Prezident İlham Əliyev aprelin 17-də Əmək və Əhalinin Sosial Müdafiəsi naziri Sahil Babayev və İqtisadiyyat naziri Mikayıl Cabbarovun iştirakı ilə videobağlantı formatında keçirilən iclasda deyib ki, karantin rejiminin uzadılması yeganə düzgün qərar olardı:
"Karantin rejiminə gəldikdə, bildiyiniz kimi, karantin rejimi aprelin 20-nə qədər nəzərdə tutulurdu. Ancaq mütəxəssislərin vahid fikrinə görə, karantin rejimi uzadılmalıdır. Mən hesab edirəm ki, bu düzgün addım olacaqdır. Çünki müsbət dinamika, hələ ki, ilk təzahürlərini göstərməkdədir. Biz bu dinamikanı dayanıqlı etməliyik. Ona görə hesab edirəm ki, Operativ Qərargah yaxın vaxtlarda bu məsələ ilə bağlı məlumat verəcək. Hesab edirəm ki, karantin rejiminin uzadılması yeganə düzgün qərardır. Bunu nəzərə alaraq, biz əlbəttə ki, insanların sosial müdafiəsini daha da gücləndirməliyik. Azərbaycan xalqı yaxşı bilir ki, biz dərhal bu məsələ ilə ciddi məşğul olmağa başlamışıq. Pandemiyadan ən çox zərər çəkən sahələrdə işləyən insanların əməkhaqlarının əhəmiyyətli hissəsi dövlət tərəfindən qarşılanır. Bu kateqoriyaya aid olan insanların sayı 300 mindən çoxdur. Eyni zamanda, 300 minə yaxın mikrosahibkarın maliyyə vəziyyətinin təmin edilməsi üçün dövlət böyük maliyyə vəsaiti ayırıb. Beləliklə, ancaq bu kateqoriyalara aid olan 600 minə yaxın insan dövlətdən maddi dəstək alır. Dövlət sektorunda işləyənlərin əməkhaqları tam ödənilir. Hazırda bir milyona yaxın insanın böyük əksəriyyəti işləmir, ancaq dövlət onların maaşını verir. Yəni bu, bir daha Azərbaycan dövlətinin humanist mahiyyətini göstərir. Onu göstərir ki, - mən bunu dəfələrlə demişəm, hələ koronavirusdan daha əvvəl demişəm, - bizim siyasətimizin mərkəzində Azərbaycan vətəndaşı dayanır. Bugünkü ağır vəziyyət bir daha onu göstərir ki, sözümüzlə əməlimiz arasında heç bir fərq yoxdur, nəyi bəyan ediriksə, onu da edirik. Ancaq nəzərə alsaq ki, karantin rejimi uzadılacaq və karantin rejimindən çıxış da gərək bəri başdan planlaşdırılsın. Sizə də bu məsələ ilə bağlı müvafiq göstərişlər verirəm ki, biz karantin rejimini mərhələli yollarla sərtləşdirmişdik və bu rejimi eyni qaydada - mərhələli yollarla yumşaltmalıyıq. Bu hansı formada olacaq? Gərək bu məsələ üzərində hökumət və o cümlədən nazirliklər işləsin, təkliflər versin. Yumşalma hansı sahələrdən başlamalıdır, biz indidən bunu planlaşdırmalıyıq. Çünki ümid edirəm, hətta uzadılmış karantin rejimi dövründə müəyyən yumşalma istisna deyil. Amma yenə də biz addımlarımızı vəziyyətə uyğun şəkildə atmalıyıq". Göründüyü kimi, ölkə başçısı da karantin rejiminin uzadılmasını məqbul saydığını bildirib. Bu qərarı zəruri edən ən ümdə məqamlar nə ilə bağlıdır? Görünən budur ki, koronavirusla bağlı ölkəmizdə həyata keçirilən tədbirlər mütəşəkkil, məqsədyönlü xarakter daşıyır. Demək olar ki, bütün sahələrdə infeksiyanın yayılmasının qarşısının alınması istiqamətində intensiv işlər görülməkdədir. Nazirlər Kabineti yanında Operativ Qərargahın elan etdiyi xüsusi rejim və tətbiq olunan sosial izolyasiya