belə görüşləri sosial şəbəkələr üzərindən də edə bilərlər ki, kənardan da izlənilsin. Bunun həm də təbliğat baxımından böyük üstünlüyü olar”.
Partiya sədrinin sözlərinə görə, hazırda bu prosesdə iştirak etmək üçün əhalinin böyük əksəriyyətinin imkanları var:“Təbii ki, hər bir kənddən bir nəfəri seçib qoşa bilərlər. Həmin adam da kəndin ümumi problemini deputatın nəzərinə çatdırar. Hamının əlində telefonu, evində interneti var. Yetər ki, istək olsun”.
Məhəmmədəli QƏRİBLLİ
