Bir sıra ölkələrdə olduğu kimi, Rusiyada da koronavirusla bağlı elan olunan karantin rejiminin uzadılması barədə qərar qəbul olunub. Hətta bildirilir ki, mayın 9-da Rusiyanın paytaxtı Moskva şəhərində Böyük Vətən müharibəsində qələbənin 75 illiyi münasibətilə keçirilməsi planlaşdırılan parad təxirə salınıb. Pandemiya ilə bağlı vəziyyəti təhlil edən rusiyalı ekspertlərin qənaətinə görə, RF-də bu proses iyun ayına kimi çəkə bilər. Bunu xəstəliyin yayılması ilə bağlı elan edilən məlumatlar əsasında deyirlər. Həkim-infeksionist Nikolay Malışev deyib ki, Rusiyada COVID-19-un yayılmasının pik həddi iyun-iyul aylarında olacaq. N.Malışev Rusiyada bir çox ekspertlərin bu fikirdə olduğunu qeyd edib: “Rəqəmlər nə qədər əhəmiyyətli olsa da, qorxuya salmamalıdır. Hər gün yoluxanların sayı daha da çox olacaq. Ölənlərin sayı da artacaq”.
Məlumdur ki, Azərbaycanda xüsusi karantin rejiminin müddəti mayın 4-nə qədər uzadılıb. Göründüyü kimi, Rusiyada virusdan sonra yenidən həyata qayıdışın iyunda olacağı deyilir. Bəs Azərbaycan necə, bundan daha tez prosesə başlaya bilərmi?
Leyla İbrahimli:“Veriləcək qərar pandemiya ilə bağlı vəziyyətin təhlilindən asılı olacaq”
Həkim, tibb üzrə fəlsəfə doktoru Leyla İbrahimli qəzetimizə bildirdi ki, karantin rejiminin sonlandırılmasını həm əhali, həm də dövlət istəyir:“Cünki bunun iqtisadiyyata kifayət qədər ciddi ziyanı dəyir. Ancaq nəzərə almalıyıq ki, biz bu addımalrı məcburiyyət qarşısında atmışıq. Karantin rejiminin tətbiqi ilə ölkədə xəstəliyin kütləvi yayılmasının qarşısının alınması tendensiyasını gördük. Hər gün izlədiyimiz statistikadan görürük ki, ölkəmizdə yoluxanların sayında azlama dinamikası müşahidə edilir. Ən başlıcası isə, sağalanların sayı artıq yoluxanlardan çoxluq var. Bunlar müsbət göstəricidir və bizi ümidli olmağa vadar edir. Təbiidir ki, karantinin tədricən aradan qaldırılmasını zəruri edən başqa faktorlar da var. Biz gördük ki, xüsusi karantin rejiminin uzadılması ilə bağlı qərar qəbul edildi. Ancaq bu müddət birincindən az oldu. Deməli, hər şey göstəricilərdən asılıdır. Karantin rejiminin tətbiqi ilə əldə edilmiş əks-epidemik nailiyyətin davam etdirilməsi karantin tədbirlərinin tədricən və nəzarət altında aradan qaldırılmasını şərtləndirə bilər. Nəzərə almalıyıq ki, karantin tədbirlərinin tam aradan qaldırılması ilə ikinci dalğa kütləvi yoluxma baş verə bilər. Epidemioloji qanunauyğunluğa görə, vaksinasiya problemi həll edilməyənə qədər virusun yayılma təhlükəsi qalır. Onu da vurğulamaq istəyirəm ki, biz karantin rejimindən tədricən çıxdıqdan sonra belə xəstəliyin necə gedəcəyi aparacağımız statistik təhlillərin nəticəsindən asılı olacaq. Təkrar sərt karantin tədbirlərinə keçməmək üçün prosesi tədricən keçməiyik və bütün qaydalara əməl etməliyik. Bir daha xatırladıram ki, veriləcək qərar pandemiya ilə bağlı vəziyyətin təhlilindən asılı olacaq. İndiyə qədər olan mənzərə isə bizdə prosesin Rusiya ilə müqayisədə bir qədər əvvəl yumşala biləcəyini söyləməyə əsas verə bilir”.
Məhəmmədəli QƏRİBLİ