tədbirləri virusun ölkədə yayılma ehtimalının qarşısını almağa xidmət edir. Yəni hökumətin vaxtında atdığı uğurlu addımlar, Prezident İlham Əliyevin verdiyi müdrik qərarlar sayəsində ölkəmiz koronavirus pandemiyası ilə qətiyyətlə mübarizə aparmaqdadır. Bu gün pandemiya dövründə dünyanın mənzərəsinə nəzər yetirsək görərik ki, Azərbaycan yalnız regionda deyil, bütün dünyada koronavirus təhlükəsinə adekvat reaksiya verən, zamanında qabaqlayıcı tədbirlər görən azsaylı dövlətlərdən biridir. Məhz buna görə də digər dünya dövlətləri ilə müqayisədə Azərbaycanda koronavirusun yayılma tempi azdır. Bununla belə, dövlət əhalinin sağlamlığını qorumaq, koronavirusun yayılmasının qarşısını almaq üçün səylərini davam etdirməkdədir. Aprelin 20-dək ölkəmizdə xüsusi karantin rejimi elan edilib ki, məqsəd əhalinin evdə qalmasını təmin etmək, sosial izolyasiya tədbirlərini genişləndirmək, bununla da virusun yayılmasının qarşısını almaqdır. Pandemiyanın fəsadlarından az itki ilə çıxmaq üçün dövlət əlindən gələni əsirgəmir. Prezident İlham Əliyev son çıxışında karantin rejiminin uzadılması ilə bağlı zərurəti də məhz bunun üçün məqbul saydığını bildirdi. Dünyanın inkişaf etmiş ölkələrində gündə yüzlərlə insan vəfat edir və heç bir ölkənin səhiyyə sistemi bu artan xəstələrin müalicəsini tam təşkil edə bilmir. Bu, hər kəs üçün dərs olmalıdır. Ona görə Azərbaycanda qabaqlayıcı tədbirlərin görülməsi və vəziyyətə uyğun şəkildə addımların atılması lazımdır. Təsadüfi deyil ki, TƏBİB-in İdarə Heyətinin sədri Ramin Bayramlı hələ xəstəliyin yekunlaşmadığını bildirib. Onun sözlərinə görə, qarşıda daha ciddi problemlər ola bilər:“Heç birimiz arxayınlaşmamalıyıq. Yaxın bir il ərzində düşmənin bizə bir addım məsafədə olmasını unutmayaq. Biz karantin rejimi müddətinin uzadılması üçün ölkə rəhbərliyinə müraciət edəcəyik”. Ramin Bayramlnın açıqlaması və Prezidentin son çıxışından belə aydın oldu ki, proses statistikaya və nəticələrə uyğun aparılır. Karantin rejiminin uzadılması və ondan tədricən çıxılmasını zəruri edən əsas səbəblər tibbidir. Mütəxəssislər hesab edirlər ki, hazırkı dövrdə respublikamızda koronavirus infeksiyasının yayılmasının azalması müşahidə olunur. Bir neçə gündür bir növ sabitlik yaranıb. Azalmalardan dolayı arxayın olmaq üçün hələ tez olduğu qənaətində olan peşəkarların sözlərinə görə, bu infeksiya hava-damcı yolu ilə yayılır. Belə infeksiyalardan hər cür təlatümləri gözləmək olar. Çünki karantin rejiminin tətbiqindən əvvəlki dövrdə baş verən yoluxmalar var ki, o insanlar hələ də virus daşıyıcısı ola bilər.
Respublikanın baş infeksionisti isə bu qənaətdədir ki, karantin rejiminin bir qədər də uzadılmasına ehtiyac var:”Tam əmin olduqdan sonra mərhələli şəkildə karantinin yumşaldılmasına imkan yarana bilər. İndidən başlasaq, fikrimcə, səhv etmiş olarıq. Karantin rejimini uzatmaq vacibdir”
Göründüyü kimi, ölkə başçısının karantinin müddətinin uzadılması ilə bağlı fikirlərinin həm tibbi, həm də digər ciddi əsasları var.
Məhəmmədəli QƏRİBLİ
